നടി പാലാ തങ്കം അന്തരിച്ചു

  കൊല്ലം: പ്രമുഖ സിനിമാ-നാടക നടിയും ഡബിംഗ് ആര്‍ട്ടിസ്റ്റുമായ പാലാ തങ്കം അന്തരിച്ചു. 80 വയസ്സായിരുന്നു. ഞായറാഴ്ച്ച രാത്രി 7.35നായിരുന്നു അന്ത...

 

കൊല്ലം: പ്രമുഖ സിനിമാ-നാടക നടിയും ഡബിംഗ് ആര്‍ട്ടിസ്റ്റുമായ പാലാ തങ്കം അന്തരിച്ചു. 80 വയസ്സായിരുന്നു. ഞായറാഴ്ച്ച രാത്രി 7.35നായിരുന്നു അന്ത്യം. 

2013 മുതല്‍ പത്തനാപുരത്തെ ഗാന്ധിഭവനില്‍ അന്തേവാസിയായിരുന്നു. മുന്നൂറിലധികം ചിത്രങ്ങളില്‍ അഭിനയിച്ചിട്ടുണ്ട്.

മുന്നൂറില്‍പ്പരം ചിത്രങ്ങളില്‍ ശബ്ദം നല്‍കുകയും ചെയ്തിട്ടുണ്ട്. 

വാര്‍ധക്യസഹജമായ അസുഖങ്ങളെ തുടര്‍ന്ന് ഗാന്ധിഭവന്‍ പാലിയേറ്റീവ് കെയറില്‍ ചികിത്സയിലായിരുന്നു. മൃതദേഹം ഗാന്ധിഭവന്‍ മോര്‍ച്ചറിയില്‍ സൂക്ഷിച്ചിരിക്കുന്നു. സംസ്‌കാരം പിന്നീട് നടത്തും.

കോട്ടയം വേളൂര്‍ തിരുവാതുക്കല്‍ ശരത്ചന്ദ്രഭവനില്‍ കുഞ്ഞുക്കുട്ടന്‍-ലക്ഷ്മിക്കുട്ടി ദമ്പതികളുടെ മകളായി 1941 ഫെബ്രുവരി 26ന് ജനിച്ചു. രാധാമണിയെന്നായിരുന്നു പേര്. പിന്നീട് പാലാ തങ്കം എന്ന പേരില്‍ കലാരംഗത്ത് അറിയപ്പെട്ടു.

പുലിയന്നുര്‍ വിജയന്‍ ഭാഗവതരുടെ കീഴില്‍ കുട്ടിക്കാലത്തു തന്നെ സംഗീതം അഭ്യസിച്ചിരുന്നു. പിന്നീട് ചങ്ങനാശ്ശേരി എല്‍പിആര്‍ വര്‍മ്മയുടെ അടുത്തും സംഗീതം അഭ്യസിച്ചു.

സത്യന്‍ അഭിനയിച്ച, ആലപ്പി വിന്‍സന്റിന്റെ കെടാവിളക്ക് എന്ന ചിത്രത്തില്‍ താമര മലരു പോല്‍..., തേക്കു പാട്ടിന്‍... എന്നിങ്ങനെ രണ്ട് പാട്ടുകള്‍ പാടി. പാടാനായി മദ്രാസിലെത്തിയ തങ്കത്തിന് അവിചാരിതമായി സത്യന്റെ ഒപ്പം അഭിനയിക്കാനും അവസരം കിട്ടി. ആ ചിത്രം പുറത്തു വന്നില്ല. 

തുടര്‍ന്നു പതിനാലാം വയസ്സില്‍ നാടകത്തില്‍ അഭിനയിച്ചു. എന്‍ എന്‍ പിള്ളയുടെ വിശ്വകേരള നാടക സമതിയിലാണ് ആദ്യം അഭിനയിച്ചത്. 

സീത എന്ന ചിത്രത്തില്‍ കുശലകുമാരിക്ക് ശബ്ദം നല്‍കിക്കൊണ്ട് സിനിമയിലേക്ക് തിരികെയത്തി. നായിക കഥാപാത്രങ്ങള്‍, കുട്ടികള്‍, വയസ്സായ സ്ത്രീകള്‍, തുടങ്ങി, ഒരു സീനിലെ മൂന്നും നാലും കഥാപാത്രങ്ങള്‍ക്കു വരെ അവര്‍ ശബ്ദം നല്‍കിയിട്ടുണ്ട്. 

പ്രമുഖ ഡബ്ബിംഗ് ആര്‍ട്ടിസ്റ്റായിരുന്ന അന്തരിച്ച അമ്പിളി മകളാണ്. മറ്റു രണ്ടു മക്കള്‍ കൂടിയുണ്ട്.

Keywords: Pala Thankam, Acress, Kerala, Ambili, Malayalam Movie