ഓപ്പറേഷന്‍ സിന്ദൂറില്‍ അഞ്ച് ജെറ്റുകള്‍ വെടിവെച്ചിട്ടെന്ന് ഡോണള്‍ഡ് ട്രംപ്

ന്യൂയോര്‍ക്ക്: പഹല്‍ഗാം ഭീകരാക്രമണത്തിന് പിന്നാലെയുണ്ടായ ഓപ്പറേഷന്‍ സിന്ദൂരില്‍ അഞ്ച് ജെറ്റുകള്‍ വെടിവെച്ചിട്ടെന്ന് അവകാശവാദവുമായി യുഎസ് പ്...

ന്യൂയോര്‍ക്ക്: പഹല്‍ഗാം ഭീകരാക്രമണത്തിന് പിന്നാലെയുണ്ടായ ഓപ്പറേഷന്‍ സിന്ദൂരില്‍ അഞ്ച് ജെറ്റുകള്‍ വെടിവെച്ചിട്ടെന്ന് അവകാശവാദവുമായി യുഎസ് പ്രസിഡന്റ് ഡോണള്‍ഡ് ട്രംപ്. എന്നാല്‍ ഏത് രാജ്യത്തിന്റെ വിമാനങ്ങളാണ് വെടിവെച്ചിട്ടെതെന്ന് ട്രംപ് വ്യക്തമാക്കിയില്ല.

'വാസ്തവത്തില്‍, വിമാനങ്ങള്‍ ആകാശത്ത് നിന്ന് വെടിവയ്ക്കുകയായിരുന്നു. അഞ്ച് ജെറ്റുകള്‍ യഥാര്‍ത്ഥത്തില്‍ വെടിവച്ചിട്ടതായി ഞാന്‍ കരുതുന്നു'- ട്രംപ് വിശദീകരിച്ചു. വൈറ്റ് ഹൗസില്‍ സംഘടിപ്പിച്ച ഒരു അത്താഴവിരുന്നിനിടയിലാണ് ട്രംപ് ഇക്കാര്യം വ്യക്തമാക്കിയത്. 

ഇന്ത്യയുടെ യുദ്ധവിമാനങ്ങള്‍ വെടിവെച്ചിട്ടെന്ന് അവകാശവാദവുമായി നേരത്തെ പാക്കിസ്ഥാന്‍ രംഗത്തെത്തിയിരുന്നു. എന്നാല്‍ ഇതിനെ സാധൂകരിക്കുന്ന ഒരുതെളിവും പാക്കിസ്ഥാന്‍ പുറത്തുവിട്ടിരുന്നില്ല. ഇന്ത്യ ഇത് പാടേ തള്ളിയിരുന്നു.

അതേസമയം, ഇന്ത്യ- പാക് സംഘര്‍ഷം അവസാനിപ്പിക്കാന്‍ താനാണ് ഇടപെട്ടതെന്ന് ട്രംപ് ആവര്‍ത്തിക്കുന്നുണ്ട്. ഇന്ത്യ നിഷേധിട്ടും ട്രംപ് തന്റെ വാദത്തില്‍ ഉറച്ചുനില്‍ക്കുകയാണ്. 

യുദ്ധത്തിന്റെ ആദ്യദിനങ്ങളില്‍ നഷ്ടം സംഭവിച്ചതിന് ശേഷം ഇന്ത്യ തന്ത്രങ്ങള്‍ മാറ്റി മേല്‍ക്കോയ്മ നേടിയെന്ന് ഇന്ത്യന്‍ പ്രതിരോധ മേധാവി അനില്‍ ചൗഹാന്‍ അടുത്തിടെ അഭിമുഖത്തില്‍ പറഞ്ഞിരുന്നു. എന്നാല്‍ ഇന്ത്യന്‍ ജെറ്റുകള്‍ വെടിവെച്ചിട്ടെന്ന് പാക്കിസ്ഥാന്റെ അവകാശവാദത്തെ അദ്ദേഹം തള്ളിയിരുന്നു.പാക്കിസ്ഥാന്റെ കുറച്ച് വിമാനങ്ങള്‍ വെടിവെച്ചിട്ടെന്നും സൈനിക നേതൃത്വം പറഞ്ഞിരുന്നു.വിമാനങ്ങള്‍ക്ക് നാശനഷ്ടം സംഭവിച്ചത് സ്ഥിരീകരിച്ചിട്ടില്ലെങ്കിലും വ്യോമതാവളങ്ങള്‍ക്ക് നാശനഷ്ടം ഉണ്ടായെന്ന് നേരത്തെ പാക്കിസ്ഥാന്‍ സമ്മതിച്ചിരുന്നു. 

ജമ്മുകശ്മീരിലെ പഹല്‍ഗാമില്‍ പാക് ഭീകരര്‍ നടത്തിയ ആക്രമണത്തിന് പിന്നാലെയാണ് ഓപ്പറേഷന്‍ സിന്ദൂര്‍ ഇന്ത്യ ആരംഭിച്ചത്. 26 പേരാണ് പഹല്‍ഗാമിലുണ്ടായ ഭീകരാക്രമണത്തില്‍ കൊല്ലപ്പെട്ടത്.

Key Words: Donald Trump,  Fighter Jet, Operation Sindoor