ഇടുക്കി: ദേവികുളം മുന് എം.എല്.എ എസ് എസ് രാജേന്ദ്രന് ബിജെപിയിലേക്കെന്ന അഭ്യൂഹങ്ങളില് മറുപടിയുമായി അദ്ദേഹം തന്നെ രംഗത്തെത്തിയതിന് പിന്നാല...
ഇടുക്കി: ദേവികുളം മുന് എം.എല്.എ എസ് എസ് രാജേന്ദ്രന് ബിജെപിയിലേക്കെന്ന അഭ്യൂഹങ്ങളില് മറുപടിയുമായി അദ്ദേഹം തന്നെ രംഗത്തെത്തിയതിന് പിന്നാലെ വീണ്ടും എസ്. രാജേന്ദ്രന് വാര്ത്തകളില് ഇടംപിടിക്കുന്നു. സിപിഎം അംഗത്വം പുതുക്കാന് താത്പര്യമില്ലെന്ന് എസ് രാജേന്ദ്രന് പറഞ്ഞതോടെയാണ് വീണ്ടും രാജേന്ദ്രന് ബിജെപിയിലേക്കെന്ന അഭ്യൂഹങ്ങള് പരക്കുന്നത്. എന്നാല്, പാര്ട്ടി അംഗത്വം പുതുക്കാന് ആഗ്രഹിക്കുന്നില്ലെന്നും അതിനര്ഥം ബിജെപിയില് പോകുമെന്നല്ലെന്നും രാജേന്ദ്രന് വ്യക്തമാക്കി.
സിപിഎം നേതാക്കളെത്തി മെമ്പര്ഷിപ്പ് പുതുക്കാന് ആവശ്യപ്പെട്ടിരുന്നുവെന്നും എന്നാല് പുതുക്കില്ലെന്ന തീരുമാനം താന് എടുത്തെന്നും രാജേന്ദ്രന് പറഞ്ഞു. 'എന്റെ മാനസിക വിഷമത്തിന്റെ ഭാഗമായുള്ള തീരുമാനമാണ്. അനുഭവിച്ചത് ഞാനാണ്. എന്നെ പ്രവര്ത്തിപ്പിക്കരുതെന്ന് കരുതിയ ആളുകളും ചതി ചെയ്ത ആളുകളോടൊപ്പം നില്ക്കാനും ഇരിക്കാനും പ്രയാസമുണ്ട്', രാജേന്ദ്രന് പറഞ്ഞു.
പാര്ട്ടിയില് താന് തുടരരുതെന്നാണ് ജില്ലാ സെക്രട്ടേറിയറ്റ് അംഗമായ കെവി ശശി ആഗ്രഹിക്കുന്നതെന്നും ഏരിയാ സെക്രട്ടറിയാണ് മെമ്പര്ഷിപ്പ് പുതുക്കണമെന്ന് ആവശ്യപ്പെട്ട് തന്നെ സമീപിച്ചതെന്നും എസ് രാജേന്ദ്രന് പറഞ്ഞു.
കഴിഞ്ഞ ദിവസം ബിജെപി നേതാക്കള് വീട്ടിലെത്തി ചര്ച്ച നടത്തിയിരുന്നതായി എസ് രാജേന്ദ്രന് പറഞ്ഞിരുന്നു. എന്നാല് ബിജെപിയിലേക്കെന്ന പ്രചാരണം തെറ്റാണെന്നും നിലവില് അത്തരം കാര്യങ്ങളില് തീരുമാനം എടുത്തിട്ടില്ലെന്നും രാജേന്ദ്രന് പറഞ്ഞു.
COMMENTS