സിദ്ധാര്‍ത്ഥിന്റെ കൊലപാതകം: സര്‍ക്കാരും വൈസ് ചാന്‍സലറും ചേര്‍ന്ന് കേസ് അട്ടിമറിക്കാന്‍ ശ്രമിക്കുന്നു: പ്രതിപക്ഷ നേതാവ്

V.D Satheesan is against government & VC about Siddharth's death

തിരുവനന്തപുരം: പൂക്കോട് വെറ്ററിനറി സര്‍വകലാശാല വിദ്യാര്‍ത്ഥി സിദ്ധാര്‍ത്ഥിന്റെ കൊലപാതകം സംബന്ധിച്ച അന്വേഷണം അട്ടിമറിക്കാന്‍ സര്‍ക്കാരും വൈസ് ചാന്‍സലറും ചേര്‍ന്ന് ശ്രമിക്കുന്നവെന്ന് പ്രതിപക്ഷ നേതാവ് വിഡി സതീശന്‍.

പ്രതിപ്പട്ടികയിലുള്ള ഉന്നതരെ രക്ഷിക്കുകയെന്നതാണ് ലക്ഷ്യമെന്നും അതിനാലാണ് നിയമോപദേശം പോലും തേടാതെ വിദ്യാര്‍ത്ഥികളുടെ സസ്പെന്‍ഷന്‍ വി.സി പിന്‍വലിച്ചതെന്നും അദ്ദേഹം ചൂണ്ടിക്കാട്ടി. തെളിവുകള്‍ നശിപ്പിക്കാനുള്ള ശ്രമമാണ് ഇതിനു പിന്നിലെന്നും ഇതിനു പിന്നില്‍ വന്‍ ഇടപെടലുകളുണ്ടെന്നും അദ്ദേഹം വ്യക്തമാക്കി.

എസ്.എഫ്.ഐയുടെ നേതൃത്വത്തില്‍ ഒരു വിദ്യാര്‍ത്ഥിയെ തല്ലിക്കൊന്ന് കെട്ടിത്തൂക്കിയ കേസാണിതെന്നും വിദ്യാര്‍ത്ഥി, മഹിളാ യുവജന സംഘടനകളുടെ നേതൃത്വത്തില്‍ പ്രതിപക്ഷം നടത്തിയ സമരത്തെ തുടര്‍ന്നാണ് സി.ബി.ഐ അന്വേഷണത്തിന് സര്‍ക്കാര്‍ ഉത്തരവിട്ടതെന്നും അദ്ദേഹം ചൂണ്ടിക്കാട്ടി.

തിരഞ്ഞെടുപ്പ് നടക്കുന്ന സാഹചര്യത്തില്‍ സമരങ്ങളെ ഭയന്നാണ് സി.ബി.ഐ അന്വേഷണത്തിന് ഉത്തരവിടാന്‍ സര്‍ക്കാര്‍ തയ്യാറായതെന്നും കൊന്ന് കെട്ടിത്തൂക്കിയവര്‍ തന്നെയാണ് അഴിച്ച് ആശുപത്രിയിലേക്ക് കൊണ്ടുപോയതെന്നും അദ്ദേഹം പറഞ്ഞു.

സി.ബി.ഐ വരുന്നതിന് മുന്‍പ് തെളിവ് നശിപ്പിക്കാനുള്ള ശ്രമമാണ് ഇപ്പോള്‍

നടക്കുന്നത്. മാധ്യമ വാര്‍ത്തകള്‍ തിരഞ്ഞെടുപ്പിലേക്ക് ശ്രദ്ധതിരിച്ചപ്പോള്‍ വീണ്ടും കേസ് അട്ടിമറിക്കാന്‍ ശ്രമിക്കുകയാണ്. ഇതിനെ എന്ത് വിലകൊടുത്തും ചെറുക്കുമെന്നും അദ്ദേഹം പറഞ്ഞു. 

നീതിക്ക് വേണ്ടിയുള്ള പോരാട്ടത്തില്‍ സിദ്ധാര്‍ത്ഥിന്റെ കുടുംബത്തിനൊപ്പമാണ് പ്രതിപക്ഷമെന്നു പറഞ്ഞ പ്രതിപക്ഷ നേതാവ് സിദ്ധാര്‍ത്ഥിന്റെ  കൊലപാതകത്തില്‍ നിന്നും എസ്എഫ്‌ഐ ക്രിമിനലുകള്‍ ഒന്നും പഠിച്ചില്ലെന്നും ചൂണ്ടിക്കാട്ടി. 

കൊയിലാണ്ടിയില്‍ അമല്‍ എന്ന വിദ്യാര്‍ത്ഥിയെ ഇടി വീട്ടില്‍ എത്തിച്ച് മര്‍ദ്ദിച്ചു. തിരുവനന്തപുരത്ത് 51 വയസുകാരനായ നൃത്താധ്യാപകനെ മുറിയില്‍ കൊണ്ടു പോയി തല്ലിച്ചതച്ചു. അധ്യാപകന്‍ പിന്നീട് ആത്മഹത്യ ചെയ്തു. ഇതെല്ലാം എസ്.എഫ്.ഐയുടെ ജീവന്‍രക്ഷാ പ്രവര്‍ത്തനമാണെന്ന് ന്യായീകരിക്കുന്ന മുഖ്യമന്ത്രിയാണ് എല്ലാത്തിനും മറുപടി പറയേണ്ടതെന്നും പ്രതിപക്ഷ നേതാവ് വ്യക്തമാക്കി. 

Keywords: V.D Satheesan, Government & VC, Siddharth's death