US Attacks Iran's Larak Island, Iran Strikes US Base in Jordan as Tensions Escalate Again
ദുബായ്: ഹോര്മുസ് കടലിടുക്കിലെ ലാറക് ദ്വീപിലുള്ള രണ്ട് ഇറാനിയന് ലോഞ്ച് സിസ്റ്റങ്ങളില് യുഎസ് ഇന്ന് ആക്രമണം നടത്തിയതായി യുഎസ് ഉദ്യോഗസ്ഥനെ ഉദ്ധരിച്ച് റോയിട്ടേഴ്സ് വാര്ത്താ ഏജന്സി റിപ്പോര്ട്ട് ചെയ്തു. ജൂലായ്ക്കു ശേഷം ഇറാനിയന് ഭൂപ്രദേശത്ത് നടക്കുന്ന ആദ്യത്തെ അമേരിക്കന് ആക്രമണമാണിത്.
'ഇന്ന് നേരത്തെ ലാറക് ദ്വീപിലെ രണ്ട് ഇറാനിയന് ലോഞ്ചറുകള് യുഎസ് സേന ആക്രമിച്ചതായി എനിക്ക് സ്ഥിരീകരിക്കാന് കഴിയും. ഹോര്മുസ് കടലിടുക്കിലേക്ക് കടല് മൈനുകളുള്ള റോക്കറ്റുകള് വിക്ഷേപിക്കാന് ഇസ്ലാമിക് റെവല്യൂഷണറി ഗാര്ഡ് കോര് സേന തയ്യാറെടുക്കുന്നതായി നിരീക്ഷിച്ചിരുന്നു,' യുഎസ് ഉദ്യോഗസ്ഥന് റോയിട്ടേഴ്സിനോട് പറഞ്ഞു.
ഹോര്മുസ് ദ്വീപിന് തെക്കും ഖെഷ്ം ദ്വീപിന് കിഴക്കുമായാണ് ലാറക് ദ്വീപ് സ്ഥിതി ചെയ്യുന്നത്. ഇറാനിയന് തലസ്ഥാനമായ ടെഹ്റാനില് നിന്ന് ഏകദേശം 1,100 കിലോമീറ്റര് തെക്ക്-കിഴക്ക് മാറിയാണ് ഇതിന്റെ സ്ഥാനം.
ഇറാന് തങ്ങളുടെ ദ്വീപ് ആക്രമിക്കപ്പെട്ടതായി സ്ഥിരീകരിക്കുകയും നിരവധി സൈനികരും സിവിലിയന്മാരും കൊല്ലപ്പെടുകയോ പരിക്കേല്ക്കുകയോ ചെയ്തിട്ടുണ്ടെന്ന് അറിയിക്കുകയും ചെയ്തു. ഈ ആക്രമണത്തിന് 'പ്രതികരണവും ശിക്ഷയും' ഉണ്ടാകുമെന്ന് ഗാര്ഡുകള് മുന്നറിയിപ്പ് നല്കിയതായി ഇറാനിയന് സ്റ്റേറ്റ് മീഡിയ ഉദ്ധരിച്ചു.
ഫെബ്രുവരി 28 നാണ് യുഎസും ഇസ്രായേലും ഇറാനെതിരെയുള്ള സംയുക്ത ആക്രമണങ്ങള് ആരംഭിച്ചത്. ഇസ്രായേലിനും യുഎസ് സൈനിക താവളങ്ങള് സ്ഥിതി ചെയ്യുന്ന ഗള്ഫ് രാജ്യങ്ങള്ക്കും നേരെ ആക്രമണം നടത്തിക്കൊണ്ടാണ് ഇറാന് തിരിച്ചടിച്ചത്.
ഹോര്മുസ് കടലിടുക്കില് പുതിയ മൈനുകള് സ്ഥാപിക്കാന് ഇറാന് നടത്തുന്ന ഏത് ശ്രമത്തിനെതിരെയും വാഷിംഗ്ടണ് നടപടിയെടുക്കുമെന്ന് യുഎസ് പ്രസിഡന്റ് ഡൊണാള്ഡ് ട്രംപ് കഴിഞ്ഞ ആഴ്ച മുന്നറിയിപ്പ് നല്കിയിരുന്നു.
യുദ്ധം ആറുമാസം പിന്നിടുന്ന വേളയില്, പ്രവാചകന് മുഹമ്മദ് നബിയുടെ ജന്മദിനത്തോടനുബന്ധിച്ച് അമേരിക്കയ്ക്കും ഇസ്രായേലിനുമെതിരെ ഒന്നിക്കാന് മേഖലയിലെ മുസ്ലിം ഭൂരിപക്ഷ രാജ്യങ്ങളോട് ഇറാന്റെ പരമോന്നത നേതാവ് മൊജ്തബ ഖമേനി അഭ്യര്ത്ഥിച്ച് മണിക്കൂറുകള്ക്ക് ശേഷമാണ് ഞായറാഴ്ചത്തെ ആക്രമണം ഉണ്ടായത്.
