ന്യൂഡൽഹി: വോട്ടിംഗ് ലിസ്റ്റ് പരിഷ്കരണത്തിലെ അപാകതകൾ ആരോപിച്ച് ചീഫ് ഇലക്ഷൻ കമ്മീഷണറുടെ രാജി ആവശ്യപ്പെട്ട് കോക്രോച്ച് ജനതാ പാർട്ടി (CJP) വീണ്ട...
ന്യൂഡൽഹി: വോട്ടിംഗ് ലിസ്റ്റ് പരിഷ്കരണത്തിലെ അപാകതകൾ ആരോപിച്ച് ചീഫ് ഇലക്ഷൻ കമ്മീഷണറുടെ രാജി ആവശ്യപ്പെട്ട് കോക്രോച്ച് ജനതാ പാർട്ടി (CJP) വീണ്ടും സമരത്തിലേക്ക്. ഒക്ടോബർ 16-ന് വൈകിട്ട് 5 മണിക്ക് ഡൽഹിയിലെ പ്രശസ്തമായ കൊണോട്ട് പ്ലേസിലുള്ള സെൻട്രൽ പാർക്കിൽ ദേശീയ പതാകയുമായി ഒത്തുകൂടാൻ പാർട്ടി സ്ഥാപകൻ അഭിജീറ്റ് ദിപ്കെ പ്രവർത്തകരോടും പൊതുജനങ്ങളോടും ആഹ്വാനം ചെയ്തു. സമൂഹമാധ്യമങ്ങളിൽ പങ്കുവെച്ച വീഡിയോയിലൂടെയാണ് അദ്ദേഹം ഈ പുതിയ സമരപ്രഖ്യാപനം നടത്തിയത്.
അനുമതിയില്ലാതെ ജന്തർ മന്തറിൽ പ്രവേശിച്ച് ദേശീയ പതാക ഉയർത്തിയതിന് സിജെപി നേതാക്കളായ സൗരവ് ദാസ്, അശുതോഷ് റാങ്ക, അജിൻക്യ ഷിൻഡെ എന്നിവരെ ഡൽഹി പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു. നിലവിൽ തീഹാർ ജയിലിൽ ജുഡീഷ്യൽ കസ്റ്റഡിയിലാണ് ഇവർ. സ്വന്തം രാജ്യത്ത് ദേശീയ പതാക ഉയർത്തുന്നത് ഒരു കുറ്റകൃത്യമല്ലെന്ന് ഭരണാധികാരികളെ ഓർമ്മിപ്പിക്കാനാണ് ഈ ഒത്തുചേരലെന്ന് അഭിജീറ്റ് ദിപ്കെ വ്യക്തമാക്കി.
ഡൽഹിയിലെ പ്രതിഷേധത്തിൽ പങ്കെടുക്കാൻ സാധിക്കാത്തവർ ഒക്ടോബർ 16-ന് വൈകിട്ട് 5 മണിക്ക് അതത് നഗരങ്ങളിൽ ദേശീയ പതാകയുമേന്തി 'തിരംഗ മാർച്ച്' (Tiranga March) നടത്തണമെന്നും സിജെപി നേതൃത്വം അഭ്യർത്ഥിച്ചു. ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് കഴിഞ്ഞ കുറച്ചു ദിവസങ്ങളായി ഡൽഹിയിൽ സിജെപിയുടെ നേതൃത്വത്തിൽ ശക്തമായ പ്രതിഷേധങ്ങളാണ് നടക്കുന്നത്. ഇതിനിടെ ജന്തർ മന്തറിനെ സമരവേദികളുടെ പട്ടികയിൽ നിന്ന് ഡൽഹി പോലീസ് ഒഴിവാക്കിയ പശ്ചാത്തലത്തിലാണ് പ്രതിഷേധം കൊണോട്ട് പ്ലേസിലേക്ക് മാറ്റിയത്.
Key Words : CJP Protest
COMMENTS