ന്യൂഡൽഹി: ശബരിമല തീർഥാടകർക്ക് വിമാനത്തിന്റെ ക്യാബിൻ ബാഗേജിൽ ഇരുമുടിക്കെട്ട് കൊണ്ടുപോകാൻ കേന്ദ്ര വ്യോമയാന മന്ത്രാലയം അനുമതി നൽകി. കേന്ദ്ര വ...
ന്യൂഡൽഹി: ശബരിമല തീർഥാടകർക്ക് വിമാനത്തിന്റെ ക്യാബിൻ ബാഗേജിൽ ഇരുമുടിക്കെട്ട് കൊണ്ടുപോകാൻ കേന്ദ്ര വ്യോമയാന മന്ത്രാലയം അനുമതി നൽകി. കേന്ദ്ര വ്യോമയാന മന്ത്രി കെ. റാം മോഹൻ നായിഡുവാണ് എക്സിലൂടെ ഇക്കാര്യം ഔദ്യോഗികമായി അറിയിച്ചത്. ഭക്തരുടെ വിശ്വാസത്തെയും വികാരങ്ങളെയും മാനിച്ചുകൊണ്ട് തുടർച്ചയായ മൂന്നാം വർഷമാണ് സുരക്ഷാ നിയന്ത്രണങ്ങളിൽ ഈ പ്രത്യേക ഇളവ് അനുവദിക്കുന്നത്.
മണ്ഡല-മകരവിളക്ക് തീർഥാടന കാലയളവായ 2026 നവംബർ 20 മുതൽ 2027 ജനുവരി 20 വരെയാണ് ഈ പ്രത്യേക ഇളവ് നിലവിലുണ്ടാവുക. തീർഥാടകർക്ക് യാതൊരുവിധ ബുദ്ധിമുട്ടുകളുമില്ലാതെ സുഗമമായി യാത്ര ചെയ്യുന്നതിനായി ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി (BCAS), സി.ഐ.എസ്.എഫ് (CISF), വിമാനത്താവള നടത്തിപ്പുകാർ എന്നിവരുൾപ്പെടെ ബന്ധപ്പെട്ട എല്ലാ അധികാരികൾക്കും ആവശ്യമായ നിർദേശങ്ങൾ നൽകിയതായി മന്ത്രി വ്യക്തമാക്കി.
സാധാരണഗതിയിൽ വിമാനത്തിനുള്ളിൽ (ക്യാബിൻ ലഗേജിൽ) നാളികേരം കൊണ്ടുപോകുന്നതിന് സുരക്ഷാ കാരണങ്ങളാൽ നിയന്ത്രണമുണ്ട്. എന്നാൽ, മണ്ഡല-മകരവിളക്ക് കാലയളവിൽ സുരക്ഷാ ഉദ്യോഗസ്ഥരുടെ കർശന പരിശോധനകൾക്ക് (എക്സ്-റേ, ഫിസിക്കൽ ചെക്കിങ്) വിധേയമായി ഇരുമുടിക്കെട്ട് ഒപ്പം കരുതാൻ അയ്യപ്പഭക്തർക്ക് സാധിക്കും.
ആചാരപ്രകാരം യാത്രയിലുടനീളം തീർഥാടകൻ തന്നെ ഇരുമുടിക്കെട്ട് കൈവശം വയ്ക്കേണ്ടതുണ്ട് എന്നതിനാൽ, ചെക്ക്-ഇൻ ബാഗേജിൽ ഇത് നൽകേണ്ടി വരുന്നത് ഭക്തർക്ക് വലിയ പ്രയാസമുണ്ടാക്കിയിരുന്നു. ഇതേത്തുടർന്ന് ഭക്തരുടെയും വിവിധ സംഘടനകളുടെയും അഭ്യർഥന മാനിച്ചാണ് കേന്ദ്ര സർക്കാരിന്റെ നടപടി.
വിമാനയാത്ര നടത്തുന്ന ഇതര സംസ്ഥാനങ്ങളിൽ നിന്നുള്ള ആയിരക്കണക്കിന് അയ്യപ്പഭക്തർക്ക് ഈ തീരുമാനം വലിയ ആശ്വാസമാകും.
Key Words : Ministry of Civil Aviation, Sabarimala pilgrims, Irumudikettu

COMMENTS