The BJP, under the leadership of Prime Minister Narendra Modi, has started a hasty move to form the third government in a row
അഭിനന്ദ്
ന്യൂഡല്‍ഹി: തുടര്‍ച്ചയായ മൂന്നാം സര്‍ക്കാര്‍ രൂപീകരിക്കാന്‍ പ്രധാനമന്ത്രി നരേന്ദ്ര മോഡിയുടെ നേതൃത്വത്തില്‍ ബിജെപി തിരക്കിട്ട നീക്കങ്ങളാരംഭിച്ചു.
അടുത്ത ആഴ്ച തന്നെ സത്യപ്രതിജ്ഞ നടത്താനാണ് ആലോചന. സത്യപ്രതിജ്ഞയ്ക്കുള്ള ഒരുക്കങ്ങള്‍ക്കായി രാഷ്ട്രപതി ഭവനില്‍ പൊതു ജനങ്ങള്‍ക്കു പ്രവേശനം നിരോധിച്ചിട്ടുമുണ്ട്. ഇക്കുറി ഒറ്റയ്ക്കു ഭൂരിപക്ഷമില്ലാത്തതിനാല്‍ ഘടക കക്ഷികള്‍ ചോദിക്കുന്ന സുപ്രധാന വകുപ്പുകള്‍ നല്കാന്‍ ബിജെപി നിര്‍ബന്ധിതമാവും. അതിനുള്ള ചര്‍ച്ചകളും ആരംഭിച്ചിട്ടുണ്ട്.
മൂന്നാം തവണയും എന്‍ഡിഎ 300നടുത്ത് എത്തുമെന്ന് ഉറപ്പായി. എന്നാല്‍ എക്സിറ്റ് പോളുകളുകള്‍ തകര്‍ത്ത പ്രതീക്ഷകള്‍ വീണ്ടെടുത്ത് പ്രതിപക്ഷം കരുത്തോടെ മുന്നോട്ടു വരുന്നതും ഇന്നത്തെ ദിവസത്തിന്റെ പ്രത്യേകതയാണ്.
തുടര്‍ച്ചയായ മൂന്നാം തവണയും ജനങ്ങള്‍ എന്‍ഡിഎയില്‍ വിശ്വാസം അര്‍പ്പിക്കുന്നു. ഇത് ഇന്ത്യയുടെ ചരിത്രത്തിലെ ഒരു ചരിത്ര നേട്ടമാണ്. ഈ സ്‌നേഹത്തിന് ഞാന്‍ ജനങ്ങളെ വണങ്ങുകയും കഴിഞ്ഞ ദശകത്തില്‍ ചെയ്ത നല്ല പ്രവര്‍ത്തനങ്ങള്‍ തുടരുമെന്ന് ഉറപ്പ് നല്‍കുന്നുവെന്നും ജനങ്ങളുടെ അഭിലാഷങ്ങള്‍ നിറവേറ്റുമെന്നും പ്രധാനമന്ത്രി നേരത്തേ ട്വീറ്റ് ചെയ്തിരുന്നു.
രാത്രി ഒന്‍പതര മണിക്ക് ബി.ജെ.പി 240 സീറ്റുകളിലും എന്‍.ഡി.എ 292 സീറ്റുകളിലും മുന്നിലാണ്. ഇന്ത്യാ സഖ്യം 232 സീറ്റുകളിലും കോണ്‍ഗ്രസ് 100 സീറ്റുകളിലും മുന്നിലാണ്.
ഉത്തര്‍ പ്രദേശില്‍ കിട്ടിയ തിരിച്ചടിയാണ് ബിജെപിയുടെ പ്രതീക്ഷകള്‍ തെറ്റിച്ചത്. യുപിയില്‍ 80ല്‍ 43 സീറ്റിലും ഇന്ത്യാ സഖ്യമാണ് മുന്നില്‍. യുപി തൂത്തൂവാരുമെന്ന പ്രതീക്ഷയിലായിരുന്നു ബിജെപി. ആ പ്രതീക്ഷയെല്ലാം തെറ്റുകയും വാരാണസിയില്‍ പ്രധാനമന്ത്രി നരേന്ദ്ര മോഡിയുടെ പോലും ഭൂരിപക്ഷം വന്‍ തോതില്‍ കുറയുന്ന സ്ഥിതിയുമുണ്ടായി. 2019ല്‍ 62 സീറ്റിലായിരുന്നു ബിജെപി യുപിയില്‍ വിജയിച്ചത്.
ബിജെപിയുടെ വലിയ പ്രതീക്ഷയായ ബംഗാളില്‍, 2019-ലേതിലും മോശം നിലയിലാണ്. 2019ല്‍ 18 സീറ്റായിരുന്നത് ഇക്കുറി 12ലേക്കു താണിട്ടുണ്ട്. മമതാ ബാനര്‍ജിയുടെ തൃണമൂല്‍ കോണ്‍ഗ്രസ് നഷ്ടപ്പെട്ട നിലയുടെ ഭൂരിഭാഗവും വീണ്ടെടുത്ത് 22 സീറ്റില്‍ നിന്ന് 29 സീറ്റിലേക്ക് എത്തിയിട്ടുണ്ട്.
മഹാരാഷ്ട്രയില്‍ ഉദ്ധവ് താക്കറെ വിഭാഗം 11 സീറ്റിലും ഷിന്‍ഡെ സേനയുടെ 5 സീറ്റിലും മുന്നിലാണ്. എന്‍സിപിയിലെ അജിത് പവാര്‍ വിഭാഗം ഒരു സീറ്റിലും അമ്മാവന്‍ ശരദ് പവാര്‍ 7 സീറ്റിലും മുന്നിലാണ്. ബിജെപി 12 സീറ്റിലും കോണ്‍ഗ്രസും 11 സീറ്റിലും വിജയം ഉറപ്പിച്ചിട്ടുണ്ട്.
ഒഡീഷ, കര്‍ണാടക, ആന്ധ്രാപ്രദേശ്, ഒരു പരിധിവരെ തെലങ്കാന എന്നിവിടങ്ങളിലാണ് ബിജെപി നഷ്ടം നികത്തുന്നത്.
പ്രതിപക്ഷത്തെ അനൈക്യം കൂടിയാണ് ഇക്കുറി ഭരണം അവരുടെ കൈയില്‍ നിന്നു വഴുതിപ്പോകാന്‍ കാരണം. ബംഗാളില്‍ മമതാ ബാനര്‍ജിയുമായി ഐക്യത്തിലെത്താന്‍ കോണ്‍ഗ്രസിനു കഴിഞ്ഞില്ല. അവിടെ ഐക്യം ശക്തമായിരുന്നുവെങ്കില്‍ ബിജെപിയുടെ സീറ്റു നില പിന്നെയും കുറയ്ക്കാന്‍ അവര്‍ക്കു കഴിയുമായിരുന്നു.
പഞ്ചാബില്‍ ആം ആദ്മി പാര്‍ട്ടി ഒറ്റയ്ക്കു മത്സരിച്ചതും കേരളത്തില്‍ കോണ്‍ഗ്രസും സിപിഎമ്മും പരസ്പരം ചെളിവാരിയെറിഞ്ഞതും പ്രതിപക്ഷത്ത് ഐക്യമില്ലെന്ന തോന്നലുണ്ടാക്കി.
COMMENTS