തിങ്കളാഴ്ച രാജ്യത്തിന്റെ വ്യോമാതിര്ത്തിയില് പ്രവേശിച്ച എട്ട് മിസൈലുകള് തടഞ്ഞതായി ജോര്ദാനിയന് സായുധ സേന അറിയിച്ചു. ഇത് ഇറാന്റെ തിരിച്ചടിയാണെന്നു സ്ഥിരീകരിച്ചിട്ടുണ്ട്. തിങ്കളാഴ്ച ജോര്ദാനിലെ യുഎസ് സേനയ്ക്ക് നേരെ ഇറാന് ആക്രമണം നടത്തിയതായി വിഷയവുമായി ബന്ധപ്പെട്ട യുഎസ് സ്രോതസ് ഫോക്സ് ന്യൂസിനോട് സ്ഥിരീകരിച്ചു. മിസൈലുകളില് ഭൂരിഭാഗവും യുഎസ് വ്യോമ പ്രതിരോധ സംവിധാനം തടഞ്ഞതായി സ്രോതസ് കൂട്ടിച്ചേര്ത്തു.
'ലാറക് ദ്വീപിലെ യുഎസ് ആക്രമണത്തിന് മറുപടിയായി ഇറാനികള് യുഎസ് താവളങ്ങള്ക്ക് നേരെ വിവിധ മിസൈലുകള് വിക്ഷേപിക്കുകയാണ്,' ഫോക്സ് ന്യൂസ് റിപ്പോര്ട്ടു ചെയ്തു.
തിങ്കളാഴ്ച പുലര്ച്ചെ ഹോര്മുസ് കടലിടുക്കിലെ യുഎസ് കപ്പലുകള്ക്ക് നേരെ ഇറാന് മിസൈലുകള് വിക്ഷേപിച്ചതായി ഇറാനിയന് സ്റ്റേറ്റ് ബ്രോഡ്കാസ്റ്ററായ പ്രസ് ടിവി റിപ്പോര്ട്ട് ചെയ്തു.
'യുഎസ്-ഇസ്രായേല് ശത്രു ലാറക് ദ്വീപില് നടത്തിയ ആക്രമണത്തിന്' മറുപടിയായി ജോര്ദാനിലെ രണ്ട് യുഎസ് സൈനിക താവളങ്ങള്ക്ക് നേരെ ആക്രമണം നടത്തിയതായി തിങ്കളാഴ്ച രാവിലെ ഇറക്കിയ പ്രസ്താവനയില് റവല്യൂഷണറി ഗാര്ഡ് പറഞ്ഞു.
ബാലിസ്റ്റിക് മിസൈലുകള് ഉപയോഗിച്ച് 'സാങ്കേതിക-പരിപാലന സൗകര്യങ്ങളും ശത്രുവിന്റെ യുദ്ധവിമാനങ്ങള് നിലയുറപ്പിച്ചിരിക്കുന്ന സ്ഥലങ്ങളും' ലക്ഷ്യമിട്ടതായി റവല്യൂഷണറി ഗാര്ഡ് പ്രസ്താവനയില് അവകാശപ്പെട്ടു. ആക്രമണത്തില് താവളങ്ങള് നശിക്കുകയും വലിയ നാശനഷ്ടങ്ങള് സംഭവിക്കുകയും ചെയ്തതായി പ്രസ്താവനയെ ഉദ്ധരിച്ച് ഐആര്ഐബി റിപ്പോര്ട്ട് ചെയ്തു.
'ഓരോ ആക്രമണത്തിനും അതിലും ശക്തമായ തിരിച്ചടി നല്കും,' പ്രസ്താവന തുടരുന്നു.
'ഹോര്മുസ് കടലിടുക്കില് പെട്ടെന്നുണ്ടായ ഭീഷണി ഒഴിവാക്കാന് യുഎസ് സേന കൃത്യവും പരിമിതവുമായ നടപടിയാണ് എടുത്തത്. ഇറാന് സൃഷ്ടിച്ച ഭീഷണിയെ, സിവിലിയന് നാവികരെയും വാണിജ്യ കപ്പല് ഗതാഗതത്തെയും ആഗോള വ്യാപാരത്തെയും സംരക്ഷിക്കുന്നതിനായി യുഎസ് സൈന്യം ഇല്ലാതാക്കുകയാണുണ്ടായത്,' അമേരിക്കന് സേനാ നേതൃത്വം പറഞ്ഞു.
COMMENTS