പാർലമെൻ്റ് മഴക്കാല സമ്മേളനം പ്രൊറോഗ് ചെയ്യാൻ വൈകുന്നതിനെ ന്യായീകരിച്ച് ഓം ബിർല; മുൻപും ഇങ്ങനെയുണ്ടായിട്ടുണ്ടെന്ന് വിശദീകരണം

  ന്യൂഡൽഹി: പാർലമെന്റിന്റെ മഴക്കാല സമ്മേളനം അനിശ്ചിത കാലത്തേക്ക് പിരിഞ്ഞ് ദിവസങ്ങൾ കഴിഞ്ഞിട്ടും സഭ ഔദ്യോഗികമായി അവസാനിപ്പിക്കാത്ത (പ്രൊറോഗ് ...

 

ന്യൂഡൽഹി: പാർലമെന്റിന്റെ മഴക്കാല സമ്മേളനം അനിശ്ചിത കാലത്തേക്ക് പിരിഞ്ഞ് ദിവസങ്ങൾ കഴിഞ്ഞിട്ടും സഭ ഔദ്യോഗികമായി അവസാനിപ്പിക്കാത്ത (പ്രൊറോഗ് ചെയ്യാത്ത) നടപടിയെ ന്യായീകരിച്ച് ലോക്സഭാ സ്പീക്കർ ഓം ബിർല. സഭ പ്രൊറോഗ് ചെയ്യാൻ വൈകുന്നത് ഭരണഘടനാപരമായ നടപടിക്രമങ്ങൾ അനുസരിച്ചാണെന്നും, ഇതിന് മുൻപും ഇതിലും കൂടുതൽ സമയമെടുത്തിട്ടുള്ള ചരിത്രമുണ്ടെന്നും സ്പീക്കർ വ്യക്തമാക്കി.

കേന്ദ്ര സർക്കാരിന്റെ പാർലമെന്ററി കാര്യങ്ങൾക്കായുള്ള കാബിനറ്റ് കമ്മിറ്റി (CCPA) നൽകുന്ന ശുപാർശയുടെ അടിസ്ഥാനത്തിൽ രാഷ്ട്രപതിയാണ് സഭ ഔദ്യോഗികമായി അവസാനിപ്പിച്ചു കൊണ്ട് ഉത്തരവിറക്കുന്നത്. നിലവിൽ സഭ അനിശ്ചിതകാലത്തേക്ക് പിരിഞ്ഞ ഉടൻ തന്നെ പ്രൊറോഗ് ചെയ്യണമെന്ന് ഭരണഘടനയിൽ എവിടെയും നിർബന്ധപൂർവ്വം പറയുന്നില്ലെന്നും സ്പീക്കറുമായി ബന്ധപ്പെട്ട വൃത്തങ്ങൾ ചൂണ്ടിക്കാണിക്കുന്നു.

അതേസമയം, ഓഗസ്റ്റ് 13-ന് മഴക്കാല സമ്മേളനം അവസാനിച്ചിട്ടും സഭ ഔദ്യോഗികമായി പ്രൊറോഗ് ചെയ്യാത്തതിനെതിരെ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ ശക്തമായ വിമർശനവുമായി രംഗത്തെത്തിയിരുന്നു. പുതിയൊരു സമ്മേളനം വിളിച്ച് ചേർക്കാതെ തന്നെ, കേവലം രണ്ടു ദിവസത്തെ നോട്ടീസിൽ നിലവിലുള്ള സമ്മേളനത്തിന്റെ തുടർച്ചയായി പ്രത്യേക സഭ വിളിച്ചു കൂട്ടാനുള്ള സർക്കാരിന്റെ നീക്കത്തിന്റെ ഭാഗമായാണ് ഈ താമസമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. വനിതാ സംവരണ ബിൽ ഉൾപ്പെടെയുള്ള സുപ്രധാന ഭരണഘടനാ ഭേദഗതികൾ പാസാക്കുന്നതിനായി ഈ സൗകര്യം സർക്കാർ ഉപയോഗപ്പെടുത്തിയേക്കുമെന്നാണ് സൂചന.

Key Words : Parliament Monsoon Session, Om Birla