ന്യൂഡല്‍ഹി: ഡല്‍ഹി നിയമസഭാ തിരഞ്ഞെടുപ്പില്‍ വന്‍ വിജയത്തിലേക്ക് കുതിച്ചുകൊണ്ടിരിക്കുന്ന ബിജെപിയുടെ പാര്‍ട്ടി ആസ്ഥാനത്ത് അനുയായികള്‍ നൃത്തം ...
ന്യൂഡല്‍ഹി: ഡല്‍ഹി നിയമസഭാ തിരഞ്ഞെടുപ്പില്‍ വന്‍ വിജയത്തിലേക്ക് കുതിച്ചുകൊണ്ടിരിക്കുന്ന ബിജെപിയുടെ പാര്‍ട്ടി ആസ്ഥാനത്ത് അനുയായികള്‍ നൃത്തം ചെയ്യുകയാണ്. ഫല സൂചനയനുസരിച്ച് 48 സീറ്റുകളില്‍ ലീഡ് ചെയ്യുന്നതിനാല്‍ ബിജെപി അധികാരത്തിലേറുമെന്ന് ഏതാണ്ട് ഉറപ്പിച്ചിട്ടുണ്ട്.
അതേസമയം, ആം ആദ്മി പാര്‍ട്ടി (എഎപി) ഓഫീസിന് പുറത്ത് നിശബ്ദതയാണ്. ഇടയ്ക്ക് ആം ആദ്മി 30 സീറ്റില്‍ ലീഡിലേക്കു വന്നപ്പോള്‍ ആം ആദ്മി ആസ്ഥാനത്തും പ്രവര്‍ത്തകര്‍ ആഘോഷ നൃത്തം ചെയ്യുന്നുണ്ടായിരുന്നു. പക്ഷേ, ബിജെപിയുടെ ലീഡ് ഉയര്‍ന്നതോടെ എല്ലാവരും ഒഴിഞ്ഞുപോയി.ആഘോഷിക്കാന്‍ ഒന്നുമില്ലാതെ നിരാശയിലാണ് പ്രവര്‍ത്തകര്‍. വിജയം ആഘോഷിക്കുന്നതിനായി ഒരുക്കിയ വേദിയില്‍ കസേരകള്‍ ഒഴിഞ്ഞുകിടക്കുന്നു.
രണ്ട് പ്രധാന രാഷ്ട്രീയ പാര്‍ട്ടികള്‍ക്കെതിരെ മാത്രമല്ല, 'അഴിമതി സംവിധാനത്തിനെതിരെയും' മത്സരിച്ചതിനാല്‍ എഎപി ഇതുവരെ നടത്തിയതില്‍ വച്ച് ഏറ്റവും കഠിനമായ പോരാട്ടമായിരുന്നു ഈ തിരഞ്ഞെടുപ്പിലേത്. 2013 ല്‍ 28 സീറ്റുകള്‍ നേടി ഡല്‍ഹിയില്‍ ആം ആദ്മി പാര്‍ട്ടി ആദ്യമായി അധികാരത്തില്‍ വന്നു, പക്ഷേ സര്‍ക്കാര്‍ വെറും 49 ദിവസം മാത്രമേ നീണ്ടുനിന്നുള്ളൂ.
2015 ലെ തിരഞ്ഞെടുപ്പില്‍ 67 സീറ്റുകള്‍ നേടി റെക്കോര്‍ഡിട്ടു. 2020 ലെ തിരഞ്ഞെടുപ്പിലും ആം ആദ്മി പാര്‍ട്ടി 62 സീറ്റുകള്‍ നേടിയിരുന്നു. എന്നാല്‍ ഇതൊക്കെ പഴങ്കഥയാകുന്നതിന്റെ കടുത്ത നിരാശയിലാണ് കെജ്രിവാളും അനുയായികളും.
COMMENTS