ആഗോള ഫാഷൻ റൺവേയിൽ ചരിത്രമെഴുതി മലയാളി സുന്ദരി; വിക്ടോറിയാസ് സീക്രട്ട് ഷോയിൽ തിളങ്ങി റവ്‌ലീൻ വർഗീസ്

പത്തനംതിട്ട: കേരളത്തിന്റെ നന്മയും തനിമയും നിറഞ്ഞ ഒരു കൊച്ചു ഗ്രാമത്തിൽ നിന്ന് ലോക ഫാഷൻ ലോകത്തിന്റെ നെറുകയിലേക്ക് ഒരു മലയാളി പെൺകുട്ടി ചുവടുവ...

പത്തനംതിട്ട: കേരളത്തിന്റെ നന്മയും തനിമയും നിറഞ്ഞ ഒരു കൊച്ചു ഗ്രാമത്തിൽ നിന്ന് ലോക ഫാഷൻ ലോകത്തിന്റെ നെറുകയിലേക്ക് ഒരു മലയാളി പെൺകുട്ടി ചുവടുവെച്ചിരിക്കുന്നു. പത്തനംതിട്ട ജില്ലയിലെ കൊടുമൺ സ്വദേശിനിയായ റവ്‌ലീൻ വർഗീസ് (25) ആണ് അമേരിക്കയിലെ ലോസ് ആഞ്ചലസിൽ നടന്ന പ്രശസ്തമായ വിക്ടോറിയാസ് സീക്രട്ട് ഫാഷൻ ഷോയിൽ മോഡലായി പങ്കെടുത്ത് ചരിത്രം കുറിച്ചത്. ഈ ആഗോള വേദിയിലെത്തുന്ന ആദ്യ മലയാളി മോഡലെന്ന ബഹുമതി ഇനി റവ്‌ലീന് സ്വന്തം.

കഴിഞ്ഞ ഒക്ടോബർ 18-ന് കാലിഫോർണിയയിലെ സോണി പിക്ചേഴ്സ് സ്റ്റുഡിയോസിൽ വെച്ചായിരുന്നു ലോകമെമ്പാടുമുള്ള ഫാഷൻ പ്രേമികൾ കാത്തിരുന്ന ഫാഷൻ റൺവേ അരങ്ങേറിയത്. ജിജി ഹാഡിഡ്, ബെല്ല ഹാഡിഡ്, അഡ്രിയാന ലിമ തുടങ്ങിയ ലോകപ്രശസ്ത സൂപ്പർമോഡലുകൾ അണിനിരന്ന റാംപിലാണ് കൊടുമണ്ണിൽ നിന്നുള്ള ഈ അഞ്ചടി പതിനൊന്നിഞ്ചുകാരി ഇന്ത്യയുടെയും കേരളത്തിന്റെയും പ്രതിനിധിയായി തിളങ്ങിയത്. ഷോയിൽ രണ്ട് വ്യത്യസ്തമായ ഡിസൈനർ വസ്ത്രങ്ങളണിഞ്ഞാണ് റവ്‌ലീൻ റൺവേയിൽ എത്തിയത്.

കുട്ടിക്കാലത്ത് മോഡലിംഗ് മേഖല ഒട്ടും ചിന്തയിലില്ലാതിരുന്ന റവ്‌ലീന്റെ ജീവിതം മാറിമറിയുന്നത് ഡൽഹിയിലെ നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജിയിൽ ഫാഷൻ ഡിസൈനിംഗ് പഠനത്തിന് ചേരുന്നതോടെയാണ്. 18-ാം വയസ്സിൽ പഠനകാലത്ത് അപ്രതീക്ഷിതമായി ലഭിച്ച ഒരു മോഡലിംഗ് അവസരമാണ് റവ്‌ലീനെ ഈ രംഗത്തേക്ക് എത്തിച്ചത്. പിന്നീട് കഠിനാധ്വാനത്തിലൂടെ രാജ്യാന്തര ബ്രാൻഡുകളുടെ ശ്രദ്ധ പിടിച്ചുപറ്റാൻ ഈ മലയാളി പെൺകുട്ടിക്കായി.

ഇന്ത്യൻ മോഡലിംഗ് രംഗത്ത് ഇതിനകം തന്നെ ശ്രദ്ധേയയായ റവ്‌ലീൻ, ആഗോള ഫാഷൻ ലോകത്തെ ഏറ്റവും വലിയ വേദിയിൽ തന്റേതായ മുദ്ര പതിപ്പിച്ചതോടെ വലിയൊരു സ്വപ്നസാക്ഷാത്കാരമാണ് സ്വന്തമാക്കിയിരിക്കുന്നത്. പ്രതിഭയും ആത്മവിശ്വാസവുമുണ്ടെങ്കിൽ ഒരു കൊച്ചു ഗ്രാമത്തിൽ നിന്നും ലോകത്തിന്റെ നെറുകയിലെത്താം എന്ന് തെളിയിച്ചിരിക്കുകയാണ് ഈ ഇരുപത്തിയഞ്ചുകാരി. റവ്‌ലീന്റെ ഈ അപൂർവ നേട്ടത്തിന്റെ ആഹ്ലാദത്തിലാണ് ഇപ്പോൾ കൊടുമൺ ഗ്രാമവും ഒപ്പം ലോകമെമ്പാടുമുള്ള മലയാളികളും.

Key Words  : Ravleen Varghese, Victoria's Secret show