നീറ്റ് ചോദ്യപ്പേപ്പർ ചോർച്ച: കുറ്റക്കാർക്കായി അതിവേഗ കോടതികൾ സ്ഥാപിക്കുമെന്ന് പ്രധാനമന്ത്രി നരന്ദ്ര മോദി

ന്യൂഡൽഹി: നീറ്റ് ചോദ്യപ്പേപ്പർ ചോർച്ച കേസിൽ ഉൾപ്പെട്ട കുറ്റക്കാർക്ക് വേഗത്തിലും കഠിനവുമായ ശിക്ഷ ഉറപ്പാക്കാൻ രാജ്യത്ത് അതിവേഗ കോടതികൾ സ്ഥാപിക...

ന്യൂഡൽഹി: നീറ്റ് ചോദ്യപ്പേപ്പർ ചോർച്ച കേസിൽ ഉൾപ്പെട്ട കുറ്റക്കാർക്ക് വേഗത്തിലും കഠിനവുമായ ശിക്ഷ ഉറപ്പാക്കാൻ രാജ്യത്ത് അതിവേഗ കോടതികൾ സ്ഥാപിക്കുമെന്ന് പ്രധാനമന്ത്രി നരേന്ദ്ര മോദി പ്രഖ്യാപിച്ചു. സോഷ്യൽ മീഡിയ പ്ലാറ്റ്‌ഫോമായ എക്‌സിലൂടെയാണ് പ്രധാനമന്ത്രി സർക്കാരിന്റെ ഈ നിർണായക തീരുമാനം അറിയിച്ചത്.

പ്രധാനമന്ത്രിയുടെ വാക്കുകൾ

"യുവതലമുറയുടെ ക്ഷേമത്തിനും ഭാവിക്കും അപ്പുറം മറ്റൊന്നുമില്ല. ചോദ്യപ്പേപ്പർ ചോർച്ചയിൽ ഉൾപ്പെട്ടവർക്ക് അതിവേഗത്തിലും കർശനവുമായ ശിക്ഷ ഉറപ്പാക്കുന്നതിനായി അതിവേഗ കോടതികൾ സ്ഥാപിക്കാൻ ഞങ്ങൾ തീരുമാനിച്ചു. ഇതുമായി ബന്ധപ്പെട്ട് ആവശ്യമായ എല്ലാ നടപടികളും സ്വീകരിക്കാൻ ബന്ധപ്പെട്ട അധികാരികൾക്കും ഉദ്യോഗസ്ഥർക്കും നിർദേശം നൽകിയിട്ടുണ്ട്. വിദ്യാർഥികളുടെ താൽപ്പര്യങ്ങൾ സംരക്ഷിക്കുന്നതിനുള്ള തുടർനടപടിയാണിത്. നമ്മുടെ യുവാക്കളുടെ ഭാവി തകർക്കാൻ ശ്രമിക്കുന്ന ഒരു കുറ്റവാളിയെയും വെറുതെ വിടില്ല."

നീറ്റ് ചോദ്യപ്പേപ്പർ ചോർച്ചയുമായി ബന്ധപ്പെട്ട് ഡൽഹി ജന്തർ മന്ദിറിലും രാജ്യത്തിന്റെ വിവിധ ഭാഗങ്ങളിലും വിദ്യാർഥികളും യുവജന സംഘടനകളും വൻ പ്രതിഷേധങ്ങൾ നടത്തുന്നതിനിടയിലാണ് പ്രധാനമന്ത്രിയുടെ ഈ നിർണായക പ്രതികരണം.

എം.പി/എം.എൽ.എമാർക്കെതിരായ കേസുകൾ കൈകാര്യം ചെയ്യുന്ന അതിവേഗ കോടതികളുടെ മാതൃകയിൽ, പരീക്ഷാ ചോർച്ചയും ക്രമക്കേടുകളും അന്വേഷിച്ച് വേഗത്തിൽ വിചാരണ പൂർത്തിയാക്കാനാണ് പുതിയ കോടതികൾ ലക്ഷ്യമിടുന്നത്. പരീക്ഷാ സംവിധാനം കൂടുതൽ സുതാര്യവും സുരക്ഷിതവുമാക്കുന്നതിനായി കർശന നടപടികളിലേക്ക് കടക്കാൻ ബന്ധപ്പെട്ട വകുപ്പുകൾക്ക് കേന്ദ്ര സർക്കാർ അടിയന്തര നിർദേശം നൽകിയിട്ടുണ്ട്.

Key Words : NEET Question paper Leak, Narendra Modi