ഡൽഹി സർവകലാശാലാ കോളേജ് യൂണിയൻ തെരഞ്ഞെടുപ്പ്: അഞ്ചിലധികം കോളേജുകൾ തൂത്തുവാരി എബിവിപി; ശക്തമായ തിരിച്ചു വരവുമായി എസ്എഫ്‌ഐ

ന്യൂഡൽഹി: ഡൽഹി സർവകലാശാലയ്ക്ക് കീഴിലുള്ള കോളേജുകളിൽ നടന്ന വിദ്യാർത്ഥി യൂണിയൻ തെരഞ്ഞെടുപ്പിൽ തങ്ങളുടെ സ്വാധീനം ഉറപ്പിച്ച് വിദ്യാർത്ഥി സംഘടനകൾ...

ന്യൂഡൽഹി: ഡൽഹി സർവകലാശാലയ്ക്ക് കീഴിലുള്ള കോളേജുകളിൽ നടന്ന വിദ്യാർത്ഥി യൂണിയൻ തെരഞ്ഞെടുപ്പിൽ തങ്ങളുടെ സ്വാധീനം ഉറപ്പിച്ച് വിദ്യാർത്ഥി സംഘടനകൾ. തെരഞ്ഞെടുപ്പ് ഫലങ്ങൾ പുറത്തുവന്നപ്പോൾ അഞ്ചിലധികം പ്രമുഖ കോളേജുകളിലെ മുഴുവൻ സീറ്റുകളും നേടി അഖില ഭാരതീയ വിദ്യാർത്ഥി പരിഷത്ത് (എബിവിപി) വൻ വിജയം അവകാശപ്പെട്ടു. 

എന്നാൽ എബിവിപിയുടെ ശക്തമായ കോട്ടകളിൽ വിള്ളൽ വീഴ്ത്തി പ്രധാന സീറ്റുകൾ പിടിച്ചെടുക്കാൻ കഴിഞ്ഞതായി സ്റ്റുഡന്റ്സ് ഫെഡറേഷൻ ഓഫ് ഇന്ത്യയും (എസ്എഫ്‌ഐ) വ്യക്തമാക്കി.

സർവകലാശാലയ്ക്ക് കീഴിലെ പ്രമുഖ കലാലയങ്ങളായ ശ്രീറാം കോളേജ് ഓഫ് കൊമേഴ്സ്, അതിഥി മഹാവിദ്യാലയ, ഭാരതി കോളേജ്, ഡോ. ബി.ആർ. അംബേദ്കർ കോളേജ്, ശിവാജി കോളേജ്, ശ്രീ അരബിന്ദോ കോളേജ് (മോണിംഗ്) എന്നിവടങ്ങളിലാണ് എബിവിപി പാനൽ മുഴുവൻ സീറ്റുകളും തൂത്തുവാരിയത്. ഇതിന് പുറമെ കേശവ് മഹാവിദ്യാലയ, ശ്യാമപ്രസാദ് മുഖർജി കോളേജ് എന്നിവടങ്ങളിൽ പ്രസിഡന്റ് പദവി അടക്കമുള്ള നിർണായക സീറ്റുകൾ സ്വന്തമാക്കാനും സംഘടനയ്ക്ക് കഴിഞ്ഞു.

മറുഭാഗത്ത്, എബിവിപിയുടെ പരമ്പരാഗത കോട്ടയായിരുന്ന ഭാസ്കരാചാര്യ കോളേജ് ഓഫ് അപ്ലൈഡ് സയൻസിൽ യൂണിയൻ പ്രസിഡന്റ് സ്ഥാനം ഉൾപ്പെടെയുള്ള പ്രധാന സീറ്റുകൾ നേടിയാണ് എസ്എഫ്‌ഐ മുന്നേറ്റം നടത്തിയത്. എഐഎസ്എ (AISA)-എസ്എഫ്‌ഐ സഖ്യത്തിലൂടെ കാമ്പസുകളിൽ ഇടത് സംഘടനകൾ ശക്തമായ സാന്നിധ്യമറിയിച്ചു.

കോളേജ് തലത്തിലുള്ള യൂണിയൻ തെരഞ്ഞെടുപ്പുകൾക്ക് പുറമെ ഡൽഹി സർവകലാശാല വിദ്യാർത്ഥി യൂണിയൻ  സെൻട്രൽ പാനലിലേക്ക് നടന്ന തെരഞ്ഞെടുപ്പിലും എബിവിപി മികച്ച വിജയം സ്വന്തമാക്കി. പ്രസിഡന്റ് സ്ഥാനത്തേക്ക് മത്സരിച്ച എബിവിപിയുടെ യഷ് ദബാസ് 24,576 വോട്ടുകൾ നേടി ഉജ്ജ്വല വിജയം കരസ്ഥമാക്കി. കോൺഗ്രസ് അനുകൂല സംഘടനയായ എൻഎസ്‌യുഐയുടെ (NSUI) വിജയ് ശങ്കർ മീനയെയാണ് അദ്ദേഹം പരാജയപ്പെടുത്തിയത്.

സെക്രട്ടറി സ്ഥാനത്തേക്ക് എബിവിപിയുടെ റിയ ഛാവ്ഡിയും, ജോയിന്റ് സെക്രട്ടറി സ്ഥാനത്തേക്ക് ലക്ഷ്യ രാജ് സിംഗും വിജയിച്ചപ്പോൾ, വൈസ് പ്രസിഡന്റ് സ്ഥാനം സ്വതന്ത്ര സ്ഥാനാർത്ഥിയായ ദീപാൻഷു ഷോക്കീൻ സ്വന്തമാക്കി. ഇതോടെ കേന്ദ്ര പാനലിലെ നാലിൽ മൂന്ന് സീറ്റുകളിലും എബിവിപി വിജയം ഉറപ്പിച്ചു. വിജയാഘോഷ പ്രകടനങ്ങൾക്കും പ്രകടനങ്ങൾക്കും ഡൽഹി ഹൈക്കോടതി കർശന വിലക്കേർപ്പെടുത്തിയിരുന്നതിനാൽ കനത്ത പോലീസ് സുരക്ഷയിലാണ് വോട്ടെണ്ണൽ നടപടികൾ പൂർത്തിയായത്. 

Key Words : Delhi University College Union, Elections, ABVP, SFI