വിമാനം നിലതെറ്റി പതിച്ചത് ബി ജെ മെഡിക്കല്‍ കോളേജ് ആശുപത്രിയുടെ യുജി ഹോസ്റ്റല്‍ മെസ് കെട്ടിടത്തിനു മുകളില്‍, നിരവധി വിദ്യാര്‍ത്ഥികള്‍ക്കു പരിക്ക്

Air India plane crashed in Ahmedabad on top of the UG Hostel Mess building of BJ Medical College Hospital. Many children were in the mess

സ്വന്തം ലേഖകന്‍

അഹമ്മദാബാദ്: അഹമ്മദാബാദില്‍ എയര്‍ ഇന്ത്യ വിമാനം തകര്‍ന്നു വീണത് ബി ജെ മെഡിക്കല്‍ കോളേജ് ആശുപത്രിയുടെ യുജി ഹോസ്റ്റല്‍ മെസ് കെട്ടിടത്തിനു മുകളില്‍.

ദുരന്തം നടക്കുമ്പോള്‍ നിരവധി കുട്ടികള്‍ മെസ്സിലുണ്ടായിരുന്നു. ഉച്ച ഭക്ഷണ സമയമായതിനാല്‍ കുട്ടികള്‍ കൂടുതല്‍ എത്തിയിരുന്നു. വിമാനത്തിന്റെ ഒരു ചക്രം ഉള്‍പ്പെടുന്ന ഭാഗം കെട്ടിടത്തിനു മുകളില്‍ കുടുങ്ങിയ നിലയിലാണ്.

പരിക്കേറ്റ വിദ്യാര്‍ത്ഥികളെ അഹമ്മദാബാദിലെ സിവില്‍ ആശുപത്രിയില്‍ പ്രവേശിപ്പിച്ചു. കുട്ടികളാരും മരിച്ചതായി റിപ്പോര്‍ട്ടില്ല. വിമാനത്തിന്റെ പിന്‍ഭാഗം ഹോസ്റ്റലിന്റെ മുകളിലത്തെ നിലയില്‍ കുടുങ്ങിക്കിടക്കുകയാണ്. മറ്റു ചില യന്ത്രഭാഗങ്ങള്‍ അകത്തു കിടക്കുന്നതും കാണാം. ഉച്ചഭക്ഷണസമയത്ത് മേശപ്പുറത്ത് ഭക്ഷണം വിളമ്പി വച്ചിരിക്കുന്നതും കാണാം. കാന്റീനും കേടുപാടുണ്ട്. 

വിമാനം ഇടിച്ചിറങ്ങിയതോടെ റസിഡന്റ് ഡോക്ടര്‍മാരുടെ ഹോസ്റ്റല്‍ കെട്ടിടത്തിന്റെ ഒരു ഭാഗത്തിന് തീപിടിച്ചു. തീപിടിത്തത്തില്‍ അടുക്കളയ്ക്കും കേടുപാടുകള്‍ സംഭവിച്ചു. തീപിടിത്തത്തില്‍ സമീപത്തെ മരങ്ങള്‍ കരിഞ്ഞു.

ഇതേസമയം, വിമാനത്തില്‍ രണ്ടു മലയാളികള്‍ ഉണ്ടായിരുന്നുവെന്നു സ്ഥിരീകരിച്ചു. ഇവരില്‍ ഒരാള്‍ പത്തനംതിട്ട സ്വദേശിനിയാണ്. വിമാനത്തില്‍ 242 യാത്രക്കാരും ജീവനക്കാരും ഉണ്ടായിരുന്നു. ഇതില്‍ 169 പേര്‍ ഇന്ത്യക്കാരും 53 പേര്‍ ബ്രിട്ടീഷ് പൗരന്മാരുമാണ്. കൂടാതെ ഏഴ് പോര്‍ച്ചുഗീസ് പൗരന്മാരും ഒരു കനേഡിയനും ഉണ്ടായിരുന്നു.

Summary: An Air India plane crashed in Ahmedabad on top of the UG Hostel Mess building of BJ Medical College Hospital. Many children were in the mess when the tragedy happened.