ഒടിപിയും പിന്നും മറന്നേക്കൂ; 'ആപ്പിൾ പേ' സേവനങ്ങളുമായി ആപ്പിൾ ഇന്ത്യയിലേക്ക്

ആപ്പിൾ കമ്പനിയുടെ സുരക്ഷിത ഡിജിറ്റൽ പേയ്‌മെന്റ് സേവനമായ 'ആപ്പിൾ പേ' (Apple Pay) ഒടുവിൽ ഇന്ത്യൻ വിപണിയിലും അവതരിപ്പിച്ചു. യുഎസിൽ അവതര...

ആപ്പിൾ കമ്പനിയുടെ സുരക്ഷിത ഡിജിറ്റൽ പേയ്‌മെന്റ് സേവനമായ 'ആപ്പിൾ പേ' (Apple Pay) ഒടുവിൽ ഇന്ത്യൻ വിപണിയിലും അവതരിപ്പിച്ചു. യുഎസിൽ അവതരിപ്പിച്ച് ഒരു പതിറ്റാണ്ടിനു ശേഷമാണ് ആപ്പിൾ പേ ഇന്ത്യയിലെത്തുന്നത്. ഇന്ന് (സെപ്റ്റംബർ 30) മുതൽ ഐഫോൺ, ഐപാഡ്, ആപ്പിൾ വാച്ച് എന്നിവയുള്ള ഇന്ത്യൻ ഉപഭോക്താക്കൾക്ക് ഈ സേവനം ലഭ്യമായിത്തുടങ്ങും. ആദ്യ ഘട്ടത്തിൽ ആക്സിസ് ബാങ്ക് നൽകുന്ന വിസ, മാസ്റ്റർകാർഡ് ക്രെഡിറ്റ് കാർഡുകൾക്ക് മാത്രമാണ് ആപ്പിൾ പേയിൽ പിന്തുണയുള്ളത്. വരും ദിവസങ്ങളിൽ കൂടുതൽ ബാങ്കുകളെ ഇതിന്റെ ഭാഗമാക്കുമെന്ന് കമ്പനി അറിയിച്ചു.

ഇന്ത്യയിൽ ഡിജിറ്റൽ ഇടപാടുകൾ നടത്തുന്നവരുടെ എണ്ണം വർദ്ധിച്ചുവരുന്ന സാഹചര്യത്തിലാണ് ആപ്പിളിന്റെ പുതിയ നീക്കം. ചെക്ക്ഔട്ട് സമയത്ത് വൺ ടൈം പാസ്‌വേഡോ (OTP) പേയ്‌മെന്റ് പിന്നോ (PIN) ഇതിന് ആവശ്യമില്ല എന്നതാണ് ഇതിന്റെ പ്രധാന പ്രത്യേകത. ഫോണിലെ ഫേസ് ഐഡി, ടച്ച് ഐഡി അല്ലെങ്കിൽ പാസ്‌കോഡ് ബയോമെട്രിക്സ് സംവിധാനങ്ങൾ വഴി ഉപയോക്താവിന്റെ ഉപകരണം തന്നെയാണ് പേയ്‌മെന്റ് സ്ഥിരീകരിക്കുന്നത്.

"മറ്റൊരു ആപ്പിന്റെയോ, പിന്നിന്റെയോ സഹായമില്ലാതെ കടകളിൽ ലളിതമായി ടാപ്പ് ചെയ്ത് സുരക്ഷിതമായി പണമടയ്ക്കാൻ ആപ്പിൾ പേ സഹായിക്കും. ഓൺലൈൻ പർച്ചേസുകളിൽ കാർഡ് വിവരങ്ങൾ വീണ്ടും വീണ്ടും ടൈപ്പ് ചെയ്യേണ്ടി വരുന്ന ബുദ്ധിമുട്ടും ഇതോടെ ഒഴിവാകും," എന്ന് ആപ്പിൾ പേ വൈസ് പ്രസിഡന്റ് ജെന്നിഫർ ബെയ്‌ലി വ്യക്തമാക്കി.

ഐഫോണിലെ 'വാലറ്റ്' (Wallet) ആപ്പ് വഴിയോ ആക്സിസ് ബാങ്ക് ആപ്പ് വഴിയോ ഉപഭോക്താക്കൾക്ക് തങ്ങളുടെ യോഗ്യമായ ക്രെഡിറ്റ് കാർഡുകൾ ആപ്പിൾ പേയുമായി ലിങ്ക് ചെയ്യാം. കടകളിൽ നേരിട്ട് പണമടയ്ക്കാൻ ഫോണിന്റെ സൈഡ് ബട്ടൺ ഡബിൾ ക്ലിക്ക് ചെയ്ത് വെരിഫൈ ചെയ്ത ശേഷം ഫോൺ കോൺടാക്റ്റ്‌ലെസ്സ് പേയ്‌മെന്റ് റീഡറിന് അടുത്ത് കാണിച്ചാൽ മതിയാകും. ആപ്പിൾ പേ വഴി പണമടയ്ക്കുമ്പോഴും കാർഡിന്റെ നിലവിലുള്ള റിവാർഡുകളും മറ്റ് ആനുകൂല്യങ്ങളും ഉപഭോക്താക്കൾക്ക് തുടർന്നും ലഭിക്കും.

ഐഒഎസ് 18 സോഫ്റ്റ്‌വെയറിലോ അതിനു മുകളിലോ പ്രവർത്തിക്കുന്ന ഐഫോൺ എക്സ്ആർ (iPhone XR) മുതലുള്ള മോഡലുകളിലും, വാച്ച് ഒഎസ് 11 ഉള്ള ആപ്പിൾ വാച്ച് സീരീസ് 6 മുതലുള്ള മോഡലുകളിലും ആപ്പിൾ പേ ലഭ്യമാകും.

തുടക്കത്തിൽ ആപ്പിൾ സ്റ്റോറുകൾക്ക് പുറമെ സൊമാറ്റോ, ബ്ലിങ്കിറ്റ്, ക്രോമ, ടാറ്റ വൺഎംജി, ചായോസ്, റിലയൻസ് ബ്രാൻഡുകൾ തുടങ്ങിയ പ്രമുഖ ഔട്ട്‌ലെറ്റുകളിലും ആപ്പുകളിലും ആപ്പിൾ പേ സ്വീകരിച്ചു തുടങ്ങിയിട്ടുണ്ട്. ആഗോളതലത്തിൽ 90-ലധികം രാജ്യങ്ങളിലായി പതിനൊന്നായിരത്തിലധികം ബാങ്ക് പങ്കാളികൾ ആപ്പിൾ പേയ്ക്കുണ്ട്.

Key Words : UPI, Apple Pay