കേരളത്തിന്റെ എക്കാലത്തെയും ജനകീയ നേതാവ് ഉമ്മന്‍ ചാണ്ടി അന്തരിച്ചു

  കോട്ടയം: മുന്‍ മുഖ്യമന്ത്രിയും കോണ്‍ഗസിന്റെ എക്കാലത്തെയും മികച്ച നേതാക്കളിലൊരാളുമായ ഉമ്മന്‍ ചാണ്ടി വിടവാങ്ങി. 79 വയസായിരുന്നു. രോഗബാധയെ തു...

 

കോട്ടയം: മുന്‍ മുഖ്യമന്ത്രിയും കോണ്‍ഗസിന്റെ എക്കാലത്തെയും മികച്ച നേതാക്കളിലൊരാളുമായ ഉമ്മന്‍ ചാണ്ടി വിടവാങ്ങി. 79 വയസായിരുന്നു. രോഗബാധയെ തുടര്‍ന്ന് ദീര്‍ഘകാലമായി ബാംഗ്ലൂരില്‍ ചികിത്സയിലായിരുന്നു. മകന്‍ ചാണ്ടി ഉമ്മന്‍ തന്നെയാണ് ഫേസ്ബുക്കിലൂടെ മരണവാര്‍ത്ത പങ്കുവെച്ചത്.

1943 ഒക്ടോബർ 31ന് പുതുപ്പള്ളി കരോട്ട് വള്ളക്കാലിൽ കെ.ഒ. ചാണ്ടിയുടെയും ബേബി ചാണ്ടിയുടെയും മകനായി കോട്ടയം ജില്ലയിലെ കുമരകത്ത് ആയിരുന്നു ഉമ്മൻ ചാണ്ടിയുടെ ജനനം. പുതുപ്പള്ളി സെന്റ് ജോർജ്ജ് ഹൈസ്കൂളിലെ വിദ്യാഭ്യാസത്തിന് ശേഷം കോട്ടയം സി.എം.എസ്. കോളേജ്, ചങ്ങനാശ്ശേരി എസ്.ബി. കോളേജ് എന്നിവിടങ്ങളിൽ പഠനം നടത്തി ബി.എ ബിരുദം നേടി. എറണാകുളം ലോ കോളേജിൽ നിന്ന് നിയമ ബിരുദവും സമ്പാദിച്ചു.

സ്കൂളിൽ പഠിക്കുമ്പോഴെ കോൺഗ്രസിൻ്റെ വിദ്യാർത്ഥി സംഘടനയായ കെ.എസ്.യുവിലൂടെയാണ് രാഷ്ട്രീയത്തിൽ എത്തിയത്. പുതുപ്പള്ളി സെൻ്റ് ജോർജ് ഹൈസ്കൂളിലെ കെ.എസ്.യു യൂണിറ്റ് പ്രസിഡൻറ് മുതൽ കേരളത്തിൻ്റെ മുഖ്യമന്ത്രി സ്ഥാനം വരെ എത്തി നിൽക്കുന്നതാണ് ഉമ്മൻ ചാണ്ടിയുടെ രാഷ്ട്രീയ ജീവിതം

കേരളം കണ്ട എക്കാലത്തെയും മികച്ച ജനപിന്തുണയുള്ള നേതാവായിരുന്നു ഉമ്മന്‍ചാണ്ടി. കോട്ടയം ജില്ലയിലെ സ്വന്തം പട്ടണമായ പുതുപ്പള്ളിയെ പ്രതിനിധീകരിച്ച് അദ്ദേഹം 1970 മുതല്‍ തുടര്‍ച്ചയായി കേരളത്തില്‍ എം.എല്‍.എ.യായിരുന്നു. തുടര്‍ച്ചയായി 12 തവണ നിയമസഭാ തിരഞ്ഞെടുപ്പില്‍ വിജയിച്ചു. 

2004 മുതല്‍ 2006 വരെയും 2011 മുതല്‍ 2016 വരെയും കേരള മുഖ്യമന്ത്രിയായി അദ്ദേഹം സേവനമനുഷ്ഠിച്ചു. ബഹുജന നേതാവായിരുന്ന അദ്ദേഹം ജനങ്ങളുമായുള്ള അടുത്ത ബന്ധത്തിന്റെ പേരില്‍ പരക്കെ പ്രശംസിക്കപ്പെട്ടു. അദ്ദേഹം മുഖ്യമന്ത്രിയായിരിക്കെ സംഘടിപ്പിച്ച ജനസമ്പര്‍ക്ക പരിപാടി നൂറുകണക്കിന് ആളുകളുടെ ദീര്‍ഘകാലമായി നിലനില്‍ക്കുന്ന പരാതികള്‍ക്ക് അടിയന്തര പരിഹാരമായി.

കെ. കരുണാകരന്‍, എ.കെ ആന്റണി സര്‍ക്കാരുകളില്‍ മന്ത്രിയായി ധനകാര്യം, ആഭ്യന്തരം, തൊഴില്‍ എന്നീ വകുപ്പുകള്‍ വഹിച്ചിട്ടുണ്ട്.

2018ലാണ് ചാണ്ടി എ.ഐ.സി.സി ജനറല്‍ സെക്രട്ടറിയായത്. 2006 മുതല്‍ 2011 വരെ കേരള നിയമസഭയില്‍ പ്രതിപക്ഷ നേതാവായും അദ്ദേഹം സേവനമനുഷ്ഠിച്ചു. സംസ്ഥാന രാഷ്ട്രീയത്തില്‍ തുടരാനാണ് അദ്ദേഹം പലപ്പോഴും ഇഷ്ടപ്പെട്ടത്. 

ഭാര്യ മറിയാമ്മ ഉമ്മന്‍, മക്കള്‍: ചാണ്ടി ഉമ്മന്‍, മരിയ, അച്ചു.

Key Words: Oommen Chandy, passed away