വിദ്യാർത്ഥി പ്രതിഷേധത്തിന് നേരെ എകെ-47 ഉപയോഗിച്ച് വെടിയുതിർത്ത ബിഹാർ പൊലീസ് കോൺസ്റ്റബിളിന് സസ്പെൻഷൻ

പട്ന: നീറ്റ് പരീക്ഷാ ക്രമക്കേടുകൾക്കെതിരെ ബിഹാറിൽ നടന്ന വിദ്യാർത്ഥി പ്രതിഷേധത്തിനിടെ സമരക്കാർക്ക് നേരെ എകെ-47 റൈഫിൾ ഉപയോഗിച്ച് വെടിയുതിർത്ത ...

പട്ന: നീറ്റ് പരീക്ഷാ ക്രമക്കേടുകൾക്കെതിരെ ബിഹാറിൽ നടന്ന വിദ്യാർത്ഥി പ്രതിഷേധത്തിനിടെ സമരക്കാർക്ക് നേരെ എകെ-47 റൈഫിൾ ഉപയോഗിച്ച് വെടിയുതിർത്ത പൊലീസ് കോൺസ്റ്റബിളിനെ സർവീസിൽ നിന്ന് സസ്പെൻഡ് ചെയ്തു. പ്രത്യേക അന്വേഷണ സംഘത്തിലെ അംഗമായ അഭിഷേക് പട്ടേലിനെതിരെയാണ് ബിഹാർ പൊലീസ് ആസ്ഥാനം അടിയന്തര അച്ചടക്ക നടപടി സ്വീകരിച്ചത്. ജൂലൈ 25ന് സിവാൻ ജില്ലയിൽ നടന്ന പ്രതിഷേധത്തിനിടെ ഇയാൾ തോക്കുപയോഗിക്കുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതിനെത്തുടർന്നാണ് നടപടി.

നീറ്റ് ചോദ്യപേപ്പർ ചോർച്ചയ്ക്കെതിരെ വിവിധ വിദ്യാർത്ഥി സംഘടനകളും പ്രതിപക്ഷ പാർട്ടികളും ആഹ്വാനം ചെയ്ത 'ബിഹാർ ബന്ദ്' പ്രതിഷേധത്തിനിടെയാണ് സംഘർഷമുണ്ടായത്. കോൺസ്റ്റബിൾ അഭിഷേക് പട്ടേൽ ആദ്യം ആകാശത്തേക്കും പിന്നീട് പ്രതിഷേധക്കാർക്ക് നേരെയും എകെ-47 ഉപയോഗിച്ച് ആറ് റൗണ്ടോളം വെടിയുതിർത്തതായാണ് റിപ്പോർട്ട്. ഔദ്യോഗിക പ്രോട്ടോക്കോൾ ലംഘിച്ചാണോ മാരകായുധം ഉപയോഗിച്ചതെന്ന് കണ്ടെത്താൻ വിശദമായ വകുപ്പുതല അന്വേഷണത്തിന് ഉത്തരവിട്ടിട്ടുണ്ട്.

സംഘർഷത്തിനിടെ 15 വയസ്സുകാരൻ ഉൾപ്പെടെ മൂന്ന് പേർക്ക് വെടിയേറ്റ് പരിക്കേറ്റു. നിലവിൽ പട്നയിലെ ആശുപത്രിയിൽ ചികിത്സയിലുള്ള ഇവരുടെ ആരോഗ്യനില തൃപ്തികരമാണ്. സിവാൻ എസ്പി പുരൻ കുമാർ ഝായ്ക്കും ഏതാനും മാധ്യമപ്രവർത്തകർക്കും കല്ലേറിൽ പരിക്കേറ്റിട്ടുണ്ട്.അറസ്റ്റ്: അക്രമസംഭവങ്ങളുമായി ബന്ധപ്പെട്ട് പൊലീസ് നിരവധി എഫ്‌ഐആറുകൾ രജിസ്റ്റർ ചെയ്യുകയും സംസ്ഥാനത്തുടനീളം നാനൂറിലധികം പ്രതിഷേധക്കാരെ അറസ്റ്റ് ചെയ്യുകയും ചെയ്തു.

വിദ്യാർത്ഥികൾക്ക് നേരെ എകെ-47 ഉപയോഗിച്ച നടപടിയെ ബിഹാർ പ്രതിപക്ഷ നേതാവ് തേജസ്വി യാദവ് ശക്തമായി അപലപിച്ചു. നിരായുധരായ വിദ്യാർത്ഥികൾക്ക് നേരെ മാരകായുധങ്ങൾ ഉപയോഗിക്കുന്നത് ജനാധിപത്യ വിരുദ്ധമാണെന്ന് രാഹുൽ ഗാന്ധിയും വിമർശിച്ചു.

Key Words : Bihar Police, AK-47