വാട്സാപ്പിൽ ആറക്ക പിന്നിന് പകരം ഇനി സ്ട്രോങ്ങ് പാസ്‌വേഡ് വരുന്നു; സുരക്ഷ ഇരട്ടിയാകും

വാട്സാപ്പ് സുരക്ഷ കൂടുതല്‍ ശക്തമാക്കുന്നതിനായി ആറക്ക പിന്‍ നമ്പറുള്ള ടൂ-ഫാക്ടര്‍ ഓതന്റിക്കേഷന് പകരമായി ഉടന്‍ തന്നെ പാസ്വേഡുകള്‍ ഉപയോഗിക്കാന്...

വാട്സാപ്പ് സുരക്ഷ കൂടുതല്‍ ശക്തമാക്കുന്നതിനായി ആറക്ക പിന്‍ നമ്പറുള്ള ടൂ-ഫാക്ടര്‍ ഓതന്റിക്കേഷന് പകരമായി ഉടന്‍ തന്നെ പാസ്വേഡുകള്‍ ഉപയോഗിക്കാന്‍ സാധിച്ചേക്കും. 

ആറ് അക്കങ്ങള്‍ മാത്രമുള്ള പിന്‍ നമ്പറുകളെ അപേക്ഷിച്ച് പാസ്വേഡുകള്‍ തകര്‍ക്കാന്‍ ബുദ്ധിമുട്ടാണ് എന്നതാണ് ഇതിന്റെ ഏറ്റവും വലിയ സവിശേഷത. യുപിഐ പേയ്‌മെന്റുകള്‍ക്കും അന്യര്‍ ചാറ്റുകള്‍ പരിശോധിക്കുന്നത് തടയാനും ശക്തമായ ഒരു സംവിധാനമായിരിക്കും പുതിയ പാസ്വേഡ് ഫീച്ചര്‍. ഈ പുതിയ പാസ്വേഡ് സംവിധാനം ഉപയോക്താക്കള്‍ക്ക് ആവശ്യമെങ്കില്‍ മാത്രം തിരഞ്ഞെടുത്താല്‍ മതി. കൂടാതെ ഉപയോക്താക്കള്‍ക്ക് ഇനി മുതല്‍ ഐപാഡുകളില്‍ ഫോണിന്റെ സഹായമില്ലാതെ തന്നെ ലോഗിന്‍ ചെയ്യാനും സ്വന്തമായി അക്കൗണ്ട് തുടങ്ങാനും സാധിക്കും. 

പ്രധാന മാറ്റങ്ങൾ 

ഹാക്കിങ് തടയാം: അക്കങ്ങൾ മാത്രമുള്ള ആറക്ക പിന്നിനേക്കാൾ, ചിഹ്നങ്ങളും അക്ഷരങ്ങളും ചേർന്ന പാസ്‌വേഡുകൾ ഹാക്കർമാർക്ക് തകർക്കാൻ പ്രയാസമായിരിക്കും.

ദൈർഘ്യം: പുതിയ പാസ്‌വേഡുകൾക്ക് 6 മുതൽ 20 ക്യാരക്ടറുകൾ വരെ നീളമുണ്ടാകും. ഇതിൽ കുറഞ്ഞത് ഒരു അക്ഷരവും ഒരു അക്കവും നിർബന്ധമായും ഉണ്ടായിരിക്കണം.

നിർബന്ധമല്ല: നിലവിലെ ടൂ-സ്റ്റെപ്പ് വെരിഫിക്കേഷൻ പോലെ തന്നെ ഈ ഫീച്ചറും ഉപയോക്താക്കൾക്ക് ആവശ്യമെങ്കിൽ മാത്രം ഓൺ ചെയ്യാവുന്നതാണ്.

സാമ്പത്തിക സുരക്ഷ: വാട്സാപ്പ് വഴി യുപിഐ പണമിടപാടുകൾ വ്യാപകമായ സാഹചര്യത്തിൽ, സിം കാർഡോ ഒടിപിയോ (OTP) ചോർന്നാലും അക്കൗണ്ട് സുരക്ഷിതമായി സൂക്ഷിക്കാൻ ഇത് സഹായിക്കും.

ആൻഡ്രോയിഡ്, ഐഒഎസ് (iOS) ബീറ്റാ ടെസ്റ്റർമാരിൽ പരീക്ഷണം പൂർത്തിയാക്കിയ ശേഷമായിരിക്കും ഈ സുരക്ഷാ ഫീച്ചർ സാധാരണ ഉപയോക്താക്കളിലേക്ക് എത്തുക. ഇതിന് പുറമെ വെബ്, ഡെസ്‌ക്ടോപ്പ് വേര്‍ഷനുകളില്‍ ഉപയോഗിക്കാന്‍ സാധിക്കുന്ന ഒരു ഇന്‍-ബില്‍റ്റ് പിഡിഎഫ് റീഡറും എഡിറ്ററും കൂടെ വാട്സാപ്പ് അവതരിപ്പിച്ചിട്ടുണ്ട്.

Key Words : Tech News, Whatsapp