ന്യൂഡൽഹി: റഷ്യ, അമേരിക്ക, ചൈന എന്നീ രാജ്യങ്ങളുടെ നേതാക്കൾ തമ്മിലുള്ള ഉന്നതതല കൂടിക്കാഴ്ചയുടെ ചിത്രം പങ്കുവെച്ച് പ്രധാനമന്ത്രി നരേന്ദ്ര മോദിയ...
ന്യൂഡൽഹി: റഷ്യ, അമേരിക്ക, ചൈന എന്നീ രാജ്യങ്ങളുടെ നേതാക്കൾ തമ്മിലുള്ള ഉന്നതതല കൂടിക്കാഴ്ചയുടെ ചിത്രം പങ്കുവെച്ച് പ്രധാനമന്ത്രി നരേന്ദ്ര മോദിയെ പരിഹസിച്ച ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ രൂക്ഷവിമർശനവുമായി ബിജെപി. മുൻ കോൺഗ്രസ് സർക്കാരുകളുടെ ഭരണകാലത്താണ് രാജ്യതാൽപ്പര്യങ്ങളിൽ വിട്ടുവീഴ്ചയുണ്ടായതെന്ന് ആരോപിച്ച ബിജെപി, ഇന്ത്യയെ അപകീർത്തിപ്പെടുത്താൻ രാഹുൽ ഗാന്ധി പണം വാങ്ങുന്നുണ്ടോ എന്ന് സംശയിക്കുന്നതായും തിരിച്ചടിച്ചു.
യുഎസ് പ്രസിഡന്റ് ഡൊണാൾഡ് ട്രംപ്, ചൈനീസ് പ്രസിഡന്റ് ഷി ജിൻപിങ്, റഷ്യൻ പ്രസിഡന്റ് വ്ലാഡിമിർ പുടിൻ എന്നിവർ പങ്കെടുത്ത അപൂർവ ത്രികക്ഷി ചർച്ചയുടെ ചിത്രമാണ് രാഹുൽ ഗാന്ധി വെള്ളിയാഴ്ച സമൂഹമാധ്യമമായ എക്സിൽ (X) പങ്കുവെച്ചത്. "കോൺഗ്രസായിരുന്നു അധികാരത്തിലെങ്കിൽ ഇന്ത്യയുടെ പ്രധാനമന്ത്രിയും ഈ മേശയ്ക്കരികിൽ ഇരിക്കുമായിരുന്നു. വിട്ടുവീഴ്ച ചെയ്ത ഒരു പ്രധാനമന്ത്രിക്ക് ഒരിക്കലും ഇവിടെ ഇരിക്കാൻ കഴിയില്ല" എന്നായിരുന്നു രാഹുലിന്റെ കുറിപ്പ്.
രാഹുലിന്റെ പരാമർശത്തിനെതിരെ ബിജെപി വക്താക്കൾ ശക്തമായി രംഗത്തെത്തി. കോൺഗ്രസ് പാർട്ടിക്ക് വിട്ടുവീഴ്ചകളുടെ ചരിത്രമാണുള്ളതെന്ന് ബിജെപി വക്താവ് തുഹിൻ സിൻഹ ആരോപിച്ചു. "ഷിംല കരാറിന്റെ സമയത്ത് ഇന്ദിരാഗാന്ധി വിട്ടുവീഴ്ച ചെയ്തു. അവർ പാകിസ്ഥാൻ യുദ്ധത്തടവുകാരെ മോചിപ്പിച്ചു; തുടർന്ന് പാകിസ്ഥാൻ ഇന്ത്യയിലേക്ക് ഭീകരത കയറ്റുമതി ചെയ്യുകയാണ് ഉണ്ടായത്. മൻമോഹൻ സിംഗിന്റെ ഭരണകാലത്തെ ഷാം-എൽ-ഷെയ്ഖ് പ്രസ്താവനയും ഇതിന് ഉദാഹരണമാണ്. ഇന്ത്യയെ അപകീർത്തിപ്പെടുത്താൻ രാഹുൽ ഗാന്ധിക്ക് പണം ലഭിക്കുന്നുണ്ടെന്ന് തോന്നുന്നു," തുഹിൻ സിൻഹ എൻഡിടിവിയോട് പറഞ്ഞു.
ഇന്ത്യയെക്കുറിച്ച് നിഷേധാത്മകമായ പ്രചാരണം നടത്താനാണ് രാഹുൽ ശ്രമിക്കുന്നതെന്ന് ബിജെപി വക്താവ് ആർ.പി. സിംഗും കുറ്റപ്പെടുത്തി. ഇന്ന് ലോകക്രമത്തിൽ ഇന്ത്യ തലയുയർത്തി നിൽക്കുകയാണെന്നും എല്ലാ ലോകനേതാക്കളുമായും മികച്ച ബന്ധമുള്ള വ്യക്തിയായാണ് പ്രധാനമന്ത്രി മോദിയെ കാണുന്നതെന്നും അദ്ദേഹം വ്യക്തമാക്കി.
നേരത്തെ, അമേരിക്കയിലെ ചിക്കാഗോ സർവകലാശാലയിൽ നടത്തിയ പ്രസംഗത്തിലും രാഹുൽ ഗാന്ധി കേന്ദ്രത്തിന്റെ വിദേശനയത്തെ വിമർശിച്ചിരുന്നു. പാകിസ്ഥാൻ അമേരിക്കയും ഇറാനുമായി ചർച്ചകളിൽ ഏർപ്പെടുമ്പോൾ, ആഗോള ഭൗമരാഷ്ട്രീയത്തിൽ ഇന്ത്യ വെറുമൊരു 'സൈഡ് പ്ലെയർ' (അപ്രധാന കക്ഷി) ആയി മാറിയെന്നായിരുന്നു രാഹുലിന്റെ പരാമർശം. ഇതിനെതിരെ രാഹുൽ ഗാന്ധി 'പാകിസ്ഥാൻ ഫാൻബോയ്' ആയാണ് ആഗോള വേദികളിൽ പെരുമാറുന്നതെന്ന് ബിജെപി വക്താവ് പ്രദീപ് ഭണ്ഡാരിയും വിമർശിച്ചിരുന്നു.
Key Words : Rahul Gandhi, Narendra Modi

COMMENTS