തിരുവനന്തപുരം: ആഭ്യന്തര മന്ത്രിയും കോൺഗ്രസ് നേതാവുമായ രമേശ് ചെന്നിത്തലയുടെ യുഎസ് സന്ദർശനവുമായി ബന്ധപ്പെട്ട് സമൂഹമാധ്യമങ്ങളിലൂടെ വ്യാജ പ്രചാര...
തിരുവനന്തപുരം: ആഭ്യന്തര മന്ത്രിയും കോൺഗ്രസ് നേതാവുമായ രമേശ് ചെന്നിത്തലയുടെ യുഎസ് സന്ദർശനവുമായി ബന്ധപ്പെട്ട് സമൂഹമാധ്യമങ്ങളിലൂടെ വ്യാജ പ്രചാരണം നടത്തിയതിന് സിപിഎം നേതാവും മറ്റ് മൂന്നു പേർക്കുമെതിരെ തിരുവനന്തപുരം സൈബർ ക്രൈം പൊലീസ് കേസെടുത്തു.
സിപിഎം നേതാവ് കെ.എസ്. അരുൺകുമാർ, സിപിഎം അനുകൂല ഫെയ്സ്ബുക്ക് പേജായ 'പോരാളി ഷാജി', കുഞ്ഞലൻകുട്ടി, ഷാജി ചാൾസ് എന്നിവർക്കെതിരെയാണ് നടപടി. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ബി.എസ്. സുബിജ നൽകിയ പരാതിയിലാണ് കേസ്.
സർക്കാർ ഖജനാവിൽ നിന്ന് പണം ചെലവഴിച്ചാണ് ഉയർന്ന വിലയുള്ള വിമാന ടിക്കറ്റിൽ രമേശ് ചെന്നിത്തല യുഎസിലേക്ക് യാത്ര ചെയ്തതെന്ന രീതിയിലുള്ള കുറിപ്പുകളാണ് ഇവർ പ്രചരിപ്പിച്ചത്. മാനനഷ്ടം ഉണ്ടാക്കൽ, കലാപമുണ്ടാക്കാൻ ലക്ഷ്യമിട്ടുള്ള വ്യാജ പ്രചാരണം എന്നീ വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്.
യാത്ര സ്വന്തം ചെലവിലാണെന്നും സുഹൃത്തിന്റെ മകന്റെ വിവാഹച്ചടങ്ങിൽ പങ്കെടുക്കാനാണ് താൻ യുഎസിലെത്തിയതെന്നും സർക്കാരിന്റെ പണം ഉപയോഗിച്ചിട്ടില്ലെന്നും രമേശ് ചെന്നിത്തല നേരത്തെ വ്യക്തമാക്കിയിരുന്നു.
COMMENTS