ലിസ്ബൺ: പോർച്ചുഗൽ ദേശീയ ഫുട്ബോൾ ടീം ക്യാമ്പ് വിട്ട സൂപ്പർ താരം ക്രിസ്റ്റ്യാനോ റൊണാൾഡോയ്ക്ക് കടുത്ത അച്ചടക്ക നടപടി നേരിടേണ്ടി വന്നേക്കാമെന്ന്...
ലിസ്ബൺ: പോർച്ചുഗൽ ദേശീയ ഫുട്ബോൾ ടീം ക്യാമ്പ് വിട്ട സൂപ്പർ താരം ക്രിസ്റ്റ്യാനോ റൊണാൾഡോയ്ക്ക് കടുത്ത അച്ചടക്ക നടപടി നേരിടേണ്ടി വന്നേക്കാമെന്ന് റിപ്പോർട്ട്. പുതിയ പരിശീലകൻ ഹോർഹെ ജിസ്യൂസുമായുള്ള കടുത്ത തർക്കത്തെത്തുടർന്നാണ് പോർച്ചുഗൽ ക്യാപ്റ്റൻ കൂടിയായ റൊണാൾഡോ നേഷൻസ് ലീഗ് മത്സരങ്ങൾക്കിടയിൽ ക്യാമ്പ് വിട്ടുപോയത്. നിയമലംഘനത്തിന് താരത്തിന് ആറു മാസം വരെ വിലക്ക് ലഭിച്ചേക്കുമെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.
യുവേഫ നേഷൻസ് ലീഗിൽ നോർവേയ്‌ക്കെതിരായ മത്സരത്തിൽ തനിക്ക് 30 മിനിറ്റ് കളിസമയം ഉറപ്പുനൽകിയിരുന്നതായും, എന്നാൽ വാം-അപ്പ് ചെയ്യിപ്പിച്ചിട്ടും തന്നെ ബെഞ്ചിലിരുത്തി അപമാനിച്ചതായും റൊണാൾഡോ ആരോപിച്ചു. മത്സരശേഷം വാർത്താസമ്മേളനത്തിൽ സംസാരിക്കേണ്ട കാര്യങ്ങളെക്കുറിച്ച് ഇരുവരും തമ്മിലുണ്ടാക്കിയ ധാരണ കോച്ച് ലംഘിച്ചതായും താരം വ്യക്തമാക്കി. ഇതേത്തുടർന്നാണ് ഡെന്മാർക്കിനെതിരായ മത്സരത്തിന് മുൻപ് റൊണാൾഡോ ക്യാമ്പ് വിട്ടത്.
അതേസമയം, ക്യാമ്പ് വിട്ട നടപടിയുടെ പൂർണ്ണ ഉത്തരവാദിത്തം ഏറ്റെടുത്ത 41-കാരനായ താരം സഹതാരങ്ങളോടും ആരാധകരോടും ക്ഷമ ചോദിച്ചു. പോർച്ചുഗൽ ഫുട്ബോൾ ഫെഡറേഷൻ സ്വീകരിക്കുന്ന ഏത് തരത്തിലുള്ള അച്ചടക്ക നടപടിയും നേരിടാൻ തയ്യാറാണെന്ന് അദ്ദേഹം അറിയിച്ചു.
ഈ വിവാദങ്ങളുടെ പേരിൽ അന്താരാഷ്ട്ര ഫുട്ബോളിൽ നിന്ന് താൻ വിരമിക്കില്ലെന്ന് റൊണാൾഡോ വ്യക്തമാക്കിയിട്ടുണ്ട്. വിലക്ക് നേരിടേണ്ടി വന്നാലും, ക്ലബ്ബ് ഫുട്ബോളിൽ മികച്ച പ്രകടനം പുറത്തെടുത്ത് വീണ്ടും ദേശീയ ടീമിലേക്ക് തിരിച്ചെത്താൻ ശ്രമിക്കുമെന്നാണ് താരം പറയുന്നത്. റൊണാൾഡോയ്ക്ക് എപ്പോൾ വേണമെങ്കിലും ദേശീയ ടീമിലേക്ക് മടങ്ങിവരാമെന്നും കരിയർ എങ്ങനെ അവസാനിപ്പിക്കണമെന്ന് അദ്ദേഹം തന്നെയാണ് തീരുമാനിക്കേണ്ടതെന്നും പരിശീലകൻ ഹോർഹെ ജിസ്യൂസും പ്രതികരിച്ചു. പ്രശ്നം ഒത്തുതീർപ്പാക്കാനുള്ള അനുനയ നീക്കങ്ങൾ പോർച്ചുഗൽ ഫുട്ബോൾ അസോസിയേഷൻ ആരംഭിച്ചതായാണ് വിവരം.
COMMENTS