'ഒരു പൂവ് മോഹിച്ചവന് പൂങ്കാവ് തന്നു മുഖ്യമന്ത്രി'; വി.ഡി സതീശനെ പ്രശംസ കൊണ്ട് മൂടി മല്ലിക സുകുമാരൻ!

തിരുവനന്തപുരം: സംസ്ഥാന ബജറ്റിൽ മലയാള ചലച്ചിത്ര മേഖലയ്ക്കായി പ്രഖ്യാപിച്ച ചരിത്രപരമായ വികസന പദ്ധതികളെ അഭിനന്ദിച്ച് പ്രമുഖ ചലച്ചിത്ര നടി മല്ലി...

തിരുവനന്തപുരം: സംസ്ഥാന ബജറ്റിൽ മലയാള ചലച്ചിത്ര മേഖലയ്ക്കായി പ്രഖ്യാപിച്ച ചരിത്രപരമായ വികസന പദ്ധതികളെ അഭിനന്ദിച്ച് പ്രമുഖ ചലച്ചിത്ര നടി മല്ലിക സുകുമാരൻ. വി.ഡി. സതീശൻ സർക്കാരിന്റെ പ്രഖ്യാപനങ്ങൾ സിനിമാ വ്യവസായത്തിന് വലിയൊരു ആശ്വാസവും പ്രതീക്ഷയുമാണ് നൽകുന്നതെന്ന് അവർ വ്യക്തമാക്കി. "ഒരു പൂവ് മോഹിച്ചവന് ഒരു പൂങ്കാവ് ലഭിച്ച സന്തോഷമാണ് ബഹുമാനപ്പെട്ട മുഖ്യമന്ത്രി നൽകിയത്" എന്ന് മല്ലിക സുകുമാരൻ തന്റെ ഫേസ്ബുക്ക് കുറിപ്പിൽ കുറിച്ചു.

ചലച്ചിത്ര മേഖലയിലെ വിവിധ പ്രവർത്തന രംഗങ്ങളെ ഉപജീവനമാക്കി അദ്ധ്വാനിക്കുന്ന ആയിരക്കണക്കിന് സാധാരണക്കാരായ കലാകാരന്മാർക്ക് ഏറെ ആത്മവിശ്വാസവും അഭിമാനവും തോന്നിയ ദിവസമാണിതെന്ന് അവർ ചൂണ്ടിക്കാട്ടി. സിനിമയ്ക്ക് ഔദ്യോഗികമായി വ്യാവസായിക പദവി നൽകിയതും കൊച്ചിയിൽ അന്താരാഷ്ട്ര ഫിലിം സിറ്റി സ്ഥാപിക്കാനുള്ള തീരുമാനവും മലയാള സിനിമയുടെ ചരിത്രത്തിൽ പുതിയൊരു അധ്യായം കുറിക്കുമെന്നും അവർ കൂട്ടിച്ചേർത്തു.

മലയാള സിനിമയുടെ പുരോഗതിക്കായി ക്രിയാത്മകമായ നടപടികൾ സ്വീകരിച്ച മുഖ്യമന്ത്രി വി.ഡി. സതീശനും സാംസ്കാരിക വകുപ്പ് മന്ത്രി പി.സി. വിഷ്ണുനാഥിനും ചലച്ചിത്ര ലോകത്തിന്റെ പേരിലുള്ള നന്ദിയും അഭിനന്ദനങ്ങളും അവർ അറിയിച്ചിട്ടുണ്ട്.സിനിമയെ ഒരു വ്യവസായമായി അംഗീകരിച്ച സർക്കാർ തീരുമാനത്തെ സ്വാഗതം ചെയ്ത് നടൻ മോഹൻലാൽ ഉൾപ്പെടെയുള്ള ചലച്ചിത്ര രംഗത്തെ പ്രമുഖരും ഇതിനോടകം രംഗത്തെത്തിയിട്ടുണ്ട്. 

Key Words : Mallika Sukumaran , VD satheesan, Kerala Budget