മാഡ്രിഡ് : സ്പെയിനില് മാഡ്രിഡിന് സമീപം ഹൈസ്പീഡ് ട്രെയിനുകള്‍ കൂട്ടിയിടിച്ച് 68 പേര്‍ മരിച്ചു. നിരവധിയാളുകള്‍ക്ക് പരിക്കേറ്റു. സംഭവത്തെ ...
മാഡ്രിഡ് : സ്പെയിനില് മാഡ്രിഡിന് സമീപം ഹൈസ്പീഡ് ട്രെയിനുകള്‍ കൂട്ടിയിടിച്ച് 68 പേര്‍ മരിച്ചു. നിരവധിയാളുകള്‍ക്ക് പരിക്കേറ്റു. സംഭവത്തെ തുടര്‍ന്ന് മാഡ്രിഡ്, സിയുഡാഡ് റിയല്‍, അന്ദലൂസിയ എന്നിവയ്ക്കിടയിലുള്ള റെയില്‍ സര്‍വീസ് നിര്‍ത്തിവച്ചു.
പ്രാദേശിക സമയം രാവിലെ 9:00 മണിക്ക് ടോളിഡോ പ്രവിശ്യയിലാണ് അപകടം നടന്നതെന്ന് റെയില്‍ നെറ്റ്വര്‍ക്ക് ഓപ്പറേറ്ററായ എ ഡി ഐ എഫ് അറിയിച്ചു.
എബിസി ന്യൂസ് നല്‍കുന്ന വിവരമനുസരിച്ച്, മാനുഷിക പിഴവാണ് അപകടത്തിന് കാരണമായത്. പ്രധാന സിഗ്‌നലിംഗ് തകരാര്‍ പരിഹരിക്കുകയായിരുന്ന ഒരു പബ്ലിക് യൂട്ടിലിറ്റി ജീവനക്കാരന്‍, എതിര്‍ദിശയില്‍ നിന്ന് വന്നിരുന്ന ഇറിയോ ട്രെയിനിനെക്കുറിച്ച് എവിഇ ഹൈസ്പീഡ് ട്രെയിനിലേക്ക് മുന്നറിയിപ്പ് നല്‍കുന്നതില്‍ പരാജയപ്പെട്ടു എന്ന് ആരോപിക്കപ്പെടുന്നു.
രണ്ട് ട്രെയിനുകള്‍ തമ്മിലുള്ള കൂട്ടിയിടിയെ തുടര്‍ന്ന് മാഡ്രിഡ്-അന്ദലൂസിയ ഹൈസ്പീഡ് റെയില്‍ പാതയിലെ ഗതാഗതം നിര്‍ത്തിവച്ചിരിക്കുകയാണ്. തെക്കോട്ട് സഞ്ചരിക്കുകയായിരുന്ന റെന്‍ഫെ എവിഇ ട്രെയിന്‍, നിര്‍ത്തിയിട്ടിരുന്ന ഇറിയോ ട്രെയിനിന്റെ പിന്‍ഭാഗത്ത് ഇടിക്കുകയായിരുന്നു. ആഘാതത്തില്‍ ട്രെയിനിന്റെ ബോഗികള്‍ റെയില്‍വേ ട്രാക്കിന് താഴെയുള്ള കുഴിയിലേക്ക് മറിഞ്ഞു.
റെന്‍ഫെ ട്രെയിനില്‍ 397 യാത്രക്കാരും ഇറിയോ ട്രെയിനില്‍ 147 യാത്രക്കാരും ഉണ്ടായിരുന്നുവെന്ന് കാസ്റ്റില ലാ മാഞ്ച പ്രവിശ്യാ വക്താവ് എസ്തര്‍ പാഡില പറഞ്ഞു. ഇറ്റാലിയന്‍ ഉടമസ്ഥതയിലുള്ള ഇറിയോ കമ്പനി, തങ്ങള്‍ സുരക്ഷാ പ്രോട്ടോകോളുകള്‍ സജീവമാക്കിയിട്ടുണ്ടെന്നും അധികൃതരുമായി ചേര്‍ന്ന് പ്രവര്‍ത്തിക്കുകയാണെന്നും പ്രസ്താവനയിലൂടെ അറിയിച്ചു.
സ്പാനിഷ് പ്രധാനമന്ത്രിയുടെ പ്രതികരണം
സ്‌പെയിനിലെ ഹൈസ്പീഡ് റെയില്‍ ശൃംഖലയില്‍ ഈ വര്‍ഷം നടക്കുന്ന രണ്ടാമത്തെ വലിയ കൂട്ടിയിടിയാണിതെന്നും, 'ഞെട്ടിപ്പോയി' എന്നും സ്പാനിഷ് പ്രധാനമന്ത്രി പെഡ്രോ സാഞ്ചസ് പറഞ്ഞു.
'ടോളിഡോയിലുണ്ടായ ഗുരുതരമായ ട്രെയിന്‍ അപകടത്തില്‍ ഞാന്‍ അത്യധികം ഞെട്ടിയിരിക്കുകയാണ്. ഗതാഗത മന്ത്രി ഓസ്‌കാര്‍ പ്യൂന്റെയുമായും കാസ്റ്റില-ലാ മാഞ്ച പ്രസിഡന്റുമായും ഞാന്‍ നിരന്തരം ബന്ധപ്പെടുന്നുണ്ട്. ഇരയായവരെ സഹായിക്കുന്നതിനും സുരക്ഷ ഉറപ്പാക്കുന്നതിനും എമര്‍ജന്‍സി സര്‍വീസുകള്‍ പ്രവര്‍ത്തിച്ചുവരുന്നു. ഇരയായവര്‍ക്കും അവരുടെ കുടുംബങ്ങള്‍ക്കും അനുശോചനവും പിന്തുണയും അറിയിക്കുന്നു,' അദ്ദേഹം എക്‌സില്‍ കുറിച്ചു.
ജനുവരിയില്‍ അദാമുസില്‍ 45 പേരുടെ ജീവനെടുത്ത ട്രെയിന്‍ അപകടത്തിന് ശേഷം സ്‌പെയിനിലെ ഹൈസ്പീഡ് റെയില്‍ ശൃംഖലയില്‍ ഉണ്ടാകുന്ന രണ്ടാമത്തെ ദുരന്തമാണിത്. 80 പേര്‍ കൊല്ലപ്പെട്ട 2013-ലെ അപകടത്തിന് ശേഷമുള്ള ഏറ്റവും വലിയ റെയില്‍ ദുരന്തം കൂടിയാണിത്.
Key Words : Spain, High-Speed Train Collision
COMMENTS