ഇന്ത്യൻ കരസേനയ്ക്ക് പുതിയ മേധാവി; ധീരജ് സേത്ത് ജൂൺ 30ന് ചുമതലയേൽക്കും

ന്യൂഡൽഹി: പുതിയ കരസേന മേധാവിയായി ലഫ്റ്റനന്റ് ജനറൽ ധീരജ് സേത്ത് നിയമിതനായി. 2026 ജൂൺ 30-ന് അദ്ദേഹം കരസേന മേധാവിയായി ചുമതലയേൽക്കും. നിലവിൽ കരസ...

ന്യൂഡൽഹി: പുതിയ കരസേന മേധാവിയായി ലഫ്റ്റനന്റ് ജനറൽ ധീരജ് സേത്ത് നിയമിതനായി. 2026 ജൂൺ 30-ന് അദ്ദേഹം കരസേന മേധാവിയായി ചുമതലയേൽക്കും. നിലവിൽ കരസേന ഉപമേധാവിയായി സേവനമനുഷ്ഠിക്കുകയാണ് ലഫ്റ്റനന്റ് ജനറൽ ധീരജ് സേത്ത്. 

ജൂൺ 30-ന് നിലവിലെ മേധാവിയായ ജനറൽ ഉപേന്ദ്ര ദ്വിവേദി സർവീസിൽ നിന്ന് വിരമിക്കുന്നതോടെയാണ് പുതിയ നിയമനം നിലവിൽ വരുന്നത്. നാഷണൽ ഡിഫൻസ് അക്കാദമിയിലെ പൂർവവിദ്യാർത്ഥിയായ ധീരജ് സേത്ത് 1986 ഡിസംബറിലാണ് ഇന്ത്യൻ സൈന്യത്തിന്റെ ആർമഡ് കോർപ്സിൽ കമ്മീഷൻ നേടിയത്. 

നാല് പതിറ്റാണ്ടിലേറെ നീണ്ട സൈനിക ജീവിതത്തിനിടെ രാജ്യത്തിന്റെ വിവിധ തന്ത്രപ്രധാന മേഖലകളിൽ അദ്ദേഹം നിർണായക ചുമതലകൾ വഹിച്ചിട്ടുണ്ട്. മരുഭൂമിയിലെ ആർമഡ് റെജിമെന്റിനും വെസ്റ്റേൺ തിയേറ്ററിലെ ആർമഡ് ബ്രിഗേഡിനും ജമ്മു-കശ്മീരിലെ കൗണ്ടർ ഇൻസർജൻസി സേനയ്ക്കും നേതൃത്വം നൽകിയ അനുഭവസമ്പത്താണ് അദ്ദേഹത്തിനുള്ളത്. 

പിന്നീട് സുദർശൻ ചക്ര കോർപ്സിന്റെ കമാൻഡറായും ഡൽഹി ഏരിയ ജനറൽ ഓഫീസർ കമാൻഡിംഗായും സേവനമനുഷ്ഠിച്ചു. സതേൺ കമാൻഡും സൗത്ത് വെസ്റ്റേൺ കമാൻഡും ഉൾപ്പെടെ രണ്ട് പ്രധാന ഓപ്പറേഷണൽ കമാൻഡുകൾക്ക് നേതൃത്വം നൽകിയ അപൂർവ നേട്ടവും അദ്ദേഹത്തിന്റെ കരിയറിന്റെ ഭാഗമാണ്. സൈന്യത്തിന്റെ ആധുനികവൽക്കരണത്തിലും ദീർഘകാല തന്ത്രപരമായ പദ്ധതികൾ രൂപപ്പെടുത്തുന്നതിലും ധീരജ് സേത്ത് നിർണായക പങ്കുവഹിച്ചിട്ടുണ്ട്. 

സ്ട്രാറ്റജിക് പ്ലാനിങ്, കപ്പബിലിറ്റി ഡെവലപ്‌മെന്റ് വിഭാഗങ്ങളിലെ പ്രവർത്തനങ്ങളിലൂടെ സൈനിക ആവശ്യങ്ങളും ആധുനിക സാങ്കേതികവിദ്യകളും തമ്മിലുള്ള ഏകോപനം ശക്തിപ്പെടുത്തുന്നതിൽ അദ്ദേഹം ശ്രദ്ധേയനായി. പാരീസിലെ കമാൻഡ് ആൻഡ് സ്റ്റാഫ് കോഴ്‌സ്, ഹയർ കമാൻഡ് കോഴ്‌സ്, നാഷണൽ ഡിഫൻസ് കോളേജ് എന്നിവ വിജയകരമായി പൂർത്തിയാക്കിയ ധീരജ് സേത്ത്, ഇന്ത്യൻ സൈന്യത്തിന്റെ ഭാവി ദിശ നിർണയിക്കുന്ന നേതാക്കളിൽ ഒരാളായാണ് വിലയിരുത്തപ്പെടുന്നത്.

key words : Indian Army, Dheeraj Seth