ഫ്രാൻസിലെ രക്തബാങ്കുകൾക്ക് നേരെ സൈബർ ആക്രമണം: ഫ്രീസറുകളുടെ താപനില 110 ഡിഗ്രിയിലേക്ക് ഉയർത്തി ഹാക്കർമാർ

പാരിസ്: ഫ്രാൻസിലെ ദേശീയ രക്തബാങ്ക് ഏജൻസിയുടെ (EFS) ശീതീകരണ സംവിധാനങ്ങൾക്ക് നേരെ വൻ സൈബർ ആക്രമണം. രക്തവും പ്ലാസ്മയും സൂക്ഷിച്ചിരുന്ന ഫ്രീസറുക...

പാരിസ്: ഫ്രാൻസിലെ ദേശീയ രക്തബാങ്ക് ഏജൻസിയുടെ (EFS) ശീതീകരണ സംവിധാനങ്ങൾക്ക് നേരെ വൻ സൈബർ ആക്രമണം. രക്തവും പ്ലാസ്മയും സൂക്ഷിച്ചിരുന്ന ഫ്രീസറുകളുടെ താപനില ഹാക്കർമാർ വിദൂരമായി (Remotely) 110 ഡിഗ്രി സെൽഷ്യസിലേക്ക് (230°F) ഉയർത്തി. നവംബർ 1, 2 തീയതികളിൽ അർദ്ധരാത്രിയിലാണ് ഫ്രഞ്ച് ആരോഗ്യമേഖലയെ ഞെട്ടിച്ച ഈ അട്ടിമറി ശ്രമം നടന്നത്.

സാധാരണയായി മൈനസ് 30 ഡിഗ്രി സെൽഷ്യസിൽ സൂക്ഷിക്കേണ്ട ഫ്രീസറുകളുടെ താപനിലയാണ് ഹാക്കർമാർ അസ്വാഭാവികമായി ഉയർത്തിയത്. എന്നാൽ, താപനില മാറിയ ഉടൻ തന്നെ രക്തബാങ്കിലെ അലാറം സംവിധാനങ്ങൾ പ്രവർത്തിക്കുകയും ഡ്യൂട്ടിയിലുണ്ടായിരുന്ന ജീവനക്കാർ ഉണർന്നു പ്രവർത്തിക്കുകയും ചെയ്തു. 

തുടർന്ന് ഫ്രീസറുകളിൽ ഉണ്ടായിരുന്ന രക്ത സാമ്പിളുകളും പ്ലാസ്മയും ഉടനടി മറ്റ് സുരക്ഷിതമായ യൂണിറ്റുകളിലേക്ക് മാറ്റിയതിനാൽ വൻ ദുരന്തം ഒഴിവായി.

കൃത്യസമയത്ത് ഇടപെടാൻ സാധിച്ചതുകൊണ്ട് രക്തശേഖരത്തിന് യാതൊരുവിധ കേടുപാടുകളും സംഭവിച്ചിട്ടില്ലെന്നും രോഗികൾക്കുള്ള രക്ത വിതരണം തടസ്സമില്ലാതെ തുടരുമെന്നും ഫ്രഞ്ച് ആരോഗ്യ മന്ത്രാലയം അറിയിച്ചു.

ശീതീകരണ സംവിധാനങ്ങളുടെ മേൽനോട്ടം വഹിക്കുന്ന 'കൂൾവേൾഡ്' എന്ന പുറംകരാർ കമ്പനിയുടെ നെറ്റ്‌വർക്കിലെ സുരക്ഷാ പാളിച്ചകൾ മുതലെടുത്താണ് ഹാക്കർമാർ ഫ്രീസറുകളുടെ നിയന്ത്രണം കൈക്കലാക്കിയത്. ഫ്രാൻസിലെ രക്തബാങ്കുകളെ കൂടാതെ, വിവിധ യൂറോപ്യൻ രാജ്യങ്ങളിലെ നൂറുകണക്കിന് സൂപ്പർമാർക്കറ്റുകളിലെ ഫ്രീസറുകൾക്ക് നേരെയും ഇതേ സമയത്ത് സമാനമായ ആക്രമണം നടന്നിരുന്നു. സൂപ്പർമാർക്കറ്റുകളിൽ ടൺ കണക്കിന് ഭക്ഷണസാധനങ്ങൾ നശിക്കാൻ ഇത് കാരണമായിട്ടുണ്ട്.

ആക്രമണത്തിന് പിന്നിൽ പ്രവർത്തിച്ച സൈബർ ക്രിമിനലുകളെ കണ്ടെത്താൻ ഫ്രഞ്ച് സൈബർ സുരക്ഷാ ഏജൻസികളും ആരോഗ്യ മന്ത്രാലയവും സംയുക്തമായി ഊർജിതമായ അന്വേഷണം ആരംഭിച്ചു.

Key Words : Cyberattack, Blood Banks,  France, Hackers