ഇന്ത്യയുമായുള്ള കടുംപിടുത്തം; വേൾഡ് ലെജൻഡ്സ് ചാംപ്യൻഷിപ്പിൽനിന്ന് പാക്കിസ്ഥാൻ പുറത്തേക്ക്!

ദുബായ്: വേൾഡ് ചാമ്പ്യൻഷിപ്പ് ഓഫ് ലെജൻഡ്സ് (WCL) മൂന്നാം സീസണിൽനിന്നു പാക്കിസ്ഥാൻ ചാമ്പ്യൻസ് ഔദ്യോഗികമായി പിന്മാറി. ടൂർണമെന്റിൽ പങ്കെടുക്കുന്...

ദുബായ്: വേൾഡ് ചാമ്പ്യൻഷിപ്പ് ഓഫ് ലെജൻഡ്സ് (WCL) മൂന്നാം സീസണിൽനിന്നു പാക്കിസ്ഥാൻ ചാമ്പ്യൻസ് ഔദ്യോഗികമായി പിന്മാറി. ടൂർണമെന്റിൽ പങ്കെടുക്കുന്നതിനായി കളിക്കാർക്ക് പാക്കിസ്ഥാൻ ക്രിക്കറ്റ് ബോർഡ് (പി.സി.ബി) നിരാക്ഷേപ പത്രം (എൻ.ഒ.സി) നൽകാത്തതിനെ തുടർന്നാണ് നാടകീയമായ ഈ പിന്മാറ്റം. ഷാഹിദ് അഫ്രീദി നയിക്കേണ്ടിയിരുന്ന പാക് ടീം യു.എ.ഇയിൽ എത്തിയിരുന്നെങ്കിലും അനുമതി ലഭിക്കാത്തതിനാൽ മത്സരങ്ങളിൽ പങ്കെടുക്കാനാകാതെ മടങ്ങുകയായിരുന്നു.

കഴിഞ്ഞ സീസണിൽ രാഷ്ട്രീയ കാരണങ്ങളാൽ പാക്കിസ്ഥാനെതിരെ കളിക്കാൻ ഇന്ത്യൻ ടീം വിസമ്മതിച്ചിരുന്നു. അന്ന് ടൂർണമെന്റ് സംഘാടകർ കാണിച്ച വിവേചനത്തിൽ പ്രതിഷേധിച്ച്, ഇത്തവണ ലീഗിൽ പങ്കെടുക്കുന്നതിന് പി.സി.ബി കർശന നിബന്ധനകൾ മുന്നോട്ടുവെച്ചിരുന്നു. കഴിഞ്ഞ വർഷത്തെ സംഭവത്തിൽ ഇന്ത്യൻ കളിക്കാർ രേഖാമൂലം മാപ്പപേക്ഷിക്കണമെന്നും, മത്സരത്തിന് ശേഷം ഇരുടീമിലെയും കളിക്കാർ പരസ്പരം കൈകൊടുക്കുമെന്ന് ഉറപ്പുനൽകണമെന്നുമായിരുന്നു പി.സി.ബിയുടെ പ്രധാന ആവശ്യം. എന്നാൽ ടൂർണമെന്റ് മാനേജ്‌മെന്റ് ഈ ആവശ്യങ്ങൾ തള്ളിയതോടെ ബോർഡ് കളിക്കാർക്ക് എൻ.ഒ.സി നിഷേധിക്കുകയായിരുന്നു.

പാക്കിസ്ഥാന്റെ പിന്മാറ്റത്തോടെ ബംഗ്ലാദേശ്, ഓസ്‌ട്രേലിയ ടീമുകൾക്കെതിരെയുള്ള മത്സരങ്ങൾ റദ്ദാക്കി. കായികപ്രേമികൾ ഏറെ ആകാംഷയോടെ കാത്തിരുന്ന ഒക്ടോബർ 10-ലെ ഇന്ത്യ-പാക് പോരാട്ടവും ഇതോടെ ഇല്ലാതായി. പാക്കിസ്ഥാൻ പിന്മാറിയ സാഹചര്യത്തിൽ മൂന്നാം സീസൺ ഇനി 6 ടീമുകളുമായി മാത്രമായിരിക്കും മുന്നോട്ട് പോവുക എന്ന് ഡബ്ല്യു.സി.എൽ സംഘാടകർ അറിയിച്ചു.

Key Words : India- Pakistan Cricket, World Legends Championship!