സംസ്ഥാനത്ത് ഇന്നും ഭാഗിക വൈദ്യുതി നിയന്ത്രണത്തിന് സാധ്യത; പീക്ക് സമയങ്ങളിൽ നിയന്ത്രണം കടുക്കും

തിരുവനന്തപുരം: സംസ്ഥാനത്ത് നിലവിലുള്ള വൈദ്യുതി പ്രതിസന്ധി പൂർണ്ണമായി പരിഹരിക്കപ്പെടാത്ത സാഹചര്യത്തിൽ ഇന്നും (സെപ്റ്റംബർ 18) ഭാഗികമായി വൈദ്യു...

തിരുവനന്തപുരം: സംസ്ഥാനത്ത് നിലവിലുള്ള വൈദ്യുതി പ്രതിസന്ധി പൂർണ്ണമായി പരിഹരിക്കപ്പെടാത്ത സാഹചര്യത്തിൽ ഇന്നും (സെപ്റ്റംബർ 18) ഭാഗികമായി വൈദ്യുതി നിയന്ത്രണം ഏർപ്പെടുത്തിയേക്കുമെന്ന് കെ.എസ്.ഇ.ബി അറിയിച്ചു. നാഷണൽ ലോഡ് ഡെസ്പാച്ച് സെന്ററിന്റെ നിർദ്ദേശപ്രകാരം, ഗ്രിഡ് സുരക്ഷിതത്വം ഉറപ്പാക്കുന്നതിനായി ആവശ്യാനുസരണം ചെറിയ തോതിലുള്ള നിയന്ത്രണങ്ങൾ ഏർപ്പെടുത്താനാണ് കെ.എസ്.ഇ.ബി തീരുമാനം.

വൈകുന്നേരം 06:15 മുതൽ അർദ്ധരാത്രി 12:45 വരെയുള്ള സമയങ്ങളിലാണ് വൈദ്യുതി നിയന്ത്രണം ആവശ്യമായി വന്നേക്കുക. എന്നാൽ മുൻകാലങ്ങളിലെപ്പോലെ വ്യാപകമായ ലോഡ്ഷെഡ്ഡിംഗിന് പകരം, പ്രസരണ ശൃംഖലയിലെ ഓവർലോഡ് ഒഴിവാക്കാൻ പ്രാദേശികമായി 15 മുതൽ 30 മിനിറ്റ് വരെയുള്ള ചെറിയ നിയന്ത്രണങ്ങൾ മാത്രമായിരിക്കും ഏർപ്പെടുത്തുകയെന്ന് അധികൃതർ വ്യക്തമാക്കിയിട്ടുണ്ട്. 

ആശുപത്രികൾ അടക്കമുള്ള അത്യാവശ്യ സേവനങ്ങളെ ഇതിൽ നിന്ന് പരമാവധി ഒഴിവാക്കും. എൽനിനോ പ്രതിഭാസം മൂലമുണ്ടായ കടുത്ത മഴക്കുറവ് കാരണം ഡാമുകളിലെ ജലനിരപ്പ് താഴ്ന്നതാണ് ആഭ്യന്തര ഉൽപ്പാദനത്തെ ബാധിച്ചത്. ഇതിന് പുറമെ രാജ്യവ്യാപകമായുള്ള ഗ്രിഡ് ദൗർലഭ്യം മൂലവും പവർ എക്സ്ചേഞ്ച് വഴി ആവശ്യത്തിന് വൈദ്യുതി ലഭ്യമാകാത്തതുമാണ് നിലവിലെ കടുത്ത പ്രതിസന്ധിക്ക് കാരണമായി ചൂണ്ടിക്കാണിക്കപ്പെടുന്നത്.

വൈദ്യുതി ഉപഭോഗം ഏറ്റവും കൂടുതലുള്ള പീക്ക് സമയങ്ങളിൽ (പ്രത്യേകിച്ച് രാത്രി 7 മണി മുതൽ 11 മണി വരെ) അയൺ ബോക്സ്, വാഷിംഗ് മെഷീൻ, പമ്പ് സെറ്റ്, എയർ കണ്ടീഷണർ തുടങ്ങിയ ഹൈ-വോൾട്ടേജ് ഉപകരണങ്ങളുടെ ഉപയോഗം പരമാവധി കുറയ്ക്കണമെന്ന് കെ.എസ്.ഇ.ബി ഉപഭോക്താക്കളോട് അഭ്യർത്ഥിച്ചു. അനാവശ്യമായ ലൈറ്റുകളും മറ്റ് ഉപകരണങ്ങളും ഓഫ് ചെയ്ത് നിലവിലെ പ്രതിസന്ധി മറികടക്കാൻ ജനങ്ങൾ സഹകരിക്കണമെന്നും അധികൃതർ അറിയിച്ചു.

Key Words : Power Cut, KSEB