മഞ്ചേശ്വരം കേസ് കോടതി തള്ളിയത് തെളിവിന്റെ കണിക പോലും ഇല്ലാത്തതുകൊണ്ട്: കെ സുരേന്ദ്രന്‍

തിരുവനന്തപുരം: മഞ്ചേശ്വരം കേസ് കോടതി തള്ളിയത് തെളിവിന്റെ കണിക പോലും ഇല്ലാത്തതുകൊണ്ടാണെന്ന് ബി ജെ പി സംസ്ഥാന അധ്യക്ഷന്‍ കെ സുരേന്ദ്രന്‍. വിധി...

തിരുവനന്തപുരം: മഞ്ചേശ്വരം കേസ് കോടതി തള്ളിയത് തെളിവിന്റെ കണിക പോലും ഇല്ലാത്തതുകൊണ്ടാണെന്ന് ബി ജെ പി സംസ്ഥാന അധ്യക്ഷന്‍ കെ സുരേന്ദ്രന്‍. വിധി പകര്‍പ്പ് പോലും വായിക്കാതെയാണ് യു ഡി എഫും ചില മാധ്യമങ്ങളും തനിക്കെതിരെ പ്രചരണം നടത്തുന്നതെന്നും  അദ്ദേഹം പറഞ്ഞു. 

കോടതി ഒരു വിധി പുറപ്പെടുവിച്ചാല്‍ ആ വിധിയില്‍ എന്താണ് ഉള്ളതെന്ന് മനസ്സിലാക്കാന്‍ ശ്രമിക്കാതെ വിമര്‍ശിക്കുന്നത് ജനാധിപത്യപരമല്ല. പ്രോസിക്യൂഷനും പൊലീസും എന്നെ സഹായിച്ചുവെന്നാണ് യു ഡി എഫ് പറയുന്നത്. കോണ്‍ഗ്രസിന്റെ അദ്ധ്യക്ഷന്‍ കെ സുധാകരന്‍ ഇ പി ജയരാജന്‍ വധശ്രമക്കേസില്‍ കേരള ഹൈക്കോടതിയില്‍ നിന്നും വിടുതല്‍ ഹര്‍ജി നേടി. അത് കൃത്യമായി പരിഗണിച്ച ശേഷമാണ് ഇങ്ങനെയൊരു വിധി എന്നാണ് കോടതി പറഞ്ഞത്. അതിനെതിരെ ബി ജെ പി ആരോപണം ഉന്നയിച്ചില്ല. എന്നാല്‍ മഞ്ചേശ്വരം കേസില്‍ ബി ജെ പിക്ക് അനുകൂലമായ വിധി വന്നപ്പോള്‍ കോടതിയെ മുന്‍നിര്‍ത്തി ബി ജെ പി -സി പി എം ഒത്തുതീര്‍പ്പായി എന്നാണ് കോണ്‍ഗ്രസ് പറയുന്നത്. ഇത് ഇരട്ടത്താപ്പാണ്. 

171ഇ വകുപ്പ് അനുസരിച്ച് കേസ് എടുത്തിട്ട് കാര്യമില്ലെന്ന് മനസിലാക്കിയ പൊലീസ്  എസ് സി എസ് ടി അതിക്രമ നിയമപ്രകാരം കേസെടുത്തു. പ്രലോഭിപ്പിച്ചും ഭീഷണിപ്പെടുത്തിയും തട്ടിക്കൊണ്ടുപോയി എന്നതാണ് എനിക്കെതിരെ ചേര്‍ത്ത് മറ്റൊരു വകുപ്പ്. ഇതുപ്രകാരം മൂന്നുവര്‍ഷം ശിക്ഷ ലഭിക്കാവുന്നതാണ്. എസ്സി-എസ്ടി കാരനായ വ്യക്തിയെ പ്രലോഭിച്ചു ഭീഷണിപ്പെടുത്തിയും തട്ടിക്കൊണ്ടുപോയി എന്ന എസ് സി എസ് ടി അതിക്രമ നിരോധന നിയമ പ്രകാരം അഞ്ചുവര്‍ഷം തടവ്  ലഭിക്കാവുന്നതാണ്. ഇത് രണ്ടും കോടതി തള്ളിയപ്പോഴാണ് ഒരു വര്‍ഷം മാത്രം ശിക്ഷ ലഭിക്കാവുന്ന 171ഇ വകുപ്പ് പ്രകാരം എടുത്ത കേസില്‍ കുറ്റപത്രം നല്‍കാന്‍ പോലീസ് വൈകിച്ചത് ഗൂഢാലോചനയാണെന്ന് യുഡിഎഫ് പറയുന്നത്. ഇതില്‍ നിന്നും യുഡിഎഫിന്റെ ഇരട്ടത്താപ്പും പൊള്ളത്തരവും വ്യക്തമാവും.

Key words: Court, Manjeswaram Case, K Surendran