ന്യൂഡൽഹി: ഇന്ത്യൻ മഹാസമുദ്ര മേഖലയിൽ പ്രതിരോധവും നിരീക്ഷണവും ശക്തമാക്കുന്നതിന്റെ ഭാഗമായി നാവികസേനയ്ക്കായി 8 അത്യാധുനിക യുദ്ധക്കപ്പലുകൾ നിർമിക...
ന്യൂഡൽഹി: ഇന്ത്യൻ മഹാസമുദ്ര മേഖലയിൽ പ്രതിരോധവും നിരീക്ഷണവും ശക്തമാക്കുന്നതിന്റെ ഭാഗമായി നാവികസേനയ്ക്കായി 8 അത്യാധുനിക യുദ്ധക്കപ്പലുകൾ നിർമിക്കാൻ കേന്ദ്ര സർക്കാർ അനുമതി നൽകി. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന സുരക്ഷാ കാര്യങ്ങൾക്കായുള്ള മന്ത്രിസഭാ സമിതിയാണ് (CCS) 40,000 കോടിയിലധികം രൂപ ചെലവ് വരുന്ന ബൃഹത്തായ പദ്ധതിക്ക് അംഗീകാരം നൽകിയത്. 'നെക്സ്റ്റ് ജനറേഷൻ കോർവെറ്റുകൾ' (NGC) എന്ന് വിശേഷിപ്പിക്കുന്ന ഈ കപ്പലുകൾ പൂർണ്ണമായും തദ്ദേശീയമായാണ് നിർമിക്കുന്നത്.
'ആത്മനിർഭർ ഭാരത്', 'മേയ്ക്ക് ഇൻ ഇന്ത്യ' പദ്ധതികൾക്ക് വലിയ ഊർജ്ജം നൽകുന്നതാണ് ഈ കേന്ദ്ര തീരുമാനം. രാജ്യത്തെ പ്രമുഖ പൊതുമേഖലാ കപ്പൽശാലകളായ കൊൽക്കത്തയിലെ ഗാർഡൻ റീച്ച് ഷിപ്പ് ബിൽഡേഴ്സ് ആൻഡ് എഞ്ചിനീയേഴ്സ് (GRSE) 5 യുദ്ധക്കപ്പലുകളും, ഗോവ ഷിപ്പ്‌യാർഡ് ലിമിറ്റഡ് (GSL) 3 കപ്പലുകളും നിർമിക്കും. ഈ പദ്ധതിയിലൂടെ രാജ്യത്തെ പ്രതിരോധ നിർമാണ മേഖലയിൽ വലിയ തോതിലുള്ള തൊഴിലവസരങ്ങൾ സൃഷ്ടിക്കപ്പെടുമെന്നാണ് വിലയിരുത്തൽ.
ശത്രുക്കളുടെ റഡാറുകളുടെ കണ്ണിൽപ്പെടാതെ സഞ്ചരിക്കാൻ സഹായിക്കുന്ന അത്യാധുനിക 'സ്റ്റെൽത്ത്' (Stealth) സാങ്കേതികവിദ്യയോടെയാണ് ഈ കപ്പലുകൾ രൂപകൽപ്പന ചെയ്യുന്നത്. ഏകദേശം 2,000 ടൺ ഭാരമുള്ള ഈ കപ്പലുകൾക്ക് മണിക്കൂറിൽ 30 നോട്ട്സ് (ഏകദേശം 56 കിലോമീറ്റർ) വേഗതയിൽ സഞ്ചരിക്കാൻ സാധിക്കും. നിലവിൽ ഇന്ത്യൻ നാവികസേനയുടെ ഭാഗമായുള്ള പഴയ ഖുക്രി, കോറ ക്ലാസ് കപ്പലുകൾക്ക് പകരമായാണ് പുതിയ നെക്സ്റ്റ് ജനറേഷൻ യുദ്ധക്കപ്പലുകൾ എത്തുന്നത്.
ഇന്ത്യൻ മഹാസമുദ്ര മേഖലയിൽ ചൈനീസ് യുദ്ധക്കപ്പലുകളുടെയും അന്തർവാഹിനികളുടെയും സാന്നിധ്യം സമീപകാലത്തായി വർധിച്ചുവരുന്ന സാഹചര്യത്തിലാണ് ഇന്ത്യയുടെ ഈ നിർണ്ണായക നീക്കം. കടലിലെ കാവൽ, തീരദേശ പ്രതിരോധം, ഉപരിതല യുദ്ധങ്ങൾ, ശത്രുക്കളുടെ അന്തർവാഹിനികളെ പ്രതിരോധിക്കൽ തുടങ്ങിയ ഒന്നിലധികം ദൗത്യങ്ങൾ ഒരേസമയം നിർവഹിക്കാൻ ഈ കപ്പലുകൾക്ക് ശേഷിയുണ്ടാകും.
നാവികസേനയുടെ ആധുനികവൽക്കരണത്തിൽ നിർണ്ണായക നാഴികക്കല്ലാകുന്ന ഈ പദ്ധതിയിലെ ആദ്യ യുദ്ധക്കപ്പൽ 2030-ഓടെ നാവികസേനയുടെ ഭാഗമാകുമെന്നാണ് പ്രതിരോധ മന്ത്രാലയ വൃത്തങ്ങൾ നൽകുന്ന സൂചന.
Key Words : Navy, Warships
COMMENTS