എസ് ഐക്കും രക്ഷയില്ല, പൊതു സ്ഥലത്തു മദ്യപിച്ചെന്ന് എസ് ഐയെ സി ഐ കള്ളക്കേസില്‍ കുടുക്കി

Nedupuzha CI TG Dilip Kumar has implicated Crime Branch sub inspector TR Amod in the fake case. The report of the state intelligence and the district

സ്വന്തം ലേഖകന്‍

തൃശൂര്‍: പൊതു സ്ഥലത്തു മദ്യപിച്ചെന്നു പറഞ്ഞ് എസ് ഐയെ സി ഐ കള്ളക്കേസില്‍ കുടുക്കുകയെന്ന് സംസ്ഥാന ഇന്റലിജന്‍സിന്റെയും ജില്ലാ സ്‌പെഷ്യല്‍ ബ്രാഞ്ചിന്റെയും റിപ്പോര്‍ട്ട്.

ക്രൈം ബ്രാഞ്ച് എസ് ഐ  ടി ആര്‍ ആമോദിനെയാണ് നെടുപുഴ സി ഐ ടിജി ദിലീപ് കുമാര്‍ കേസില്‍ കുടുക്കിയത്.

ഇക്കഴിഞ്ഞ ജൂലായ് 31ന് തൃശൂരിനടുത്ത് വടൂക്കരയില്‍ വച്ചാണ് സിറ്റി ക്രൈം ബ്രാഞ്ച് എസ് ഐ ആമോദ് വീട്ടുസാധനങ്ങള്‍ വാങ്ങുന്നതിനു പോകുന്ന വഴിയില്‍ വച്ചു പിടിയിലായത്.

ഫോണ്‍ വന്നതിനെ തുടര്‍ന്ന് വാഹനം നിറുത്തി സംസാരിക്കുകയായിരുന്ന ആമോദിനെ അതുവഴി വന്ന സി ഐ പിടികൂടുകയായിരുന്നു.

മദ്യപിക്കാനാണോ എത്തിയതെന്നു ചോദിച്ചുകൊണ്ട് സി ഐ തട്ടിക്കയറിയെന്നാണ് പരാതി. പിന്നീട് അടുത്തുള്ള മരക്കമ്പനിയില്‍ നിന്നു പാതി കാലിയായ മദ്യക്കുപ്പി എടുത്തുകൊണ്ടുവന്ന് അതു താന്‍ കുടിച്ചതാണെന്ന് സി ഐ കള്ളക്കേസുണ്ടാക്കുകയായിരുന്നുവെന്ന് ആമോദ് പരാതിപ്പെടുന്നു.

തുടര്‍ന്ന് ആമോദിനെ കസ്റ്റഡിയിലെടുത്ത് ആശുപത്രിയിലേക്കു കൊണ്ടുപോയി. അവിടെ നടത്തിയ പരിശോധനയില്‍ ശരീരത്തില്‍ മദ്യാംശമില്ലെന്നു തെളിഞ്ഞു.

ഇതിനു ശേഷവും പൊതു സ്ഥലത്തു മദ്യപിച്ചതിനു സി ഐ കേസെടുത്ത് ജാമ്യത്തില്‍ വിട്ടു. തുടര്‍ന്ന് ആമോദ് സസ്‌പെന്‍ഷനിലുമായി.

ഇതിനു പിന്നാലെ ആമോദിന്റെ കുടുംബം തൃശൂര്‍ റേഞ്ച് ഡി ഐ ജി അജിതാ ബീഗത്തിനു പരാതി നല്കി. 

തുടര്‍ന്നു നടന്ന അന്വേഷണത്തിലാണ് കള്ളക്കേസാണെന്നു തെളിഞ്ഞിരിക്കുന്നത്. സി ഐക്കെതിരേ വകുപ്പുതല അന്വേഷണം ആരംഭിച്ചതായി പൊലീസ് വൃത്തങ്ങള്‍ അറിയിച്ചു.

ആമോദ് ഫോണ്‍ ചെയ്തു നില്ക്കുകയായിരുന്നുവെന്ന് സി ഐക്കൊപ്പമുണ്ടായിരുന്നു ഉദ്യോഗസ്ഥനും മൊഴി നല്കിയിരുന്നു.

Summary: Nedupuzha CI TG Dilip Kumar has implicated Crime Branch sub inspector TR Amod in the fake case. The report of the state intelligence and the district special branch said that the SI was  implicated in a fake CI case for being drunk in a public place.