ന്യൂഡല്ഹി: അരവിന്ദ് കെജ്രിവാളിനെ ഇഡി ഇന്ന് വിശദമായി ചോദ്യം ചെയ്യും. മദ്യനയ രൂപീകരണത്തിലും കോഴ ഇടപാടിലും കെജ്രിവാളിന് നിര്ണായക പങ്കുണ്ടെന്ന...
ന്യൂഡല്ഹി: അരവിന്ദ് കെജ്രിവാളിനെ ഇഡി ഇന്ന് വിശദമായി ചോദ്യം ചെയ്യും. മദ്യനയ രൂപീകരണത്തിലും കോഴ ഇടപാടിലും കെജ്രിവാളിന് നിര്ണായക പങ്കുണ്ടെന്ന് ഇഡി ആരോപിച്ചിരുന്നു. മദ്യനയവുമായി ബന്ധപ്പെട്ട് നടത്തുന്ന അന്വേഷണത്തില് നിര്ണായക വിവരങ്ങള് ലഭിക്കാന് കെജ്രിവാളിനെ വിശദമായി ചോദ്യം ചെയ്യേണ്ടതുണ്ടെന്ന് ഇഡി കോടതിയെ അറിയിച്ചിരുന്നു. കേസില് നേരത്തെ അറസ്റ്റിലായ ബി.ആര്.എസ്. നേതാവ് കവിതയേയും കെജ്രിവാളിനെയും ഒന്നിച്ചിരുത്തി ചോദ്യം ചെയ്യുന്നതും അന്വേഷണത്തിന് ഗുണകരമാണെന്ന നിലപാടാണ് ഇഡിയുടേത്.
അരവിന്ദ് കെജ്രിവാളിന്റെ അറസ്റ്റില് പ്രതിഷേധിച്ച് ദില്ലിയില് ഇന്ന് എ.എ.പി. നേതാക്കളുടെ രാജ്യ സംരക്ഷണ പ്രതിജ്ഞ സംഘടിപ്പിക്കും. ദില്ലി ശഹീദി പാര്ക്കിലെ പരിപാടിയില് എ.എ.പി. മന്ത്രിമാരും എം.എല്.എമാരും കൗണ്സിലര്മാരും പങ്കെടുക്കും. അറസ്റ്റില് പ്രധാനമന്ത്രിക്കെതിരെ പ്രതിഷേധം വ്യാപിപ്പിക്കുമെന്ന് ആം ആദ്മി പാര്ട്ടി ഇന്നലെ പ്രഖ്യാപിച്ചിരുന്നു. മാര്ച്ച് 26ന് പ്രധാനമന്ത്രിയുടെ ഔദ്യോഗിക വസതിക്ക് മുന്പില് പ്രതിഷേധം സംഘടിപ്പിക്കാനാണ് തീരുമാനം. ഘെരാവോ മോഡല് സമരമുറയാകും സ്വീകരിക്കുകയെന്ന് എഎപി വ്യക്തമാക്കിയിട്ടുണ്ട്.
അതേസമയം, അരവിന്ദ് കെജ്രിവാള് മുഖ്യമന്ത്രി സ്ഥാനവും എ.എ.പി. ദേശീയ കണ്വീനര് സ്ഥാനവും രാജിവെക്കില്ല. ജയിലില് നിന്ന് കാര്യങ്ങള് നിയന്ത്രിക്കും ഭരണനിര്വ്വഹണ ചുമതല മന്ത്രിമാരില് ആര്ക്കെങ്കിലും നല്കുമെന്നാണ് ഇപ്പോഴത്തെ വിവരം.
ഇ ഡി കേസും നടപടിയും തിരഞ്ഞെടുപ്പ് പ്രചാരണ വിഷയമാക്കാനാണ് എ.എ.പി. ശ്രമം. ഇതിനായി അരവിന്ദ് കെജ്രിവാളിന്റെ ഭാര്യയെയും പ്രചാരണത്തിന് ഇറക്കാന് എ.എ.പി. ആലോചിക്കുന്നുണ്ട്.
COMMENTS