സെക്കന്തരാബാദ് സൈനിക താവളത്തിൽ വൻ ആയുധ മോഷണം: എകെ-203 റൈഫിളുകളും വെടിയുണ്ടകളും കവർന്നു

ഹൈദരാബാദ്: അതീവ സുരക്ഷയുള്ള സെക്കന്തരാബാദിലെ ബൊല്ലാരം മിലിട്ടറി സ്റ്റേഷനിൽ നിന്ന് അത്യാധുനിക സേനാ ആയുധങ്ങളും മാരക വെടിക്കോപ്പുകളും മോഷണം പോയ...

ഹൈദരാബാദ്: അതീവ സുരക്ഷയുള്ള സെക്കന്തരാബാദിലെ ബൊല്ലാരം മിലിട്ടറി സ്റ്റേഷനിൽ നിന്ന് അത്യാധുനിക സേനാ ആയുധങ്ങളും മാരക വെടിക്കോപ്പുകളും മോഷണം പോയി. സൈന്യത്തിന്റെ 20 മദ്രാസ് റെജിമെന്റിന്റെ പരിസരത്തുള്ള ആയുധപ്പുരയുടെ (ആർമറി) പൂട്ട് തകർത്താണ് കവർച്ച നടത്തിയിരിക്കുന്നത്.നാല് അത്യാധുനിക എകെ-203 അസോൾട്ട് റൈഫിളുകൾ, ഒരു ഇൻസാസ് (INSAS) റൈഫിൾ, ആറ് 9mm പിസ്റ്റളുകൾ, ഒരു സിവിലിയൻ പിസ്റ്റൾ എന്നിവയ്ക്ക് പുറമെ 1,800-ലധികം വെടിയുണ്ടകളുമാണ് കാണാതായത്. മോഷ്ടിക്കപ്പെട്ട ആയുധങ്ങൾക്ക് വിപണിയിൽ 15 ലക്ഷത്തോളം രൂപ വിലമതിക്കുമെന്നാണ് പ്രാഥമിക കണക്കുകൾ വ്യക്തമാക്കുന്നത്.

സംഭവത്തെ തുടർന്ന് ആയുധപ്പുര പൂർണ്ണമായും സീൽ ചെയ്യുകയും സൈന്യം വിപുലമായ ആഭ്യന്തര അന്വേഷണം പ്രഖ്യാപിക്കുകയും ചെയ്തു. കോട്ടയ്ക്ക് സമാനമായ സുരക്ഷയുള്ള മിലിട്ടറി സ്റ്റേഷനിലേക്ക് പുറത്തുനിന്നുള്ളവർക്ക് അതിക്രമിച്ചു കയറുക എളുപ്പമല്ലാത്തതിനാൽ, മോഷണത്തിന് പിന്നിൽ സൈനിക താവളത്തെക്കുറിച്ച് കൃത്യമായ വിവരമുള്ളവരാകാമെന്നാണ് സംശയം. ആയുധപ്പുരയുടെ ചുമതലയുണ്ടായിരുന്നവർ ഉൾപ്പെടെ പ്രദേശത്ത് പ്രവേശനമുണ്ടായിരുന്ന എല്ലാ സൈനികരെയും നിലവിൽ ചോദ്യം ചെയ്തുവരികയാണ്.

മാരകമായ ഈ അത്യാധുനിക ആയുധങ്ങൾ തീവ്രവാദ സംഘടനകളുടെയോ ക്രിമിനൽ സംഘങ്ങളുടെയോ കൈകളിൽ എത്തിപ്പെടാനുള്ള സാധ്യത കണക്കിലെടുത്ത് പ്രദേശത്ത് അതീവ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. സുരക്ഷാ ഏജൻസികളും പോലീസും സംയുക്തമായാണ് അന്വേഷണം പുരോഗമിക്കുന്നത്.

Key Words :w Weapon Theft, Army Base