പ്രതിപക്ഷ നേതാവിന്റെ അകമ്പടി വാഹനത്തിൽ സസ്‌പെൻഷനിലുള്ള മുൻ ഗൺമാന്റെ ‘കറക്കം’; ഡിജിപി അന്വേഷണത്തിന് ഉത്തരവിട്ടു

തിരുവനന്തപുരം: പ്രതിപക്ഷ നേതാവ് പിണറായി വിജയന് സുരക്ഷയ്ക്കായി അനുവദിച്ച ഔദ്യോഗിക അകമ്പടി വാഹനത്തിൽ സസ്‌പെൻഷനിലുള്ള അദ്ദേഹത്തിന്റെ മുൻ ഗൺമാൻ ...

തിരുവനന്തപുരം: പ്രതിപക്ഷ നേതാവ് പിണറായി വിജയന് സുരക്ഷയ്ക്കായി അനുവദിച്ച ഔദ്യോഗിക അകമ്പടി വാഹനത്തിൽ സസ്‌പെൻഷനിലുള്ള അദ്ദേഹത്തിന്റെ മുൻ ഗൺമാൻ കറങ്ങിനടന്ന സംഭവത്തിൽ സംസ്ഥാന പൊലീസ് മേധാവി (ഡിജിപി) അടിയന്തര അന്വേഷണത്തിന് ഉത്തരവിട്ടു. ഇന്റലിജൻസ് എഡിജിപി സമർപ്പിച്ച പ്രാഥമിക റിപ്പോർട്ടിന്റെ അടിസ്ഥാനത്തിലാണ് വകുപ്പുതല അന്വേഷണം പ്രഖ്യാപിച്ചത്. വിവിഐപി സുരക്ഷാ ക്രമീകരണങ്ങളിലെ ഗുരുതരമായ വീഴ്ചയായാണ് ആഭ്യന്തര വകുപ്പ് ഇതിനെ കാണുന്നത്.

നവകേരള യാത്രയ്ക്കിടെ ആലപ്പുഴയിൽ വെച്ച് യൂത്ത് കോൺഗ്രസ് - കെഎസ്‌യു പ്രവർത്തകരെ മർദ്ദിച്ച കേസുമായി ബന്ധപ്പെട്ട് നിലവിൽ സസ്‌പെൻഷനിൽ കഴിയുന്ന മുൻ ഗൺമാൻ അനിൽ കുമാറാണ് ഔദ്യോഗിക വാഹനം ദുരുപയോഗം ചെയ്തത്. അനിൽ കുമാറിനൊപ്പം സസ്പെൻഷനിലുള്ള സന്ദീപ് എന്ന മറ്റൊരു പൊലീസുകാരനും വാഹനത്തിൽ ഉണ്ടായിരുന്നു. സസ്‌പെൻഷനിലുള്ള ഉദ്യോഗസ്ഥർക്ക് ഔദ്യോഗിക വാഹനങ്ങളോ മറ്റ് ആനുകൂല്യങ്ങളോ ഉപയോഗിക്കാൻ നിയമപരമായി യാതൊരു അവകാശവുമില്ലെന്നിരിക്കെയാണ് ഈ ഗുരുതരമായ ചട്ടലംഘനം നടന്നിരിക്കുന്നത്.

തിരുവനന്തപുരത്ത് നിയമസഭാ സമ്മേളനം നടക്കവെ പ്രതിപക്ഷ നേതാവ് നിയമസഭയിൽ ആയിരുന്ന സമയത്താണ് അദ്ദേഹത്തിന്റെ സാന്നിധ്യമില്ലാതെ സുരക്ഷാ വാഹനം ക്യാമ്പ് ഓഫീസിൽ നിന്നും പുറത്തെടുത്തത്. എറണാകുളത്ത് ഒരു പരിപാടിയുണ്ടെന്ന് സ്പെഷ്യൽ ബ്രാഞ്ചിനെ തെറ്റിദ്ധരിപ്പിച്ചാണ് KL 01 CH 6749 നമ്പറിലുള്ള ഇന്നോവ ക്രിസ്റ്റ കാർ കൊണ്ടുപോയത്.

തുടർന്ന് ഈ വാഹനവുമായി ഇവർ കൊല്ലം ജില്ലയിലെ പത്തനാപുരം, ഏനാത്ത് ഭാഗങ്ങളിൽ സന്ദർശനം നടത്തുകയായിരുന്നു. പത്തനാപുരത്ത് വെച്ച് റോഡരികിൽ കരിക്ക് കുടിക്കാനായി ഔദ്യോഗിക ബോർഡുവെച്ച വാഹനം നിർത്തി ഇവർ ഇറങ്ങിയപ്പോഴാണ് നാട്ടുകാർ ശ്രദ്ധിച്ചതും സംഭവം പുറത്തായതും. 

പ്രതിപക്ഷ നേതാവിന്റെ സുരക്ഷയ്ക്കായി നൽകിയിട്ടുള്ള മൂന്ന് വാഹനങ്ങളിൽ സ്ഥിരമായി ഉപയോഗിക്കുന്ന പ്രധാന എസ്കോർട്ട് വാഹനമാണ് ഇത്തരത്തിൽ അനുമതിയില്ലാതെ ദുരുപയോഗം ചെയ്തത്. സംഭവത്തിൽ ഡ്യൂട്ടിയിലുണ്ടായിരുന്ന മറ്റ് ഉദ്യോഗസ്ഥരുടെ ഭാഗത്തുനിന്ന് വീഴ്ചയുണ്ടായോ എന്നും പൊലീസ് അന്വേഷിച്ചുവരികയാണ്.

 Key Words : Gunman Anil Kumar