സിജെപി പ്രതിഷേധം തടയാനാവില്ലെന്ന് ഡൽഹി ഹൈക്കോടതി; നിയന്ത്രിക്കാൻ കടുത്ത നടപടികളുമായി പൊലീസ്

ന്യൂഡൽഹി: കൊണാട്ട് പ്ലേസ് സെൻട്രൽ പാർക്കിൽ നടക്കാനിരിക്കുന്ന കോക്രോച്ച് ജനതാ പാർട്ടി (CJP) പ്രതിഷേധം തടയണമെന്ന ഹർജി ഡൽഹി ഹൈക്കോടതി നിരസിച്ചു...

ന്യൂഡൽഹി: കൊണാട്ട് പ്ലേസ് സെൻട്രൽ പാർക്കിൽ നടക്കാനിരിക്കുന്ന കോക്രോച്ച് ജനതാ പാർട്ടി (CJP) പ്രതിഷേധം തടയണമെന്ന ഹർജി ഡൽഹി ഹൈക്കോടതി നിരസിച്ചു. ഉത്സവകാലത്തെ ബിസിനസ്സ് തടസ്സങ്ങളും ജനത്തിരക്കും ചൂണ്ടിക്കാട്ടി കൊണാട്ട് പ്ലേസിലെ വ്യാപാരികൾ സമർപ്പിച്ച ഹർജി പരിഗണിക്കവെയാണ് കോടതി ഉത്തരവ്. പ്രതിഷേധം പൂർണ്ണമായി നിരോധിക്കാൻ വിസമ്മതിച്ച കോടതി, എന്നാൽ ക്രമസമാധാന നില ഉറപ്പാക്കാൻ ആവശ്യമായ എല്ലാ കർശന മാർഗങ്ങളും സ്വീകരിക്കാൻ ഡൽഹി പൊലീസിന് നിർദ്ദേശം നൽകി.

ആക്ടിങ് ചീഫ് ജസ്റ്റിസ് നിതിൻ വസുദേവ് സാംബ്രി, ജസ്റ്റിസ് സഞ്ജയ് ശർമ എന്നിവരടങ്ങിയ ഡിവിഷൻ ബെഞ്ചാണ് കേസ് പരിഗണിച്ചത്. പ്രദേശത്ത് ജനക്കൂട്ടത്തെ നിയന്ത്രിക്കാനും നിയമവാഴ്ച ഉറപ്പാക്കാനും എല്ലാ സുരക്ഷാ സംവിധാനങ്ങളും ഒരുക്കിയിട്ടുണ്ടെന്ന് ഡൽഹി പൊലീസ് കോടതിയെ അറിയിച്ചു.

ദേശീയ പതാക ഉയർത്തിയതുമായി ബന്ധപ്പെട്ട് സിജെപി നേതാക്കളായ സൗരവ് ദാസ്, അശുതോഷ് റങ്ക എന്നിവരെ ജുഡീഷ്യൽ കസ്റ്റഡിയിൽ എടുത്തതിൽ പ്രതിഷേധിച്ചാണ് സിജെപി സ്ഥാപകൻ അഭിജീത് ദിപ്കെ 'തിരംഗ മാർച്ചിന്' ആഹ്വാനം ചെയ്തത്. ദസറ വാരാന്ത്യമായതിനാൽ സമരം വലിയ സാമ്പത്തിക നഷ്ടത്തിനും ഗതാഗതക്കുരുക്കിനും കാരണമാകുമെന്നാണ് വ്യാപാരികളുടെ ആശങ്ക. ഈ ഹർജിയിൽ കൂടുതൽ വാദം കേൾക്കുന്നതിനായി കോടതി കേസ് നവംബർ 3-ലേക്ക് മാറ്റി വെച്ചു.

Key Words : Delhi High Court, CJP Protest, Police