കൊച്ചി: ഇൻഫോപാർക്ക് കേന്ദ്രീകരിച്ച് പ്രവർത്തിക്കുന്ന പ്രമുഖ ഐടി കമ്പനിയായ കോറോ ഹെൽത്തിലെ പിരിച്ചുവിടൽ നടപടികളിൽ ജീവനക്കാർക്ക് വൻ ആശ്വാസം. മാ...
കൊച്ചി: ഇൻഫോപാർക്ക് കേന്ദ്രീകരിച്ച് പ്രവർത്തിക്കുന്ന പ്രമുഖ ഐടി കമ്പനിയായ കോറോ ഹെൽത്തിലെ പിരിച്ചുവിടൽ നടപടികളിൽ ജീവനക്കാർക്ക് വൻ ആശ്വാസം. മാനേജ്മെന്റും ഐടി ജീവനക്കാരുടെ സംഘടനയായ 'പ്രതിധ്വനി'യും ലേബർ ഡിപ്പാർട്ട്മെന്റിന്റെ മധ്യസ്ഥതയിൽ നടത്തിയ ചർച്ചയിലാണ് ജീവനക്കാർക്ക് അനുകൂലമായ തീരുമാനമുണ്ടായത്. പിരിച്ചുവിടപ്പെടുന്ന ജീവനക്കാർക്ക് ഏഴ് മാസത്തെ ശമ്പളം ഉൾപ്പെടുന്ന സെവറൻസ് പാക്കേജ് നൽകാൻ കമ്പനി സമ്മതിച്ചു.
കമ്പനിയുടെ പെട്ടെന്നുള്ള പിരിച്ചുവിടൽ പ്രഖ്യാപനത്തെ തുടർന്ന് ജീവനക്കാർക്കിടയിൽ വലിയ ആശങ്ക ഉയർന്നിരുന്നു. ഇതിനെതിരെ പ്രതിധ്വനി ശക്തമായി രംഗത്തുവരികയും ലേബർ കമ്മീഷണറുടെ സാന്നിധ്യത്തിൽ ചർച്ചകൾ ആരംഭിക്കുകയുമായിരുന്നു. മണിക്കൂറുകൾ നീണ്ട ചർച്ചകൾക്കൊടുവിലാണ് ജീവനക്കാരുടെ ആവശ്യങ്ങൾ അംഗീകരിക്കാൻ മാനേജ്മെന്റ് തയ്യാറായത്.
പിരിച്ചുവിടപ്പെടുന്ന എല്ലാ ജീവനക്കാർക്കും ഏഴ് മാസത്തെ പൂർണ്ണ ശമ്പളം ആശ്വാസധനമായി ലഭിക്കും. നോട്ടീസ് പിരീഡ് തുകയ്ക്ക് പുറമെ, നിയമപരമായി ലഭിക്കേണ്ട മറ്റ് ആനുകൂല്യങ്ങളും കൃത്യമായി വിതരണം ചെയ്യും. ഐടി മേഖലയിലെ തൊഴിൽ സുരക്ഷ ഉറപ്പാക്കുന്നതിൽ പ്രതിധ്വനിയുടെ നേതൃത്വത്തിൽ നടന്ന ഈ ചർച്ച വലിയ വിജയമായി വിലയിരുത്തപ്പെടുന്നു.
"ഐടി മേഖലയിലെ പിരിച്ചുവിടലുകളിൽ സാധാരണയായി ലഭിക്കാറുള്ളതിനേക്കാൾ മികച്ച ഒരു പാക്കേജ് നേടിയെടുക്കാൻ കഴിഞ്ഞത് ജീവനക്കാരുടെ ഒരുമയുടെ വിജയമാണ്," എന്ന് പ്രതിധ്വനി ഭാരവാഹികൾ പ്രതികരിച്ചു.
കേരളത്തിലെ ഐടി ചരിത്രത്തിൽ തന്നെ ജീവനക്കാർക്ക് അനുകൂലമായി ഉണ്ടാകുന്ന ഏറ്റവും വലിയ സെവറൻസ് പാക്കേജുകളിൽ ഒന്നാണിത്. സാമ്പത്തിക പ്രതിസന്ധിയുടെ പേരിൽ ജീവനക്കാരെ പെരുവഴിയിലാക്കുന്ന കമ്പനികൾക്കുള്ള ശക്തമായ മുന്നറിയിപ്പാണ് ഈ തീരുമാനമെന്ന് വിലയിരുത്തപ്പെടുന്നു.
Key Words : Layoff, Corro Health
COMMENTS