ബിജെപി നേതാവ് എൻ. ഹരി റബർ ബോർഡ് ചെയർമാൻ

കോട്ടയം: ബിജെപി മധ്യമേഖലാ പ്രസിഡന്റും റബർ ബോർഡ് അംഗവുമായ എൻ. ഹരിയെ റബർ ബോർഡ് ചെയർമാനായി കേന്ദ്ര സർക്കാർ നിയമിച്ചു. മൂന്ന് വർഷത്തേക്കാണ് നിയമ...

കോട്ടയം: ബിജെപി മധ്യമേഖലാ പ്രസിഡന്റും റബർ ബോർഡ് അംഗവുമായ എൻ. ഹരിയെ റബർ ബോർഡ് ചെയർമാനായി കേന്ദ്ര സർക്കാർ നിയമിച്ചു. മൂന്ന് വർഷത്തേക്കാണ് നിയമനം. 

ഇതുസംബന്ധിച്ച കേന്ദ്ര വാണിജ്യ മന്ത്രാലയത്തിന്റെ ഔദ്യോഗിക ഉത്തരവ് പുറത്തിറങ്ങി.റബർ ബോർഡിന്റെ ചരിത്രത്തിൽ ആദ്യമായാണ് ഒരു രാഷ്ട്രീയ നേതാവ് ചെയർമാൻ പദവിയിലേക്ക് നേരിട്ട് നിയമിതനാകുന്നത്. കഴിഞ്ഞ രണ്ട് വർഷമായി അദ്ദേഹം റബർ ബോർഡ് അംഗമായി പ്രവർത്തിച്ചുവരികയായിരുന്നു.

മുൻ ചെയർമാൻ ഡോ. സവാർ ധനാനിയ ഒഴിഞ്ഞതിനെ തുടർന്ന് കഴിഞ്ഞ 18 മാസമായി റബർ ബോർഡിന് സ്ഥിരം ചെയർമാൻ ഉണ്ടായിരുന്നില്ല. ഈ കാലയളവിൽ കേന്ദ്ര വാണിജ്യ മന്ത്രാലയത്തിലെ ഉദ്യോഗസ്ഥർക്കായിരുന്നു താൽക്കാലിക ചുമതല. ഇതിനാണ് ഇപ്പോൾ തീരുമാനമായിരിക്കുന്നത്.

ദീർഘകാലം ബിജെപി കോട്ടയം ജില്ലാ പ്രസിഡന്റായിരുന്ന എൻ. ഹരി കോട്ടയം പള്ളിക്കത്തോട് (ആനിക്കാട്) സ്വദേശിയാണ്. നിയമസഭാ തെരഞ്ഞെടുപ്പുകളിൽ കോട്ടയം, പുതുപ്പള്ളി മണ്ഡലങ്ങളിൽ ബിജെപി സ്ഥാനാർത്ഥിയായി മത്സരിച്ചിട്ടുണ്ട്. കോട്ടയം ആസ്ഥാനമായാണ് കേന്ദ്ര വാണിജ്യ വ്യവസായ മന്ത്രാലയത്തിന് കീഴിലുള്ള റബർ ബോർഡ് പ്രവർത്തിക്കുന്നത്.

Key Words : BJP ,  N. Hari, Rubber Board Chairman