ചമ്പക്കുളം മൂലം ജലോത്സവം: നവാഗതനായ അരോമ ചുണ്ടന് രാജപ്രമുഖൻ ട്രോഫി; വള്ളംകളി സീസണിന് ആവേശകരമായ തുടക്കം

ആലപ്പുഴ : കേരളത്തിന്റെ ഈ വർഷത്തെ വള്ളംകളി സീസണിന് ആവേശകരമായ തുടക്കം കുറിച്ചുകൊണ്ട് പമ്പാനദിയിൽ നടന്ന പ്രശസ്തമായ ചമ്പക്കുളം മൂലം ജലോത്സവത്തിൽ...

ആലപ്പുഴ : കേരളത്തിന്റെ ഈ വർഷത്തെ വള്ളംകളി സീസണിന് ആവേശകരമായ തുടക്കം കുറിച്ചുകൊണ്ട് പമ്പാനദിയിൽ നടന്ന പ്രശസ്തമായ ചമ്പക്കുളം മൂലം ജലോത്സവത്തിൽ അരോമ ചുണ്ടൻ കിരീടം ചൂടി. ഫൈനലിൽ ശക്തരായ എതിരാളികളെ പിന്നിലാക്കി അരോമ ബോട്ട് ക്ലബ് തുഴഞ്ഞ അരോമ ചുണ്ടൻ അഭിമാനകരമായ രാജപ്രമുഖൻ ട്രോഫി സ്വന്തമാക്കി. രഞ്ജിത്ത് സജീവന്റെ ക്യാപ്റ്റൻസിയിലാണ് അരോമ ചുണ്ടൻ കന്നിയങ്കത്തിൽത്തന്നെ വിജയകിരീടം ചൂടിയത്. 

പ്രശസ്ത ശില്പി സാബു നാരായണൻ ആശാരിയുടെ മേൽനോട്ടത്തിൽ ഈ വർഷം പുതിയതായി നിർമ്മിച്ച വള്ളമാണ് അരോമ ചുണ്ടൻ എന്നത് ഈ വിജയത്തിന്റെ തിളക്കം കൂട്ടുന്നു.

ഫൈനൽ മത്സരത്തിൽ മൂന്നാം ട്രാക്കിലൂടെ കുതിച്ചുപാഞ്ഞ നടുഭാഗം ചുണ്ടൻ രണ്ടാം സ്ഥാനവും, ഒന്നാം ട്രാക്കിൽ തുഴഞ്ഞെത്തിയ നടുവിലെ പറമ്പൻ ചുണ്ടൻ മൂന്നാം സ്ഥാനവും കരസ്ഥമാക്കി. പമ്പയാറ്റിലെ ഓളപ്പരപ്പിൽ ആകെ 7 ചുണ്ടൻ വള്ളങ്ങൾ ഉൾപ്പെടെ 14 കളിവള്ളങ്ങളാണ് ഇത്തവണ മാറ്റുരച്ചത്.സാംസ്‌കാരിക വകുപ്പ് മന്ത്രി പി. സി. വിഷ്ണുനാഥ് ജലോത്സവം ഉദ്ഘാടനം ചെയ്തു. ജില്ലാ കളക്ടർ ഷാജി വി. നായർ പതാക ഉയർത്തുകയും, ജില്ലാ പോലീസ് മേധാവി ടി. കെ. വിഷ്ണു പ്രദീപ് പരമ്പരാഗത ജലഘോഷയാത്ര ഫ്ലാഗ് ഓഫ് ചെയ്യുകയും ചെയ്തു. 

കുട്ടനാട് താലൂക്കിൽ പ്രാദേശിക അവധി പ്രഖ്യാപിക്കാത്തതുമായി ബന്ധപ്പെട്ട് ഉയർന്ന രാഷ്ട്രീയ വിവാദങ്ങൾ നിലനിന്നിരുന്നെങ്കിലും, അതൊന്നും വള്ളംകളി പ്രേമികളുടെ ആവേശത്തെ ബാധിച്ചില്ല. കനത്ത സുരക്ഷാ ക്രമീകരണങ്ങൾക്കിടയിലും ആയിരക്കണക്കിന് ജനങ്ങളാണ് പമ്പാനദിയുടെ ഇരുതീരങ്ങളിലുമായി മത്സരം കാണാൻ തടിച്ചുകൂടിയത്.

Key Words : Champakulam Moolam Boat Race, Aroma Chundan, Rajapramukhan Trophy