ജഡ്ജി എന്നെ വിളിച്ചിട്ടില്ല, സ്ഥലംമാറ്റത്തിൽ സങ്കടമില്ല: മുൻ കൊച്ചി സിറ്റി പോലീസ് കമ്മിഷണർ കാളിരാജ് മഹേഷ് കുമാർ

കൊച്ചി: ചേരാനല്ലൂർ കണ്ടെയ്നർ റോഡിലുണ്ടായ വാഹനാപകടവുമായി ബന്ധപ്പെട്ട് അഡീഷണൽ സെഷൻസ് ജഡ്ജി തന്നെയോ തന്റെ ഓഫിസിനെയോ ഫോണിൽ ബന്ധപ്പെട്ടിട്ടില്ലെന...

കൊച്ചി: ചേരാനല്ലൂർ കണ്ടെയ്നർ റോഡിലുണ്ടായ വാഹനാപകടവുമായി ബന്ധപ്പെട്ട് അഡീഷണൽ സെഷൻസ് ജഡ്ജി തന്നെയോ തന്റെ ഓഫിസിനെയോ ഫോണിൽ ബന്ധപ്പെട്ടിട്ടില്ലെന്ന് മുൻ കൊച്ചി സിറ്റി പോലീസ് കമ്മിഷണർ കാളിരാജ് മഹേഷ് കുമാർ വ്യക്തമാക്കി. പദവിയിൽനിന്ന് മാറ്റപ്പെട്ടതിന് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം.

കേസിലെ പ്രതിയായ 17-കാരന്റെ പിതാവായ ജഡ്ജി കമ്മിഷണറെ സ്വാധീനിക്കാൻ ശ്രമിച്ചുവെന്ന തരത്തിൽ പ്രചരിക്കുന്ന വാർത്തകൾ പൂർണ്ണമായും അടിസ്ഥാനരഹിതമാണെന്ന് അദ്ദേഹം പറഞ്ഞു. നിയമവിരുദ്ധമായ ഒരു ആവശ്യത്തിനും വഴങ്ങുന്ന ആളല്ല താനെന്നും അദ്ദേഹം കൂട്ടിച്ചേർത്തു. സോഷ്യൽ മീഡിയയിൽ സജീവമല്ലാത്തതിനാലാണ് പദവി ഒഴിഞ്ഞയുടൻ മാധ്യമങ്ങൾക്ക് മുന്നിൽ സത്യാവസ്ഥ വിശദീകരിക്കാൻ തയ്യാറായതെന്നും അദ്ദേഹം വ്യക്തമാക്കി.

സർക്കാർ ഉദ്യോഗസ്ഥൻ എന്ന നിലയിൽ സ്ഥലംമാറ്റങ്ങൾ സ്വാഭാവിക നടപടി മാത്രമാണെന്നും അതിൽ തനിക്ക് യാതൊരുവിധ വിഷമവുമില്ലെന്നും കാളിരാജ് മഹേഷ് കുമാർ പ്രതികരിച്ചു.

ഒക്ടോബർ 25-ന് പുലർച്ചെ ചേരാനല്ലൂർ കണ്ടെയ്നർ റോഡിലുണ്ടായ അപകടത്തിൽ തട്ടുകടയുടമയായ ജയബാലകൃഷ്ണൻ മരണപ്പെട്ടിരുന്നു. കേസ് കൈകാര്യം ചെയ്യുന്നതിൽ പോലീസിന് വീഴ്ചയുണ്ടായെന്ന ആരോപണങ്ങളെത്തുടർന്നാണ് കാളിരാജ് മഹേഷ് കുമാറിനെ കൊച്ചി സിറ്റി പോലീസ് കമ്മിഷണർ സ്ഥാനത്തുനിന്ന് മാറ്റിയത്. ആർ. നിശാന്തിനിയാണ് പുതിയ കമ്മിഷണർ.

Key Words : Kaliraj Mahesh Kumar