ചെങ്ങന്നൂര്: സര്ക്കാരിന്റെ മദ്യനയത്തിനെതിരെ ചെങ്ങന്നൂരില് ക്രൈസ്തവ സഭകള് രംഗത്തെത്തി. മദ്യവ്യാപാരികളെ പ്രോത്സാഹിപ്പിക്കുന്ന സര്ക്ക...
ചെങ്ങന്നൂര്: സര്ക്കാരിന്റെ മദ്യനയത്തിനെതിരെ ചെങ്ങന്നൂരില് ക്രൈസ്തവ സഭകള് രംഗത്തെത്തി. മദ്യവ്യാപാരികളെ പ്രോത്സാഹിപ്പിക്കുന്ന സര്ക്കാരിന്റെ സമീപനം ജനസേവനമല്ലെന്ന് മാര് ജോസഫ് പെരുന്തോട്ടം കുറ്റപ്പെടുത്തി. മദ്യ ഉപയോഗം കുറക്കുമെന്ന് പറഞ്ഞ് അധികാരത്തില് വന്നവര് ജനങ്ങളെ കബളിപ്പിക്കുകയായിരുന്നെന്നും അദ്ദേഹം പറഞ്ഞു. കെ.സി.ബി.സി മദ്യവിരുദ്ധ സമിതിയുടെ ആഭിമുഖ്യത്തിലായിരുന്നു ചെങ്ങന്നൂരില് മദ്യവിരുദ്ധ വിശാല സഖ്യമെന്ന പേരില് യോഗം ചേര്ന്നത്.
കൂടുതല് ബാറുകള് തുറക്കാനുള്ള തീരുമാനത്തിന് ചെങ്ങന്നൂര് ഉപതെരഞ്ഞെടുപ്പില് മറുപടി നല്കുമെന്ന് കെ.സി.ബി.സി മദ്യവിരുദ്ധ സമിതി നേരത്തെ പറഞ്ഞിരുന്നു. ഇതിന് പിന്നാലെയാണ് ഈ യോഗം ചേര്ന്നത്. മലങ്കര കത്തോലിക്കാ സഭ പത്തനംതിട്ട ഭദ്രാസനാധിപന് യുഹാനോന് മാര് ക്രിസോസ്റ്റവും യോഗത്തില് പങ്കെടുത്തു.
എന്നാല് പ്രബല വിഭാഗമായ ഓര്ത്തഡോക്സ് സഭ യോഗത്തില്നിന്ന് വിട്ടുനിന്നത് ശ്രദ്ധേയമായി. മറ്റ് ചില തിരക്കുകളുള്ളതിനാല് പങ്കെടുക്കാനായില്ലെന്നാണ് ചെങ്ങന്നൂര് ഭദ്രാസനാധിപന് തോമസ് മാര് അത്തനാസിയോസിന്റെ വിശദീകരണം.
അതേസമയം മദ്യ വിരുദ്ധ വിശാല സഖ്യത്തിന്റെ ഈ യോഗത്തിന് പിന്നില് രാഷ്ട്രീയം സംശയിക്കുന്നുവെന്നും ഇത് ജനങ്ങള് വിലയിരുത്തുമെന്നും ഇതിന് പിന്നിലെ വാസ്തവം തിരിച്ചറിയുമെന്നുമായിരുന്നു സി.പി.എം ചെങ്ങന്നൂര് ഏരിയ കമ്മിറ്റിയുടെ പ്രതികരണം.
COMMENTS