ഇന്ത്യയെ ഭീഷണിപ്പെടുത്തിയ അമേരിക്ക റഷ്യയിൽ നിന്ന് ഡീസൽ വാങ്ങുന്നു, ഇന്ധനവില കുതിക്കവെ ട്രംപിൻ്റെ യൂ ടേൺ

വാഷിംഗ്ടൺ: ആഗോള വിപണിയിൽ ഇന്ധനവില കുതിച്ചുയരുന്നതിനിടെ റഷ്യയിൽ നിന്ന് വൻതോതിൽ ഡീസൽ ഇറക്കുമതി ചെയ്യാൻ അമേരിക്ക കരാറൊപ്പിട്ടു. റഷ്യൻ പ്രസിഡന്റ...

വാഷിംഗ്ടൺ: ആഗോള വിപണിയിൽ ഇന്ധനവില കുതിച്ചുയരുന്നതിനിടെ റഷ്യയിൽ നിന്ന് വൻതോതിൽ ഡീസൽ ഇറക്കുമതി ചെയ്യാൻ അമേരിക്ക കരാറൊപ്പിട്ടു. റഷ്യൻ പ്രസിഡന്റ് വ്ലാഡിമിർ പുടിനുമായി നടത്തിയ നിർണായക ചർച്ചകൾക്ക് ശേഷമാണ് താൻ ഈ തീരുമാനമെടുത്തതെന്ന് യുഎസ് പ്രസിഡന്റ് ഡോണൾഡ് ട്രംപ് ഔദ്യോഗികമായി അറിയിച്ചു. ട്രംപിന്റെ സ്വന്തം സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യൽ' വഴിയാണ് ഈ പ്രഖ്യാപനം പുറത്തുവിട്ടത്.

അമേരിക്കയിലെയും ആഗോള വിപണിയിലെയും കടുത്ത ഇന്ധനക്ഷാമം പരിഹരിക്കാനും വിലക്കയറ്റം നിയന്ത്രിക്കാനുമാണ് ഈ അടിയന്തര നീക്കമെന്നാണ് ട്രംപ് ഭരണകൂടത്തിന്റെ വിശദീകരണം. കരാർ പ്രകാരം ആദ്യഘട്ടത്തിൽ 3,00,000 മെട്രിക് ടൺ ഡീസൽ റഷ്യ അമേരിക്കയിലെത്തിക്കും. തുടർന്ന് വരും മാസങ്ങളിലായി ദശലക്ഷക്കണക്കിന് ടൺ ഡീസൽ കൂടി അമേരിക്കയിലേക്ക് ഇറക്കുമതി ചെയ്യും. റഷ്യൻ ഇന്ധന ഇറക്കുമതി സുഗമമാക്കുന്നതിനായി റഷ്യക്ക് മേലുള്ള സാമ്പത്തിക ഉപരോധങ്ങളിൽ 2027 ഏപ്രിൽ വരെ യുഎസ് ട്രഷറി ഡിപ്പാർട്ട്മെന്റ് താൽക്കാലിക ഇളവുകളും പ്രഖ്യാപിച്ചിട്ടുണ്ട്.

റഷ്യയിൽ നിന്ന് എണ്ണയും വാതകവും വാങ്ങുന്ന ഇന്ത്യ, ചൈന തുടങ്ങിയ രാജ്യങ്ങൾക്കെതിരെ 100 ശതമാനം വരെ താരിഫ് (അധിക നികുതി) ചുമത്തുമെന്ന ട്രംപിന്റെ ഭീഷണി നിലനിൽക്കെയാണ് അമേരിക്കയുടെ ഈ അപ്രതീക്ഷിത നീക്കം. റഷ്യൻ ഇന്ധനം വാങ്ങുന്ന രാജ്യങ്ങൾ യുക്രെയ്ൻ യുദ്ധത്തെ സഹായിക്കുകയാണെന്ന് ആരോപിച്ച് ഉപരോധ നിയമത്തിൽ ട്രംപ് അടുത്തിടെ ഒപ്പുവെച്ചിരുന്നു. എന്നാൽ സ്വന്തം രാജ്യത്തെ വിലക്കയറ്റവും വരാനിരിക്കുന്ന ഇടക്കാല തിരഞ്ഞെടുപ്പും മുന്നിൽക്കണ്ട് അമേരിക്ക റഷ്യയെത്തന്നെ ആശ്രയിക്കുന്നത് കടുത്ത ഇരട്ടത്താപ്പാണെന്ന് അന്താരാഷ്ട്ര തലത്തിൽ വിമർശനം ഉയർന്നിട്ടുണ്ട്.

അമേരിക്കയുടെ ഈ തീരുമാനത്തിനെതിരെ യുക്രെയ്ൻ പ്രസിഡന്റ് വ്ലാഡിമിർ സെലെൻസ്കി ശക്തമായ ഭാഷയിൽ പ്രതികരിച്ചു. യുഎസിന്റെ ഈ ദുർബലമായ തീരുമാനം യുദ്ധം തുടരാൻ പുടിന് സാമ്പത്തിക സഹായം നൽകുന്നതിന് തുല്യമാണെന്ന് അദ്ദേഹം കുറ്റപ്പെടുത്തി. അതേസമയം, സ്വന്തം നാട്ടിലെ കർഷകരുടെയും ട്രക്ക് ഡ്രൈവർമാരുടെയും ദുരിതം കുറയ്ക്കാനാണ് ഇങ്ങനെയൊരു തീരുമാനമെടുത്തതെന്നാണ് ട്രംപിന്റെ ന്യായീകരണം.

Key Words : Russia, Diesel, India, Donald Trump