വിഴിഞ്ഞം ഓഹരി കൈമാറ്റം: അദാനിക്ക് ഇതുവരെ അനുമതി നൽകിയില്ലെന്ന് സർക്കാർ; കരാർ ലംഘന ചോദ്യങ്ങളിൽ നിന്ന് ഒഴിഞ്ഞുമാറി തുറമുഖ വകുപ്പ്

തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്തിന്റെ വലിയൊരു പങ്ക് ഓഹരികൾ വിദേശ കമ്പനിക്ക് കൈമാറാനുള്ള അദാനി ഗ്രൂപ്പിന്റെ നീക്കത്തിന് സംസ്ഥാന...

തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്തിന്റെ വലിയൊരു പങ്ക് ഓഹരികൾ വിദേശ കമ്പനിക്ക് കൈമാറാനുള്ള അദാനി ഗ്രൂപ്പിന്റെ നീക്കത്തിന് സംസ്ഥാന സർക്കാർ ഇതുവരെ അനുമതി നൽകിയിട്ടില്ലെന്ന് റിപ്പോർട്ട്. സ്വിസ് ഷിപ്പിങ് കമ്പനിയായ മെഡിറ്ററേനിയൻ ഷിപ്പിങ് കമ്പനിക്ക് (MSC) തുറമുഖത്തിന്റെ 49 ശതമാനം ഓഹരികൾ കൈമാറാനാണ് അദാനി പോർട്സ് കരാറിലേർപ്പെട്ടിരിക്കുന്നത്. എന്നാൽ, സർക്കാരിന്റെ മുൻകൂർ അനുമതിയില്ലാതെ ഇത്തരം ഒരു കരാറിൽ ഏർപ്പെട്ടത് ഒറിജിനൽ കരാറിന്റെ ലംഘനമാണോ എന്ന ചോദ്യത്തോട് പ്രതികരിക്കാൻ തുറമുഖ വകുപ്പ് വിസമ്മതിച്ചു.

ഏകദേശം 13,220 കോടി രൂപയുടെ വമ്പൻ വിദേശ നിക്ഷേപം ലക്ഷ്യമിട്ടാണ് കഴിഞ്ഞ ജൂൺ 29-ന് അദാനി ഗ്രൂപ്പും എം.എസ്.സിയും തമ്മിൽ പ്രാഥമിക കരാർ ഒപ്പിട്ടത്. എന്നാൽ, സംസ്ഥാന സർക്കാരിനെ മുൻകൂട്ടി അറിയിക്കാതെ സെബിയെ (SEBI) സമീപിച്ചതിലും മാധ്യമങ്ങളിലൂടെ വിവരം പുറത്തുവിട്ടതിലും സർക്കാരിന് ശക്തമായ വിയോജിപ്പുണ്ട്.

2015-ൽ ഒപ്പുവെച്ച പ്രധാന കരാർ പ്രകാരം, തുറമുഖ കമ്പനിയുടെ 25 ശതമാനത്തിലധികം ഓഹരികൾ കൈമാറുന്നത് 'ഉടമസ്ഥതാ മാറ്റമായി' കണക്കാക്കുമെന്നും ഇതിന് സർക്കാരിന്റെ മുൻകൂർ രേഖാമൂലമുള്ള അനുമതി വേണമെന്നുമാണ് സംസ്ഥാന സർക്കാരിന്റെ കർശന നിലപാട്. എന്നാൽ, തുറമുഖത്തിന്റെ വാണിജ്യ പ്രവർത്തനം തുടങ്ങി ഒരു വർഷത്തിന് ശേഷം 74% വരെ ഓഹരികൾ വിൽക്കാൻ വ്യവസ്ഥയുണ്ടെന്നാണ് അദാനി ഗ്രൂപ്പിന്റെ വാദം.

ഓഹരി കൈമാറ്റത്തിന് അനുമതി തേടി ജൂലൈ ഒന്നിന് അദാനി ഗ്രൂപ്പ് സർക്കാരിന് അപേക്ഷ നൽകിയിരുന്നു. ഈ അപേക്ഷ നിലവിൽ ചീഫ് സെക്രട്ടറിയുടെ നേതൃത്വത്തിലുള്ള ഉന്നതാധികാര സമിതിയുടെ പരിശോധനയിലാണ്. നിയമപരമായ വശങ്ങളും തന്ത്രപ്രധാനമായ തുറമുഖത്തിന്റെ സുരക്ഷാ കാര്യങ്ങളും വിലയിരുത്തിയ ശേഷമേ സംസ്ഥാന മന്ത്രിസഭ ഇതിൽ അന്തിമ തീരുമാനമെടുക്കൂ.

Key Words : Vizhinjam Share, Government , Adani, Vizhinjam Port