തമിഴ്‌നാട് സര്‍ക്കാരിന്റെ വനിതാ കേന്ദ്രീകൃത പദ്ധതി വെറും ഭിക്ഷയെന്ന പരാമര്‍ശം: ബി.ജെ.പി നേതാവ് ഖുശ്ബു വിവാദത്തില്‍

B.J.P leader Khushbu stirred a controversy

ചെന്നൈ: തമിഴ്‌നാട് സര്‍ക്കാരിന്റെ വനിതാ കേന്ദ്രീകൃത പദ്ധതിയെ ഭിക്ഷയെന്ന് വിമര്‍ശിച്ച നടിയും ബി.ജെ.പി നേതാവുമായ ഖുശ്ബു വിവാദത്തില്‍. സര്‍ക്കാര്‍ കുടുംബിനികള്‍ക്ക് പ്രതിമാസം 1000 രൂപ നല്‍കുന്ന പദ്ധതിയെയാണ് ദേശീയ വനിതാ കമ്മീഷന്‍ അംഗം കൂടിയായ ഖുശ്ബു ഭിക്ഷയെന്ന് വിളിച്ച് ആക്ഷേപിച്ചത്. 

തമിഴ്‌നാട്ടില്‍ മയക്കുമരുന്ന് ഉപയോഗം വര്‍ദ്ധിച്ചുവരുന്ന പശ്ചാത്തലത്തില്‍ ഡി.എം.കെ സര്‍ക്കാരിനെതിരെ പ്രതിഷേധിക്കുമ്പോഴാണ് ഖുശ്ബു വിവാദ പരാമര്‍ശം നടത്തിയത്. 

മയക്കുമരുന്ന് ഉപയോഗം വര്‍ദ്ധിച്ചുവരുന്ന സാഹചര്യത്തില്‍ ആയിരം രൂപ സ്ത്രീകള്‍ക്ക് ഭിക്ഷയായി കൊടുത്താലും വോട്ട് ചെയ്യില്ലെന്നും സര്‍ക്കാര്‍ മയക്കുമരുന്ന് വിപത്ത് ഇല്ലാതാക്കുകയും മദ്യവില്‍പ്പന ശാലകള്‍ അടച്ചുപൂട്ടുകയും ചെയ്താല്‍ ആളുകള്‍ക്ക് 1000 രൂപ ഭിക്ഷ തേടേണ്ടി വരില്ലെന്നുമായിരുന്നു ഖുശ്ബുവിന്റെ പരാമര്‍ശം. 

ഇത് വന്‍ വിവാദമാകുകയും നടിക്കെതിരെ ഡിഎംകെയുടെ വനിതാ വിഭാഗം അടക്കമുള്ളവര്‍ രംഗത്തെത്തുകയുമായിരുന്നു.  ഇതേതുടര്‍ന്ന് വിശദീകരണവുമായി ഖുശ്ബു രംഗത്തെത്തി. 

മദ്യപാനം കാരണം കുടുംബത്ത് ബുദ്ധിമുട്ടനുഭവിക്കുന്ന സ്ത്രീകള്‍ക്ക് 1000 രൂപ കൊടുത്തിട്ട് യാതൊരു പ്രയോജനവുമില്ലെന്നായിരുന്നു അവരുടെ വിശദീകരണം. 

Keywords:  Khushbu, DMK government, Women,  Controversy