നിത്യാനന്ദ മരിച്ചെന്ന അഭ്യൂഹങ്ങള്‍ ശരിയല്ലെന്ന് 'കൈലാസ', ഇന്ന് ഭക്തരെ അഭിസംബോധന ചെയ്യും

കൊച്ചി : വിവാദ സ്വയം പ്രഖ്യാപിത ആള്‍ദൈവം നിത്യാനന്ദ മരിച്ചെന്ന അഭ്യൂഹങ്ങള്‍ ശരിയല്ലെന്ന്, അദ്ദേഹം സ്ഥാപിച്ചതെന്ന് അവകാശപ്പെടുന്ന സ്വതന്ത്ര ര...

കൊച്ചി : വിവാദ സ്വയം പ്രഖ്യാപിത ആള്‍ദൈവം നിത്യാനന്ദ മരിച്ചെന്ന അഭ്യൂഹങ്ങള്‍ ശരിയല്ലെന്ന്, അദ്ദേഹം സ്ഥാപിച്ചതെന്ന് അവകാശപ്പെടുന്ന സ്വതന്ത്ര രാജ്യം 'കൈലാസ' വ്യക്തമാക്കി. നിത്യാനന്ദ ജീവത്യാഗം ചെയ്‌തെന്ന് അദ്ദേഹത്തിന്റെ സഹോദരീ പുത്രനും അനുയായിയുമായ സുന്ദരേശനാണു കഴിഞ്ഞ ദിവസം അറിയിച്ചത്. ഇതിനു പിന്നാലെയാണ് വിശദീകരണവുമായി കൈലാസ രംഗത്തെത്തിയത്. 

നിത്യാനന്ദ സുരക്ഷിതനാണെന്നും പ്രവര്‍ത്തനങ്ങളില്‍ സജീവമാണെന്നും സമൂഹ മാധ്യമത്തിലൂടെ അറിയിച്ചു. നിത്യാനന്ദ ഉഗാദി ആഘോഷത്തില്‍ പങ്കെടുത്തതിന്റെ ദൃശ്യങ്ങളും പുറത്തുവിട്ടു. നിത്യാനന്ദ ഇന്ന് ഭക്തരെ അഭിസംബോധന ചെയ്യുമെന്നും അറിയിച്ചു.

ഇന്ത്യയുടെ വിവിധ ഭാഗങ്ങളില്‍ ആശ്രമങ്ങളും ഒട്ടേറെ ശിഷ്യരുമുണ്ടായിരുന്ന നിത്യാനന്ദ 2019ലാണ് രാജ്യം വിട്ടത്. 3 മക്കളെ നിത്യാനന്ദ തട്ടിക്കൊണ്ടു പോയെന്ന തമിഴ്‌നാട് സ്വദേശികളുടെ പരാതിയില്‍ പൊലീസ് നടപടി ആരംഭിച്ചതിനെ തുടര്‍ന്നാണു മുങ്ങിയത്. 

യുവതിയുടെ പീഡന പരാതിയിലും ഇയാള്‍ക്കെതിരെ കേസുണ്ട്. നിലവില്‍, ലാറ്റിനമേരിക്കന്‍ രാജ്യമായ ഇക്വഡോറിന് സമീപമുള്ള ദ്വീപില്‍ 'കൈലാസ' എന്ന സ്ഥലത്ത് കഴിയുകയാണെന്നാണു സൂചന.

Key Words: 'Kailaasa' Nithyananda, Death, God Man