ന്യൂഡല്ഹി: മുഖ്യമന്ത്രിസ്ഥാനം രാജിവെക്കാത്ത അരവിന്ദ് കെജ്രിവാളിനെതിരെ രൂക്ഷ വിമര്ശനവുമായി ഡല്ഹി ഹൈക്കോടതി. അരവിന്ദ് കെജ്രിവാള് അറസ്റ്റ...
ന്യൂഡല്ഹി: മുഖ്യമന്ത്രിസ്ഥാനം രാജിവെക്കാത്ത അരവിന്ദ് കെജ്രിവാളിനെതിരെ രൂക്ഷ വിമര്ശനവുമായി ഡല്ഹി ഹൈക്കോടതി. അരവിന്ദ് കെജ്രിവാള് അറസ്റ്റിന് ശേഷം മുഖ്യമന്ത്രിസ്ഥാനം രാജിവെക്കാതിരുന്നത് ദേശീയ താല്പ്പര്യത്തിന് മേലെ വ്യക്തിപരമായ താല്പ്പര്യമാണെന്ന് കോടതി പറഞ്ഞു.
ഡല്ഹിയിലെ എഎപിയുടെ നേതൃത്വത്തിലുള്ള ഡല്ഹി സര്ക്കാരിന് 'അധികാരത്തില് മാത്രമാണ് താല്പര്യം' എന്ന് കോടതി ആഞ്ഞടിച്ചു. സര്ക്കാര് സ്കൂളുകളില് ചേരുന്ന വിദ്യാര്ത്ഥികള്ക്ക് പാഠപുസ്തകങ്ങളും യൂണിഫോമുകളും ലഭ്യമല്ലാത്തതില് ഡല്ഹി സര്ക്കാരിനെ കോടതി വിമര്ശിച്ചു. വിദ്യാര്ത്ഥികള്ക്ക് പുസ്തകമില്ലാത്തതില് ഡല്ഹി സര്ക്കാരിന് വിഷമമില്ലെന്ന് കോടതി പറഞ്ഞു. 'നിങ്ങളുടെ കക്ഷിക്ക് അധികാരത്തില് താല്പ്പര്യമുണ്ട്. നിങ്ങള്ക്ക് എത്ര അധികാരം വേണമെന്ന് എനിക്കറിയില്ല,' കോടതി പറഞ്ഞു.
നോട്ട്ബുക്കുകള്, സ്റ്റേഷനറി സാധനങ്ങള്, യൂണിഫോം, സ്കൂള് ബാഗുകള് എന്നിവ വിതരണം ചെയ്യാത്തതിന്റെ പ്രധാന കാരണങ്ങളിലൊന്ന് സ്റ്റാന്ഡിംഗ് കമ്മിറ്റികള് രൂപീകരിക്കാത്തതാണ് എന്ന് എംസിഡി കമ്മീഷണര് ചൂണ്ടിക്കാണിച്ചതിനെ തുടര്ന്നാണിത്. അഞ്ച് കോടിയിലധികം മൂല്യമുള്ള കരാറുകള് നല്കാന് സ്റ്റാന്ഡിംഗ് കമ്മിറ്റിക്ക് മാത്രമേ അധികാരമുള്ളൂവെന്നും അദ്ദേഹം പറഞ്ഞു.
നിലവില് കസ്റ്റഡിയിലുള്ള മുഖ്യമന്ത്രിയുടെ സമ്മതം അത്തരം സംഘത്തിന് ആവശ്യമാണെന്ന് എഎപി മന്ത്രി സൗരഭ് ഭരദ്വാജില് നിന്ന് തനിക്ക് നിര്ദ്ദേശം ലഭിച്ചതായി ഡല്ഹി സര്ക്കാരിന്റെ അഭിഭാഷകന് വെള്ളിയാഴ്ച കോടതിയെ അറിയിച്ചു. 'മുഖ്യമന്ത്രി കസ്റ്റഡിയിലായിട്ടും സര്ക്കാര് തുടരുമെന്ന് താങ്കള് പറഞ്ഞത് നിങ്ങളുടെ ഇഷ്ടമാണ്, ഞങ്ങള് പോകാന് ആഗ്രഹിക്കാത്ത വഴിയിലൂടെ പോകാന് നിങ്ങള് ഞങ്ങളെ നിര്ബന്ധിക്കുകയാണ്.' എന്നും മറുപടിയായി കോടതി പറഞ്ഞു.
നഗരവികസന മന്ത്രി സൗരഭ് ഭരദ്വാജ് വിദ്യാര്ത്ഥികളുടെ ദുരിതത്തിന് നേരെ കണ്ണടച്ച് മുതലക്കണ്ണീര് ഒഴുക്കുകയാണെന്നും കോടതി അഭിപ്രായപ്പെട്ടു. പുസ്തകവിതരണം കോടതിയുടെ ജോലിയല്ലെന്ന് ചൂണ്ടിക്കാട്ടിയ കോടതി, 'ആരോ അവരുടെ ജോലിയില് വീഴ്ച വരുത്തുന്നതിനാലാണ്' ഇത് ചെയ്യേണ്ടതെന്ന് കോടതി അഭിപ്രായപ്പെട്ടു.
ഡല്ഹി മദ്യനയവുമായി ബന്ധപ്പെട്ട് കഴിഞ്ഞ മാസമാണ് അരവിന്ദ് കെജ്രിവാളിനെ എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തത്.
COMMENTS