ജ്ഞാനവാപി കേസ് സെപ്റ്റംബര്‍ 22ന് പരിഗണിക്കുമെന്ന് ജില്ലാ കോടതി

The district court agreed to hear a case filed by five women seeking permission to pray at the shrine located inside the Gyanvapi mosque

വാരാണസി : പ്രസിദ്ധമായ കാശി വിശ്വനാഥ ക്ഷേത്രത്തിന് സമീപമുള്ള ജ്ഞാനവാപി പള്ളിക്കുള്ളില്‍ സ്ഥിതിചെയ്യുന്ന ആരാധനാലയത്തില്‍ പ്രാര്‍ത്ഥിക്കാന്‍ അനുവദിക്കണമെന്ന് ആവശ്യപ്പെട്ട് അഞ്ച് സ്ത്രീകള്‍ സമര്‍പ്പിച്ച കേസ് പരിഗണിക്കാമെന്ന് ജില്ലാ കോടതി സമ്മതിച്ചു. സ്ത്രീകളുടെ ഹര്‍ജി സെപ്റ്റംബര്‍ 22ന് പരിഗണിക്കും.

മസ്ജിദ് സമുച്ചയത്തിന്റെ ഒരു ഭാഗത്ത് ഒരു വര്‍ഷം നീണ്ടുനില്‍ക്കുന്ന പൂജയ്ക്കും ആചാരാനുഷ്ഠാനങ്ങള്‍ക്കും അനുമതി വേണമെന്നതാണ് സ്ത്രീകളുടെ പ്രധാന ആവശ്യങ്ങളിലൊന്ന്.

സമുച്ചയത്തില്‍ ഹിന്ദു ദേവീദേവന്മാരുടെ വിഗ്രഹങ്ങളുണ്ടെന്നും ഹര്‍ജിക്കാര്‍ പറയുന്നു.

ഹര്‍ജി തള്ളിക്കളയണമെന്നും സുപ്രീം കോടതി വരെ പോരാടാന്‍ തയ്യാറാണെന്നും മസ്ജിദ് അഡ്മിനിസ്‌ട്രേറ്റര്‍മാര്‍ വ്യക്തമാക്കി. ഹര്‍ജിക്കാര്‍ സ്ഥലത്തിന്റെ ഉടമസ്ഥാവകാശം ആവശ്യപ്പെടുന്നില്ലെന്നും ആരാധനയ്ക്കുള്ള അവകാശം മാത്രമേ ചോദിക്കുന്നുള്ളൂ എന്നതിനാല്‍ കേസ് പരിഗണിക്കാതിരിക്കാനാവില്ലെന്ന്  കോടതി പറഞ്ഞു.

നൂറ്റാണ്ടുകള്‍ പഴക്കമുള്ള മസ്ജിദിന്റെ ഉള്‍വശം വീഡിയോയില്‍ പകര്‍ത്താന്‍ നേരത്തേ കീഴ്‌ക്കോടതി നിര്‍ദ്ദേശിച്ചിരുന്നു. മസ്ജിദിലെ കുളത്തില്‍ ശിവലിംഗ്ം ഉള്ളതായി ഇത്തരത്തില്‍ ചിത്രീകരിച്ച വീഡിയോയിലെ ചില ഭാഗങ്ങള്‍ ചോര്‍ന്നതില്‍ നിന്നു വ്യക്തമായിരുന്നു. ഇതും വലിയ വിവാദത്തിലേക്കു വഴിവച്ചിരുന്നു.

തുടര്‍ന്ന് കീഴ്‌കോടതി കുളം മുദ്രവച്ചിരുന്നു. മസ്ജിദില്‍ 20 പേര്‍ക്ക് മാത്രമായി ഒത്തുചേരലുകള്‍  പരിമിതപ്പെടുത്തണമെന്നും കീഴ്‌ക്കോടതി ഉത്തരവിട്ടിരുന്നു.

ഇതേസമയം, 1991ലെ ആരാധനാലയ നിയമം ലംഘിച്ചുകൊണ്ട് പള്ളിക്കുള്ളില്‍ വീഡിയോ ചിത്രീകരിച്ചതിനെ മസ്ജിദ് കമ്മിറ്റി സുപ്രീം കോടതിയില്‍ ചോദ്യം ചെയ്തിരുന്നു. കീഴ്‌ക്കോടതി നടപടി സാമുദായിക ഐക്യത്തെ ബാധിക്കുമെന്നു പള്ളിക്കമ്മിറ്റി ചൂണ്ടിക്കാട്ടിയതിനെ തുടര്‍ന്നാണ് സുപ്രീം കോടതി കേസ് ജില്ലാ കോടതിയിലേക്കു മാറ്റാന്‍ ഉത്തരവിട്ടത്. 

സുപ്രീം കോടതി ഇടപെട്ട് കേസ് ജില്ലാ കോടതിയിലെ  ഏറ്റവും മുതിര്‍ന്ന ജഡ്ജിയെ ഏല്‍പ്പിക്കുകയായിരുന്നു. പ്രധാനമന്ത്രി നരേന്ദ്ര മോഡിയുടെ മണ്ഡലത്തില്‍ (വാരാണസി) സ്ഥിതി ചെയ്യുന്ന ജ്ഞാനവാപി പള്ളി, ക്ഷേത്രങ്ങളുടെ അവശിഷ്ടങ്ങളില്‍ പണിതതാണെന്ന് ഹിന്ദു മതവിശ്വാസികള്‍ വിശ്വസിക്കുന്നു.

1980 കളിലും 90 കളിലും അയോധ്യയ്ക്കും മഥുരയ്ക്കും പുറമെ ബിജെപി ഉയര്‍ത്തിയ, ദേശീയ പ്രാധാന്യം നേടിയ, മൂന്ന് ക്ഷേത്ര-പള്ളി നിരകളില്‍ ഒന്നാണിത്.

Summary: The district court agreed to hear a case filed by five women seeking permission to pray at the shrine located inside the Gyanvapi mosque near the renouned Kashi Viswanatha temple.