ഇറാനിലേക്കുള്ള അനാവശ്യ യാത്രകൾ ഒഴിവാക്കണം: പുതുക്കിയ ജാഗ്രതാ നിർദേശവുമായി ഇന്ത്യൻ എംബസി

ന്യൂഡൽഹി: പശ്ചിമേഷ്യയിലെ നിലവിലെ സുരക്ഷാ സാഹചര്യങ്ങൾ മുൻനിർത്തി ഇറാനിലേക്കുള്ള അനാവശ്യ യാത്രകൾ ഇന്ത്യൻ പൗരന്മാർ പൂർണമായും ഒഴിവാക്കണമെന്ന് ടെ...

ന്യൂഡൽഹി: പശ്ചിമേഷ്യയിലെ നിലവിലെ സുരക്ഷാ സാഹചര്യങ്ങൾ മുൻനിർത്തി ഇറാനിലേക്കുള്ള അനാവശ്യ യാത്രകൾ ഇന്ത്യൻ പൗരന്മാർ പൂർണമായും ഒഴിവാക്കണമെന്ന് ടെഹ്‌റാനിലെ ഇന്ത്യൻ എംബസി ആവശ്യപ്പെട്ടു. 

സുരക്ഷാ ക്രമീകരണങ്ങളിൽ നേരിയ പുരോഗതിയുണ്ടെങ്കിലും ഇനിയൊരു അറിയിപ്പ് ഉണ്ടാകുന്നത് വരെ ജാഗ്രത തുടരണമെന്നാണ് പുതുക്കിയ യാത്രാ നിർദേശത്തിൽ വ്യക്തമാക്കുന്നത്.

നിലവിൽ ഇറാനിൽ താമസിക്കുന്ന എല്ലാ ഇന്ത്യൻ പൗരന്മാരും കടുത്ത ജാഗ്രത പാലിക്കണമെന്ന് എംബസി അറിയിച്ചു. പ്രാദേശിക ഭരണകൂടങ്ങൾ നൽകുന്ന സുരക്ഷാ നിർദേശങ്ങൾ കർശനമായി പാലിക്കണം. സുരക്ഷാ പ്രശ്നങ്ങളുള്ളതോ പ്രതിഷേധങ്ങൾ നടക്കുന്നതോ ആയ സ്ഥലങ്ങളിൽ നിന്ന് ഇന്ത്യൻ പൗരന്മാർ പൂർണമായും മാറിനിൽക്കണം.

ഇറാനിൽ തുടരുന്ന, ഇതുവരെ ഇന്ത്യൻ എംബസിയിൽ പേര് വിവരങ്ങൾ റജിസ്റ്റർ ചെയ്യാത്ത പൗരന്മാർ എത്രയും വേഗം റജിസ്ട്രേഷൻ നടപടികൾ പൂർത്തിയാക്കണമെന്നും നിർദേശമുണ്ട്. അടിയന്തര സാഹചര്യങ്ങളിൽ സഹായത്തിനായി ഇന്ത്യൻ എംബസി പ്രത്യേക ഹെൽപ്‌ലൈൻ നമ്പറുകളും ഇമെയിൽ വിലാസവും പുറത്തുവിട്ടിട്ടുണ്ട്.

അടിയന്തര സഹായത്തിനുള്ള നമ്പറുകൾ:

ഫോൺ: +989128109115, +989128109109, +989128109102, +989932179359

ഇമെയിൽ: cons.tehran@mea.gov.in

ഏറ്റവും പുതിയ വിവരങ്ങൾക്കായി ഇന്ത്യൻ എംബസിയുടെ ഔദ്യോഗിക വെബ്‌സൈറ്റും സോഷ്യൽ മീഡിയ അക്കൗണ്ടുകളും സ്ഥിരമായി നിരീക്ഷിക്കാനും വിദേശകാര്യ മന്ത്രാലയം ജനങ്ങളോട് അഭ്യർത്ഥിച്ചു.

Key Words: Travel Advisory, Iran War