തിരുവനന്തപുരം: തന്റെ സുരക്ഷയ്ക്കായി അകമ്പടി വാഹനങ്ങളുടെ എണ്ണം കൂട്ടിയതിൽ കടുത്ത അതൃപ്തി പ്രകടിപ്പിച്ച് മുഖ്യമന്ത്രി വി. ഡി. സതീശൻ. ബുധനാഴ്...
തിരുവനന്തപുരം: തന്റെ സുരക്ഷയ്ക്കായി അകമ്പടി വാഹനങ്ങളുടെ എണ്ണം കൂട്ടിയതിൽ കടുത്ത അതൃപ്തി പ്രകടിപ്പിച്ച് മുഖ്യമന്ത്രി വി. ഡി. സതീശൻ. ബുധനാഴ്ച രാവിലെ തിരുവനന്തപുരം കവടിയാറിൽ നടന്ന വയോജന ദിനാചരണ ചടങ്ങിൽ പങ്കെടുക്കാനെത്തിയപ്പോഴായിരുന്നു നാടകീയ സംഭവങ്ങൾ.
മുഖ്യമന്ത്രിയുടെ പതിവ് പൈലറ്റ് വാഹനത്തിന് മുന്നിലായി ഒരു പൊലീസ് ജീപ്പ് കൂടി അധികമായി റൂട്ടിൽ ഉണ്ടായിരുന്നു. കവടിയാറിലെ ചടങ്ങിൽ പങ്കെടുക്കാൻ കാറിൽ നിന്നിറങ്ങിയ ഉടൻ തന്നെ മുഖ്യമന്ത്രി ഡി.സി.പി (DCP) യെ അടുത്തുവിളിച്ച് തനിക്ക് ഇത്തരം അധിക സുരക്ഷാ സംവിധാനങ്ങൾ ആവശ്യമില്ലെന്ന് കടുത്ത ഭാഷയിൽ വ്യക്തമാക്കി. തന്റെ യാത്രകൾ കാരണം പൊതുജനങ്ങൾക്ക് യാതൊരുവിധ ബുദ്ധിമുട്ടുകളും ഉണ്ടാകരുതെന്ന് താൻ നേരത്തെ തന്നെ കർശന നിർദേശം നൽകിയിട്ടുള്ളതാണെന്നും മുഖ്യമന്ത്രി ഓർമ്മിപ്പിച്ചു.
സംസ്ഥാനത്ത് നിലവിലുള്ള രാഷ്ട്രീയ പ്രതിഷേധങ്ങളുടെ പശ്ചാത്തലത്തിലാണ് സുരക്ഷ വർധിപ്പിച്ചതെന്നാണ് പൊലീസ് വൃത്തങ്ങൾ നൽകുന്ന സൂചന. എന്നാൽ, മുഖ്യമന്ത്രിയുടെ വാഹനവ്യൂഹം കടന്നുപോകുന്ന റൂട്ടിൽ മ്യൂസിയം സ്റ്റേഷൻ എസ്.എച്ച്.ഓയുടെ വാഹനം പൈലറ്റ് വണ്ടിക്ക് മുന്നിലായി വന്നുപെട്ടതാണെന്നും, അത് മുഖ്യമന്ത്രിയുടെ എസ്‌കോർട്ട് ഗ്രൂപ്പിൽ ഉൾപ്പെടുത്തിയതല്ലെന്നുമാണ് പിന്നീട് പൊലീസ് നൽകിയ ഔദ്യോഗിക വിശദീകരണം.
പൈലറ്റും എസ്‌കോർട്ടും ഒഴികെയുള്ള വലിയ വാഹനവ്യൂഹങ്ങൾ ഒഴിവാക്കണമെന്നും, സാധാരണക്കാരുടെ യാത്ര തടസ്സപ്പെടുത്തിക്കൊണ്ടുള്ള വി.ഐ.പി സുരക്ഷ തനിക്ക് ആവശ്യമില്ലെന്നും അധികാരമേറ്റ നാൾ മുതൽ വി. ഡി. സതീശൻ നിലപാടെടുത്തിരുന്നു. ഇതിന്റെ തുടർച്ചയായാണ് ഇന്നത്തെ സംഭവവും വിലയിരുത്തപ്പെടുന്നത്.
COMMENTS