ഇമ്രാൻ ഖാന് ജയിൽ മോചനത്തിനായി പാക് സർക്കാരിന്റെ 'ഒത്തുതീർപ്പ് വ്യവസ്ഥ'; സൂചന നൽകി മകൻ

ഇസ്ലാമാബാദ്, സെപ്റ്റംബർ 28: ജയിലിൽ കഴിയുന്ന പാക്കിസ്ഥാൻ മുൻ പ്രധാനമന്ത്രിയും പി.ടി.ഐ പാർട്ടി തലവനുമായ ഇമ്രാൻ ഖാന് കേസുകൾ ഒത്തുതീർപ്പാക്കി പു...

ഇസ്ലാമാബാദ്, സെപ്റ്റംബർ 28: ജയിലിൽ കഴിയുന്ന പാക്കിസ്ഥാൻ മുൻ പ്രധാനമന്ത്രിയും പി.ടി.ഐ പാർട്ടി തലവനുമായ ഇമ്രാൻ ഖാന് കേസുകൾ ഒത്തുതീർപ്പാക്കി പുറത്തിറങ്ങാൻ ഷെഹ്ബാസ് ഷെരീഫ് സർക്കാർ ഒത്തുതീർപ്പ് വ്യവസ്ഥ വാഗ്ദാനം ചെയ്തതായി സൂചന. ഇമ്രാൻ ഖാന്റെ മകൻ കാസിം ഖാൻ ഒരു അന്താരാഷ്ട്ര മാധ്യമത്തിന് നൽകിയ അഭിമുഖത്തിലാണ് പാക് ഭരണകൂടത്തിന്റെ പുതിയ നീക്കത്തെക്കുറിച്ച് വെളിപ്പെടുത്തിയത്.

തന്റെ പിതാവിന്റെ ജയിൽ മോചനത്തിനായി സർക്കാർ മുന്നോട്ടുവെച്ച വ്യവസ്ഥകൾ അംഗീകരിച്ച് അദ്ദേഹം പുറത്തുവരണമെന്നാണ് വ്യക്തിപരമായി തന്റെ ആഗ്രഹമെന്ന് കാസിം ഖാൻ പറഞ്ഞു. എന്നാൽ കഴിഞ്ഞ ഏഴു മാസമായി പിതാവുമായി നേരിട്ട് സംസാരിക്കാൻ സാധിക്കാത്തതിനാൽ ഇത്തരം ഒത്തുതീർപ്പ് വ്യവസ്ഥകളുടെ പൂർണ്ണമായ വിശദാംശങ്ങൾ തനിക്കറിയില്ലെന്നും അദ്ദേഹം വ്യക്തമാക്കി.

അതേസമയം, പാക് സർക്കാരിന്റെ ഈ ഒത്തുതീർപ്പ് ശ്രമങ്ങളോട് ഇമ്രാൻ ഖാൻ അനുകൂലമായി പ്രതികരിക്കാൻ സാധ്യതയില്ലെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. തന്നെക്കൂടാതെ ജയിലിൽ കഴിയുന്ന തന്റെ പാർട്ടിയുടെ മറ്റ് രാഷ്ട്രീയ തടവുകാരെക്കൂടി മോചിപ്പിക്കാതെ ഇമ്രാൻ ഖാൻ ഇത്തരം വിട്ടുവീഴ്ചകൾക്ക് തയ്യാറാകില്ലെന്ന് മകൻ കാസിം ഖാനും സൂചിപ്പിച്ചു. മുൻപും പാക് സൈന്യവും സർക്കാരും മുന്നോട്ടുവെച്ച സമാനമായ ഒത്തുതീർപ്പ് വ്യവസ്ഥകൾ ഇമ്രാൻ ഖാൻ കർശനമായി നിരസിച്ചിരുന്നു. എന്നാൽ ഷെഹ്ബാസ് ഷെരീഫ് സർക്കാർ ഇത്തരം വാർത്തകളോട് ഔദ്യോഗികമായി ഇതുവരെ പ്രതികരിച്ചിട്ടില്ല.

key words : Pak Government, Imran Khan, jail