പിണറായി വിജയൻ്റെ വസതിയിലെ റെയ്ഡ് കഴിഞ്ഞ് മടങ്ങിയ ഇഡി ഉദ്യോഗസ്ഥരെ ആക്രമിച്ച കേസ് : എം.വി. ഗോവിന്ദൻ ഉൾപ്പെടെയുള്ള നേതാക്കളെ ചോദ്യം ചെയ്യും

തിരുവനന്തപുരം: പ്രതിപക്ഷ നേതാവ് പിണറായി വിജയൻ്റെ വസതിയിലെ റെയ്ഡ് കഴിഞ്ഞ് മടങ്ങിയ എൻഫോഴ്സ്മെൻ്റ് ഡയറക്ടറേറ്റ് (ഇഡി) ഉദ്യോഗസ്ഥരെ ആക്രമിച്ച കേസ...

തിരുവനന്തപുരം: പ്രതിപക്ഷ നേതാവ് പിണറായി വിജയൻ്റെ വസതിയിലെ റെയ്ഡ് കഴിഞ്ഞ് മടങ്ങിയ എൻഫോഴ്സ്മെൻ്റ് ഡയറക്ടറേറ്റ് (ഇഡി) ഉദ്യോഗസ്ഥരെ ആക്രമിച്ച കേസിൽ അന്വേഷണം ഊർജ്ജിതമാക്കി പൊലീസ്. സംഭവസ്ഥലത്തുണ്ടായിരുന്ന സിപിഐഎം സംസ്ഥാന സെക്രട്ടറി എം.വി. ഗോവിന്ദൻ, ജോൺ ബ്രിട്ടാസ് എം.പി, വി. ജോയ്, ബിനീഷ് കോടിയേരി എന്നിവരടങ്ങുന്ന പ്രമുഖ നേതാക്കളെയുൾപ്പെടെ ചോദ്യം ചെയ്യുന്നതിനായി അന്വേഷണ സംഘം നോട്ടീസ് അയച്ചു തുടങ്ങി.

മാസപ്പടി കേസുമായി ബന്ധപ്പെട്ട് മെയ് 27-ന് പിണറായി വിജയൻ്റെ തിരുവനന്തപുരത്തെ വസതിയിൽ നടന്ന ഇഡി റെയ്ഡിന് പിന്നാലെയായിരുന്നു സംഭവം. റെയ്ഡ് കഴിഞ്ഞ് മടങ്ങിയ ഉദ്യോഗസ്ഥരെയും അവരുടെ വാഹനങ്ങളെയും ഒരു സംഘം ആളുകൾ തടഞ്ഞുനിർത്തി ആക്രമിക്കുകയായിരുന്നു. ഇത് പെട്ടെന്നുണ്ടായ പ്രതിഷേധമല്ലെന്നും, അന്വേഷണം തടസ്സപ്പെടുത്താൻ മുൻകൂട്ടി ആസൂത്രണം ചെയ്ത് നടത്തിയ അക്രമമാണെന്നുമാണ് ഇഡി കോടതിയെ അറിയിച്ചിട്ടുള്ളത്.

കേസിൽ അറസ്റ്റിലായി രണ്ട് മാസത്തിലേറെ റിമാൻഡിൽ കഴിഞ്ഞിരുന്ന ഭൂരിഭാഗം സിപിഎം-ഡിവൈഎഫ്ഐ പ്രവർത്തകർക്കും നിലവിൽ ഹൈക്കോടതി കർശന ഉപാധികളോടെ ജാമ്യം അനുവദിച്ചിട്ടുണ്ട്. കേസിൻ്റെ അന്വേഷണം അന്തിമഘട്ടത്തിലേക്ക് നീങ്ങുന്ന സാഹചര്യത്തിലാണ് അക്രമം നടക്കുമ്പോൾ സംഭവസ്ഥലത്തുണ്ടായിരുന്ന നേതാക്കളിലേക്ക് ചോദ്യം ചെയ്യൽ വ്യാപിപ്പിക്കാൻ പൊലീസ് തീരുമാനിച്ചത്. അക്രമത്തിന് പിന്നിൽ ആസൂത്രണമുണ്ടോ എന്ന് വ്യക്തമാക്കാനാണ് നേതാക്കളെ ചോദ്യം ചെയ്യുന്നത്.

Key Words : Case, ED Raid, Pinarayi Vijayan, M.V. Govindan