നിറം മാറിയ സർക്കാർ കലണ്ടറിന് റെക്കോർഡ് വിൽപ്പന; രണ്ടാഴ്ചയ്ക്കുള്ളിൽ വിറ്റഴിഞ്ഞത് 1.72 ലക്ഷം കോപ്പികൾ

തിരുവനന്തപുരം: പരമ്പരാഗതമായി തുടർന്നിരുന്ന ചുവപ്പ്, കറുപ്പ് നിറങ്ങൾ ഒഴിവാക്കി ഇളംനീല നിറത്തിൽ പുറത്തിറക്കിയ സംസ്ഥാന സർക്കാരിന്റെ 2027-ലെ കലണ...

തിരുവനന്തപുരം: പരമ്പരാഗതമായി തുടർന്നിരുന്ന ചുവപ്പ്, കറുപ്പ് നിറങ്ങൾ ഒഴിവാക്കി ഇളംനീല നിറത്തിൽ പുറത്തിറക്കിയ സംസ്ഥാന സർക്കാരിന്റെ 2027-ലെ കലണ്ടറിന് വിപണിയിൽ റെക്കോർഡ് വിൽപ്പന. വിൽപ്പന ആരംഭിച്ച് കേവലം രണ്ടാഴ്ചയ്ക്കുള്ളിൽ തന്നെ 1,72,836 കലണ്ടറുകൾ വിറ്റഴിച്ച് കഴിഞ്ഞ വർഷത്തെ ആകെ വിൽപ്പനയുടെ റെക്കോർഡ് മറികടന്നു.

ഒക്ടോബർ 23 മുതൽ നവംബർ 12 വരെയുള്ള കണക്കുകൾ പ്രകാരം 1,57,226 കോപ്പികൾ നേരിട്ടുള്ള വിൽപ്പനയിലൂടെയാണ് വിറ്റഴിഞ്ഞത്. 40 രൂപയാണ് ഒരു കലണ്ടറിന്റെ വില. ഇതിനുപുറമെ, ഓരോ പത്ത് കലണ്ടറുകൾ വാങ്ങുമ്പോഴും ഒരെണ്ണം സൗജന്യമായി നൽകുന്ന സ്കീമിലൂടെ 15,610 കലണ്ടറുകളും വിതരണം ചെയ്തു. കഴിഞ്ഞ വർഷം മാർച്ച് മാസം വരെ ആകെ 1.65 ലക്ഷം കലണ്ടറുകൾ മാത്രമായിരുന്നു വിറ്റഴിച്ചിരുന്നത്.

വിപണിയിൽ വൻ ഡിമാൻഡ് ഉയർന്ന സാഹചര്യത്തിൽ 10 ലക്ഷം കലണ്ടറുകൾ കൂടി അടിയന്തരമായി അച്ചടിക്കാൻ സർക്കാർ തീരുമാനിച്ചിട്ടുണ്ട്. തിരുവനന്തപുരത്തെ ജി.സി.പി പബ്ലിക്കേഷൻ വഴിയും എറണാകുളം, കോട്ടയം തുടങ്ങിയ ജില്ലാ ഫോറം സ്റ്റോറുകൾ വഴിയുമാണ് ഏറ്റവും കൂടുതൽ കലണ്ടറുകൾ വിറ്റഴിക്കപ്പെട്ടത്.

മുഖ്യമന്ത്രി വി.ഡി. സതീശൻ പ്രകാശനം ചെയ്ത ഈ കലണ്ടറിൽ സർക്കാരിന്റെ 'പുതുയുഗ കേരളം' കാഴ്ചപ്പാടും 'മിഷൻ സമുദ്ര' (Blue Economy) പദ്ധതികളുമാണ് പ്രധാന പ്രമേയമാക്കിയിരിക്കുന്നത്. പ്രശസ്ത പുസ്തക കവർ ഡിസൈനറായ അരുൺ ഗോകുലാണ് ലളിതവും ആകർഷകവുമായ രീതിയിൽ പുതിയ കലണ്ടർ രൂപകൽപ്പന ചെയ്തിരിക്കുന്നത്. പുതിയ രൂപകൽപ്പനയും നിറം മാറ്റവുമാണ് കലണ്ടറിന് ഇത്രയധികം ജനപ്രീതി നേടിക്കൊടുത്തതെന്നാണ് വിലയിരുത്തൽ.

Key Words : Government Calendar